Rosendo Mercado
Rosendo Mercado | |
|---|---|
 | |
| Vida | |
| Nacimientu | Madrid[1], 23 de febreru de 1954 (70 años) |
| Nacionalidá |
 España |
| Estudios | |
| Llingües falaes | castellanu |
| Oficiu | músicu, guitarrista, cantante |
| Premios |
ver
|
| Xéneru artísticu | hard rock |
| Instrumentu musical | Fender Stratocaster |
| IMDb | nm0580180 |
| rosendo.es | |
 | |
.svg){kind=small}
Rosendo Mercado Ruiz (23 de febreru de 1954, Madrid), o a cencielles Rosendo, ye un guitarrista, cantante y compositor de rock madrilanu; formó parte de los grupos Ñu y Leño, y ye consideráu unu de los más importantes representantes del rock español.
Historia[editar | editar la fonte]
Rosendo nació nel barriu madrilanu d'O'Donnell, fíu d'emigrantes zapateros procedentes de Bolaños de Calatrava (Castiella-La Mancha). Crióse nel distritu de Carabanchel, onde mora dende entós. N'abandonando los estudios na escuela d'inxeniería ICAI, en 1972 incorporóse como guitarrista a Fresa, un conxuntu que tocaba versiones de cantares de moda y n'ocasiones acompañaba solistes.
Tres diversos cambeos, qu'incluyeron la incorporación como cantante de José Carlos Molina, la banda pasó a denominase Ñu. Rosendo compaxinaba la creación musical col serviciu militar. En 1974 Rosendo afayó la música de Rory Gallagher, que convirtióse nuna de les sos influencies más grandes, al pie de otros grupos como Jethro Tull, Canned Heat, Cream, Deep Purple o Black Sabbath.
Leño[editar | editar la fonte]
Les sos rellaciones con José Carlos Molina nun yeren bones, y en 1977 Rosendo abandonó la formación pa crear Leño. El nome de Leño foi dau ensin sabelo por Molina, al refugar dellos cantares de Rosendo, diciéndo-y que "estos cantares son un Tochu". Con él, qu'amás de la guitarra va encargase de la voz nel nuevu grupu, vanse Chiqui Mariscal, que toca'l baxu, y Ramiro Penas como batería.
Debutaron en 1978 como teloneros d'Asfalto. Fueron contrataos por Vicente "Mariscal" Romero, que taba poniendo en marcha Chapa Discos y publicó'l discu coleutivu "Viva el rollo, Vol II. Rock del Manzanares", onde incluyéronse dos canciones de Leño: "Este Madrid" y "Aprendiendo a escuchar". En 1979 llanzóse'l primer discu de llarga duración: "Leño". L'álbum, producíu por Teddy Bautista, contién cantares con llargos desarrollos instrumentales, ente les que destaquen "El tren" y "Este Madrid".
"Más madera", el segundu álbum de Leño apaeció en 1980, en plena esplosión de la "new wave". Bien influyíu polos arreglos realizaos por Teddy Bautista, los cantares son más curties y l'estilu menos pesáu. En 1981 grabaron na sala Carolina'l discu "En direuto". A pesar de cuntar con un soníu non descomanadamente bonu, el discu tuvo bones ventes. Ente los cantares incluyíos ta una de les más conocíes de Rosendo, "Maneras de vivir", que namái fuera grabada enantes n'estudiu pa un discu senciellu d'adelantu. Participen nel discu Luz Casal (coros) y Teddy Bautista (teclaos).
L'últimu discu oficial de Leño, "¡Corre, corre!", de 1982, foi grabáu en Londres, realizóse con más medios gracies al ésitu del anterior álbum, y nél destaquen cantares como "Sorprendente" y "¡Qué desilusión!".
Carrera en solitariu - presente[editar | editar la fonte]
Problemes col so anterior sellu discográficau (Chapa/Zafiro) retrasaron hasta 1985 la salida del primer discu en solitariu de Rosendo, "Loco por incordiar", editáu pola RCA, grabáu n'Alemaña y producíu por Carlos Narea.
Foi'l momentu de más ésitu comercial de la so carrera, gracies a cantares como "Agradecido", "Pan de higo" o la que da títulu al álbum. Sicasí, "Fuera de lugar", editáu al añu siguiente, atopa reacciones negatives ente los críticos de heavy metal. El so últimu discu pa RCA, "...A las lombrices", publicáu en 1987, foi recibíu con frialdá. La producción corrió al cargu de Jo Dworniak. Nesti discu incorporóse al grupu'l baxista Rafael J. Vegas, que siguió acompañándo-y dende entós.
En dexando RCA, Rosendo pasó a grabar con Twins. El primer álbum con esta nueva discográfica ye "Jugar al gua" (1988), que contién dellos cantares con un estilu distintu a lo anterior (por casu, el reggae "Del pulmón") pero tamién unu de les sos temes clave, "Flojos de pantalón". El segundu discu pa Twins foi "Direuto" (1989), qu'inclúi cantares de tola so trayeutoria hasta aquel momentu, incluyendo dos de Leño.
Rosendo sufrió un nuevu cambéu de discográfica cuando Twins xunióse con DRO, compañía cola que siguió grabando hasta l'actualidá. El primer álbum pa DRO, "Deja que les diga que no", apaeció en 1991. La producción foi compartida con Eugenio Muñoz, que tamién participaría en dellos discos posteriores. Un añu dempués apaeció "La tortuga", discu que contién un cantar radiáu con frecuencia naquella dómina, "Majete", lo que-y apurriría de nuevu ciertu ésitu.
Con "Para mal o para bien" (1994) grabó per primer vegada nel estudiu d'El Cortijo del Aire, nel Cabu de Gata. Dellos cantares destacaos del discu son "De qué vas?" y "Hasta de perfil". Esti postreru ye una tema de crítica al poder y nél cunta cola collaboración de trés componentes de Celtas Cortos. El so siguiente álbum, "Listos para la reconversión" publicáu en 1996. Tres esti discu abandonaron la banda dos músicos que llevaben acompañándo-y munchos años, el teclista Gustavo Di Nóbile y el batería Miguel Ángel Jiménez.
En publicando al añu siguiente la banda sonora de la película "Dame algo", dirixida por Héctor Carré, en 1998 empezó una nueva etapa na que va utilizar el formatu de tríu (baxu, batería y guitarra, arrenunciando al tecláu) y camudó temporalmente la so guitarra de tola vida, una Fender Stratocaster, por una Gibson, magar-y camuda les pastillas orixinales poles del modelu Stratocaster, declarando que "siendo fiel a Fender, lo que-y atrai de la Gibson ye la estética". Darréu tornaría a la Fender porque nun s'acostumaba a la Gibson, especialmente pol tactu.
El primer discu d'esta nueva etapa ye "A tientas y barrancas" (1998), al que sigue en 1999 "Siempre hay una historia... en direuto", que grábase nel patiu de la cárcel de Carabanchel, y consigue el primer discu d'oru na carrera del madrilanu. Nel añu 2000 la ciudá de Leganés pon el so nome a una cai del conceyu; nel actu d'inauguración Rosendo declaró: «Nun puedo dicir namás que gracies. Estes coses namái pasen una vegada na vida, y si pasen. Siéntome avergoñáu, arguyosu y contentu».
"Cantares para normales y mero dementes" publicóse en 2001, ye un discu que, a pesar del endurecimientu del soníu, caltién el bon nivel de ventes consiguíu col direutu, y abre una nueva etapa que va refrendase col so siguiente álbum: "Veo, veo... mamoneo" (2002), tamién discu d'oru, en bona parte gracies al single "Masculino singular". En 2005 llanzóse "Lo malo es... ni darse cuenta", que podría considerase como componente d'una triloxía, al pie de los dos trabayos anteriores. Mentanto, en 2004, la so discográfica punxo a la venta "Salud y buenos alimentos", una caxa con dos CD recopilatorios, unu de rareces y un DVD con videoclips y un conciertu grabáu en Méxicu.
En 2006 recibió la Medaya d'Oru al Méritu nes Belles Artes.
El 29 de mayu de 2007 vio la lluz el so nuevu discu, "El endémico embustero y el incauto pertinaz", grabáu mientres los meses d'avientu de 2006 y xineru de 2007, y que consta de 11 temes. El soníu ye similar al que vien remanando nos sos últimos discos, magar se busca que les temes sían más lentos. El discu salió nuna caxa similar a los llibros del medievu.
En 2008 llánzase a percorrer España nuna xira al pie de Barricada y Aurora Beltrán (ex cantante de Tahúres Zurdos). La xira, conocida como "Otra noche sin dormir", arrincó'l 4 d'abril nel Velódromu d'Anoeta de San Sebastián, pa rematar el 26 de setiembre na plaza de toros de Las Ventas, en Madrid. Nesta xira aprovechó pa remembrar tolos sos grandes ésitos, tantu de la etapa con Leño, como en solitariu. El 2 d'avientu de 2008 llanzaríase por fin un pack con 2 DVD y un CD del conciertu de Las Ventas.
En 2010 pon a la venta "A veces cuesta llegar al estribillo", un discu con 11 nuevos cantares. A finales de 2011 llanza un conciertu grabáu meses enantes nel Palau de la Música de Barcelona, n'edición CD + DVD. Tamién pon a la venta una caxa que recueye tolos sos discos d'estudiu en solitariu (periodu 1985-2011), col agregu del propiu CD del Palau. Tres tres años ensin material nuevo, el 1 d'ochobre 2013 publicóse'l so décimoquinto álbum de estudio "Vergüenza torera". Y 4 años depués llegó a los mercaos De escalde y trinchera.
Discografía[editar | editar la fonte]
- Con Leño
- Leño (1979)
- Más madera (1980)
- ¡Corre, corre! (1982)
- En solitariu
- Loco por incordiar (1985)
- Fuera de lugar (1986)
- ... A las lombrices (1987)
- Jugar al gua (1988)
- Deja que les diga que no! (1991)
- La tortuga (1992)
- Para mal o para bien (1994)
- Listos para la reconversión (1996)
- A tientas y barrancas (1998)
- Canciones para normales y mero dementes (2001)
- Veo, veo... mamoneo!! (2002)
- Lo malo es... ni darse cuenta (2005)
- El endémico embustero y el incauto pertinaz (2007)
- A veces cuesta llegar al estribillo (2010)
- Vergüenza torera (2013)
- De escalde y trinchera (2017)
Referencies[editar | editar la fonte]
- ↑ Afirmao en: Google Freebase Data Dump. Editorial: Google.
- ↑ URL de la referencia: https://www.boe.es/boe/dias/2006/07/07/pdfs/A25545-25545.pdf. Data de consulta: 13 ochobre 2017.
- ↑ URL de la referencia: https://elpais.com/ccaa/2017/05/15/madrid/1494843006_241402.html. Data de consulta: 13 ochobre 2017.
Enllaces esternos[editar | editar la fonte]
Wikimedia Commons acueye conteníu multimedia sobre Rosendo Mercado 
.- Rosendo Mercado na Internet Movie Database (n'inglés)
- Rosendo Mercado en FilmAffinity (castellán)
