Ryu (escuela)

De Uiquipedia
Saltar a: navegación, buscar

Ryu (流, ryū: lliteralmente "corriente", inclusive "corriente principal"), o Ryuha (流派, ryūha, que vien ser "escuela que sigue la corriente principal"), ye un términu xaponés que se refier a una escuela de pensamientu en cualesquier disciplina. Atópase normalmente n’escueles de les artes marciales xaponeses, pero tamién nes más variaes disciplines; por casu la Nihonkoryu y la Sogetsuryu n’ikebana, o la Kanteiryu en shodo (caligrafía), etc.

Ryu y ryuha son práuticamente sinónimos en xaponés. Quiciabes ha (orixinalmente "afluente") sería una división más pequeña que ryu (orixinalmente "masa d’agua").

Ryu aveza tamién tornase a "estilu" (estilu d’un arte marcial, estilu de caligrafía, estilu del arte de cocinar, etc.)

Ryu nes artes marciales[editar | editar la fonte]

Les artes marciales xaponeses avecen clasificase y codificase en ryuha. Polo xeneral un estilu en concreto tien el so propiu currículum, graos y sistema de llicencies. Estos pueden basase nos de la rama principal o nuna combinación de fontes que formen los antepasaos del sistema.

El nome d’un estilu pue tener un significáu especial o debese simplemente a la so llocalización orixinal. Por exemplu Toyama-ryu llámase asina pola Academia Militar de Toyama, en Xapón. Pero por exemplu Goju-ryu significa “estilu duru-suave”, lo qu’indica les carauterístiques y elementos que formen la “firma” del estilu. Dalgunes veces esto mézclase o tracamúndiase col nome del dojo orixinal, como nel casu del Shotokan-ryu (Kárate Shotokan).

Los prauticantes d’altu nivel d’un estilu establecíu pueden dixebrase y formar los sos propios estilos derivaos basaos na so propia esperiencia o interpretación. Dalgunes veces esto afálalo l’estilu madre, pero otres representa una xebradura ideolóxica ente los miembros veteranos del estilu. Pue ocurrir tamién que se faiga simplemente por razones de “marketing” o por adautar un sistema a los tiempos modernos.

Nun esiste un sistema de llicencies o graos común a tolos ryuha. Una persona d’altu grau o “cinturón negru” nun estilu non necesariamente cuadra col conceutu de nivel altu que tienen n’otru estilu o grupu d’estilos. Hai munchos ryuha en Xapón que lleven esistiendo cientos d’años, igual que munchos otros foron creaos en tiempos modernos. El conceutu d’organizar un sistema codificáu obviamente nun ye de propiedá xaponesa o asiática, pero munchos estilos internacionales o estranxeros pueden adoptar la nomenclatura y sistematización de los koryu bujutsu ryuha col envís d’añader un aire de misticismu o llexitimación al so sistema, o cenciellamente como métodu d’amosar los sos raigaños y abolengu.

Enllaces esternos[editar | editar la fonte]