Tianjin

De Uiquipedia
Saltar a: navegación, buscar
Llocalización de Tianjin dientro'l país

Tianjin (en chinu: 天津; en pinyin: Tiānjīn) ye una ciudá asitiada nel norte de la República Popular China. La metrópoli, que tien l'estatus alministrativu de municipalidá, con control directu pol gobiernu nacional, llenda cola provincia de Hebei y la municipalidá de Pequín, y ta arrodiada al este pol golfu de Bohai, nel mar Mariellu.

Tianjin

La ciudá, que tenía 12,28 millones d'habitantes na so municipalidá al final de 2009, ye la mayor de les ciudaes costeres del norte de China, y tien dos núcleos urbanos. El tradicional, qu'inclúi el cascu antiguu, asítiase a la oriella'l ríu Hai, que ta conectáu a los ríos Mariellu y Yangtze al traviés del Gran Canal; y la zona nomada Binhai, asitiada al este de la anterior a la vera la mar. Esta ye ún de los principales polos de crecimientu del país, y nella asiéntense munches empreses importantes, lo mesmu industriales que financieres. La ciudá ye, dende mediaos del sieglu XIX, un puertu perimportante, al qu'aportaben les persones y mercancíes destinaes a la capital del país.

Dientro la so economía rescampla la importancia del sector industrial. Na ciudá hai industries petroquímiques, testiles, mecániques y siderúrxiques. Hai tamién, fabriques de coches, y una fábrica d'aviones d'Airbus. Nella allúgase tamién, nel so centru nacional de supercomputación, el supercomputador más rápidu del mundu, nomáu Tianhe-1A. El so puertu, el mayor puertu artificial d'agües profundes de China, ye'l quintu del mundu por capacidá. A la so actividá de carga súma-y tamién el so calter de puertu d'arribada de los cruceros de pasaxeros que fondean nella demientres los pasaxeros visiten la ciudá y la vecina Beixín.

La ciudá ye tamién sé de dos de les más principales universidaes del país: la Universidá de Nankai, fundada en 1919 y que ye una de les más prestixoses de China; y la Universidá de Tianjin, la más vieya del país, fundada en 1895.


Enllaces esternos[editar | editar la fonte]

Skyline de Tianjin pela nueche
Tianjin
Wikimedia Commons tien archivos rellacionaos con: