Tornéu de les Seis Naciones
El Tornéu de les Seis Naciones (oficialmente RBS 6 Nations) ye una competición añal de rugbi a XV na que participen les seleiciones d'Inglaterra, Francia, Irlanda, Escocia, Gales ya Italia.
El Tornéu de les Seis Naciones ye'l socesor del Cinco Naciones y del Cuatro Naciones, que foi'l primer tornéu internacional de rugbi nel hemisferiu norte. El ganador d'esti tornéu ye tamién conocíu como campeón d'Europa. Anguaño, el patrocinador ye'l Royal Bank of Scotland.
Francia ye'l vixente campeón del Grand Slam del tornéu, desbancando a Irlanda, que ganó'l Grand Slam y la Triple Corona en 2009. Francia ganó'l títulu en 2010 el 20 de marzu, completando'l Grand Slam al ganar 12-10 a Inglaterra nel estadiu Stade de France.
Índiz |
[editar] Formatu
Xugáu añalmente, el formatu del tornéu ye simple: caúna de les seleiciones xuega escontra caúna de les otres cinco, alternándose cada añu y pa caún de los partíos l'equipu que xuega como llocal. Les victories valen dos puntos, los empates un puntu y les derrotes nengún puntu.
Si un equipu gana tolos sos partíos, dizse que gana'l Grand Slam. Inglaterra ye la seleición que más veces ganó'l Grand Slam (12), siguía de Gales (10), Francia (9), Escocia (3) ya Irlanda (2). En cinco ocasiones un equipu foi quien a ganar el Grand Slam dos veces siguíes: Gales en 1908-1909, Inglaterra en 1913-1914, 1923-1924 y 1991-1992, y Francia en 1997-1998.
La victoria de una de les cuatro seleiciones del Reinu Xuníu ya Irlanda escontra les otres tres, llámase Triple Corona. Gales (ente 1976 y 1979) ya Inglaterra (ente 1995 y 1998) algamáronla cuatro veces siguíes. Inglaterra ye la seleición que más veces ganó la Triple Corona (23), siguía de Gales (20) y Escocia ya Irlanda (10). Nun foi fasta 2006 qu'esti títulu contó con un troféu físicu pal ganador.
L'equipu que termina'l tornéu nel caberu puestu, dizse que gana la Cuyar de Madera.
Al amparu del tornéu, xuéguense delles competiciones individuales. La más antigua y regular ye la Copa Calcuta (tien esti nome porque'l troféu ta fechu con rupies indies fundíes), que xueguen Inglaterra y Escocia dende 1879. Dende 1988, el partíu ente Inglaterra ya Irlanda conózse como Troféu del Mileniu. En 2007 creóse'l Troféu Giussepe Garibaldi, pa cellebrar los 200 años dende que naciera en Niza (Francia) esti unificador italianu, y que xueguen añalmente dende entós les seleiciones de Francia ya Italia.
Antes de 1994, los equipos qu'empataben a puntos al final del tornéu, compartíen el títulu. Dende esi añu, los empates desfáense pola diferencia de puntos de los equipos empataos. Si aún asina caltiense l'empate, el ganador será'l que más ensayos marcara. Si asina tampoco se ye quien a desempatar, entós los equipos comparten el títulu (anque fasta la fecha, sólo foi necesario empelgar la diferencia de puntos).
[editar] Resultaos
 Inglaterra |
 Gales |
 Francia |
 Escocia |
 Irlanda |
 Italia |
|
|---|---|---|---|---|---|---|
| Torneos disputaos | 111 | 111 | 81 | 111 | 111 | 12 |
| Triunfos absolutos (Triunfos compartíos) | 26 (10) | 24 (11) | 17 (8) | 14 (8) | 11 (8) | 0 (0) |
| Grand Slams | 12 | 10 | 9 | 3 | 2 | 0 |
| Triple Corona | 23 | 19 | N/A | 10 | 10 | N/A |
[editar] Estadios d'anguaño
| Equipu | Estadiu | Capacidá |
|---|---|---|
| Inglaterra | Twickenham | 82.000 |
| Francia | Stade de France | 81.338 |
| Gales | Estadiu del Mileniu | 74.500 |
| Escocia | Murrayfield | 67.130 |
| Irlanda | Estadiu Aviva | 51.700 |
| Italia | Estadiu Flaminio | 32.000 (ampliando a 42.000) |
La inauguración del Estadiu Aviva en mayu de 2010 terminó col alcuerdu cola Asociación Atlética Gaélica (GAA poles sos sigles n'inglés) que permitía a la seleición d'Irlanda usar l'estadiu Croke Park pa los sos partíos internacionales. Esti alcuerdu roblóse en 2007 dempués de que se demoliera Lansdowne Road, estadiu tradicional d'Irlanda como llocal, pa construir nel mesmu sitiu l'Estadiu Aviva. Nos años nos que se xugó en Croke Park, esti yera'l mayor de los campos del tornéu, con capacidá pa 82.300 persones.
L'aumentu de la popularidá de palla ovale n'Italia, fizo que l'Estadiu Flaminio fuera cada vegada menos viable como campu llocal pa la seleición. Especulóse entós col usu de campos de fútbol como l'Estadiu Olímpicu de Roma y otros nel norte del país, onde'l rugbi ye más popular, como l'Estadiu Luigi Ferrraris (Genoa - 42.000 espectadores) o l'Estadiu Ennio Tardini (Parma - 28.000 espectadores). Recientemente, por embargu, anuncióse l'ampliación del Estadiu Flaminio, colo que paez que va caltenése como sede d'Italia nel Seis Naciones (anque va siguir siendo'l que menor capacidá tien nel tornéu).
[editar] Himnos
Antes d'entamar caún de los partíos, xugadores y aficionaos canten l'himnu de caún de los dos equipos.
Anque ]]God Save the Queen]] ye l'himnu nacional del Reinu Xuníu, sólo lu emplega Inglaterra. Gales y Escocia canten los sos propios himnos nacionales. La seleición d'Irlanda (que representa a la República d'Irlanda y a Irlanda del Norte en comuña) tien un himnu especialmente fechu pa los partíos de rugbi internacionales.
- Inglaterra: God Save the Queen
- Francia: La Marseillaise
- Irlanda: Ireland's Call (Amhrán na bhFiann cántase tamién nos partíos xugaos na República d'Irlanda)
- Italia: Il Canto degli Italiani llamáu normalmente L' Inno di Mameli
- Escocia: Flower of Scotland
- Gales: Hen Wlad fy Nhadau
