Sombreru de teya

De Uiquipedia
Saltar a: navegación, buscar
Un obispu y el so secretariu con sombreros Saturnu (1906)

Un sombreru de teya o teya ye un sombreru semicircular con ala ancha y arondiada usáu pol cleru católicu. N'Italia recibe'l nome de sombreru saturnu porque la so forma recuerda a la del planeta anilláu Saturnu.

La teya faise de cualquier piel o fieltru de castor y fórrase con seda blanca. A diferencia de munchos otros artículos del traxe eclesiásticu, nun responde a ningún propósitu ceremonial, siendo sobre too un artículu prácticu, usáu na vida privada (el galeru yera un sombreru ceremonial d'ala ancha, en desusu dende 1969 salvo n'heráldica eclesiástica). L'usu d'esti sombreru ye optativu, pero nunca s'usa nos servicios relixosos.

Sombreru Saturnu con cordones y borles en verde y oro, qu'indiquen que pertenez a un patriarca o un primáu.

Los clérigos que lu utilicen pueden llevalu adornáu con pequeñes borles acordonaes sobre l'ala, en númberu y color equivalente al del galeru heráldicu propiu del so escalafón na xerarquía (negru pa presbíteros y diáconos, verde pa los obispos y arzobispos, púrpura pa los prelaos, encarnáu pa los cardenales, doráu pal Papa).

Anguaño, ye infrecuente velu fuera de la ciudá de Roma, aunque foi absolutamente popular n'otros países con una población mayoritariamente católica a partir del sieglu XVII hasta alredor de 1970. Na ciudá d'Uviéu foi corriente ver al padre Luciano López García-Jove, D. Luciano, pasear pela ciudá col sombreru de teya y mantéu prácticamente hasta la so muerte en 1992.

Recientemente, el papa Benitu XVI apaeció en público col típicu sombreru Saturnu de color encarnáu, que n'ocasiones más lúdiques ye blancu.