Tribunal Supremu d'España

De Uiquipedia
Saltar a: navegación, buscar
Sede del Tribunal Supremu, en Madrid.

El Tribunal Supremu ye'l muérganu costitucional del Estáu Español qu'encuma la organización del Poder Xudicial. Tien la so sede en Madrid y ye superior en tolos órdenes, sacante lo dimpuestu en materia de garantíes costitucionales.

Poderes y potestaes[editar | editar la fonte]

El Tribunal Supremu ye'l tribunal de cabera instancia (final) en tolos casos y les sos decisiones sólo puen ser dexaes ensin efectu cuando'l Tribunal Costitucional alcuentra mancadura de los drechos y llibertaes costitucionales. En tolos demás casos, nun ye posible apelar o recurrir una decisión firme del Tribunal Supremu.

Magüer, nel ámbetu penal el Rei d'España pue dexar esin efectu inclusive les condergues impuestes o ratificaes pol Tribunal Supremu, n'exerciciu del drechu de gracia que la Costitución reconoz, a propuestu del Conseyu de Ministros.

Conoz y decide los procesos de responsabilidá civil o penal encontra'l Presidente y los Ministros del Gobiernu de la Nación, los Senaores y Diputaos de les Cortes Xenerales, el Presidente y los Maxistraos del propiu Tribunal Supremu y Vocales del Conseyu Xeneral del Poder Xudicial, el Presidente y los Maxistraos del Tribunal Constitucional y otros integrantes d'altes istituciones del Estáu y de les Comunidaes Autónomes.

Asinamesmu, conoz y decide los procesos d'illegalización de partíos políticos, a istancia esclusiva del Ministeriu Fiscal o del Gobiernu, requeríu a ello pol Senáu o'l Congresu de los Diputaos.

Tamién conoz y decide los recursos ordinarios y extraordinarios previstos pola Llei encontra les resoluciones de los tribunales inferiores.

Por últimu, conoz y decide los demás procesos que la Costitución o la Llei reserven a la so competencia.

Garantíes costitucionales del Tribunal Supremu[editar | editar la fonte]

El Tribunal Supremu gocia d'una posición análoga a la de les Cortes Xenerales y el Gobiernu de la Nación, a causa de posición equivalente como cabeza d'un de los tres Poderes del Estau.

En garantía de la so llibertá de furrulamientu, el Tribunal Supremu cunta cola prerrogativa d'executividá de los sos autos en virtú del prencipiu d'obediencia a les resoluciones xudiciales firmes consagráu pola Constitución, en conxunción col fechu de que la mayoría de les resoluciones d'esti Tribunal son firmes por tratase de soluciones a recursos escontra autos de los Tribunales inferiores.

Arriendes, el Tribunal Supremu ye l'únicu que pue ordenar la detención de los sos propios ñembros y sólu elli pue procesalos y separalos por responsabilidaes civiles y penales nel desempeñu de les sos funciones.

Adicionalmente, el Conseyu Xeneral del Poder Xudicial tamién supervisa el funcionamientu del Tribunal Supremu, magar que tolos autos d'esti Conseyu puen ser anulaos pol propiu Tribunal Supremu en vía contencioso-alministrativu.

Organización y furrulamientu del Tribunal Supremu[editar | editar la fonte]

El Tribunal Supremu ta compuestu por un Presidente y por un númberu indetermináu de Maxistraos adscritos a les estremaes Sales que lu integren, toós ellos nomaos por So Maxestá el Rei a propuestu del Conseyu Xeneral del Poder Xudicial.

Nel senu del Tribunal Supremu esisten órganos xurisdicionales, encargaos d'alministrar xusticia en nome del Rei xulgando y faciendo executar lo xulgao, y muérganos gubernativos y alministrativos, aquéllos con función de gobiernu y direición o de simple alministración y auxiliu a los otros dos gurupos.


Muérganos xurisdiccionales[editar | editar la fonte]

  • El Tribunal Supremu dixébrase en cinco Sales, qu'entienden de los recursos que se presenten escontra les resoluciones de los Tribunales inferiores y en primera o única istancia de los procesos sobro responsabilidá del Presidente y los Ministros del Gobiernu de la Nación, de los Senaores y Diputaos de les Cortes Xenerales, del Presidente y los Maxistraos del Tribunal Supremu, de los Vocales del Conseyu Xeneral del Poder Xudicial, del Presidente y los Maxistraos del Tribunal Costitucional y d'otros integrantes de Muérganos Costitucionales del Estáu y les Comunidaes Autónomes, siempres sigún los respeutivos órdenes xurisdiccionales:
  1. Sala Primera, de lo Civil.
  2. Sala Segunda, de lo Penal.
  3. Sala Tercera, de lo Contencioso-Alministrativu.
  4. Sala Cuarta, de lo Social.
  5. Sala Quinta, de lo Militar.
  • Amás, dientro'l Tribunal Supremu esisten unos muérganos xurisdicionales especiales:
  1. La Sala Especial del artículu 61 de la Llei Orgánica del Poder Xudicial, que conoz de los procesos d'illegalización de partíos políticos, de los procesos sobro declaración d'erru xudicial y sobro responsabilidá n'exerciciu de funciones xurisdiccionales de les demás Sales del Tribunal Supremu y d'otros procesos de especial emportancia; compónese pol Presidente del Tribunal Supremu, los Presidentes de les Sales y el Maxistrau más antiguu y el más modernu de ca una d'elles.
  2. La Sala d'Enterrios de Competencia, que resuelve los enterrios positivos y negativos de competencia que se susciten ente muérganos xudiciales pertenecientes a distintu orden xurisdicional; compónese pol Presidente del Tribunal Supremu y por un Maxistráu de ca una de les Sales correspondientes a los órdenes xurisdiccionales n'esterriu.
  3. La Sala d'Enterrios de Xurisdición, que resuelve los esterrios positivos y negativos de xurisdicción que se susciten ente un muérganu xudicial perteneciente a la xurisdicción ordinaria y un muérganu xudicial perteneciente a la xurisdición militar; compónese pol Presidente del Tribunal Supremu, por dos Maxistraos de la Sala correspondiente al orden xurisdicional de la xurisdición ordinaria n'enterriu y por dos Maxistraos de la Sala Quinta, de lo Militar.
  4. El Tribunal d'Enterrios de Xurisdición, que resuelve los enterrios de positivos y negativos de xurisdición que se susciten ente un muérrganu xudicial de la xurisdición ordinaria o de la militar y l'Alministración; compónese pol Presidente del Tribunal, por dos Maxistraos de la Sala Tercera, de lo Contencioso-Alministrativu, y por tres Conseyeros Permanentes del Conseyu d'Estáu.

Muérganos gubernativos[editar | editar la fonte]

Con subordinación al Conseyu Xeneral del Poder Xudicial, los muérganos gubernativos del Tribunal Supremu son los encargaos de conocer y resolver les cuestiones d'índole alministrativa y de furrulamientu del Tribunal y los sos muérganos xurisdicconales. Son muérganos gubernativos:

  1. El Presidente del Tribunal Supremu.
  2. La Sala de Gobiernu del Tribunal Supremu, compuesta pol Presidente del Tribunal Supremu, los Presidentes de ca una de les sos Sales y un númberu de Maxistraos igual al d'estos, escoyíos pol procedimientu arbitrau na Llei Orgánica del Poder Xudicial.

Muérganos d'alministración[editar | editar la fonte]

La Secretaría de Gobiernu del Tribunal Supremu, el Gabinete Técnicu de Documentación ya Información, el Departamentu d'Archivu, Biblioteca ya Información, el Departamentu d'Informática y el Rexistru Xeneral son muérganos alministrativos y téunicos que posibiliten el furrulamientu del Tribunal nos sos respeutivos ámbetos d'autuación.

Véase tamién[editar | editar la fonte]

Enllaces esternos[editar | editar la fonte]