Roberto Canella

Roberto Canella Suárez (7 de febreru de 1988, Pola de Llaviana, Asturies, España) ye un futbolista español. Xuega de defensa na posición de lladral esquierdu y el so actual equipu ye'l Real Sporting de Xixón de la Primer División d'España.

Canella compitió nel fútbol base cola Asociación Cultural y Deportiva Alcava, na so La Pola Llaviana natal. Nesta mesma llocalidá tien el so allugamientu la peña sportinguista que lleva'l so nome, de recién creación y una de les más actives del equipu xixonés. Roberto Canella llegó d'esguín al Sporting y foi esguilando polos equipos de les categoríes inferiores hasta llegar al filial en 2005 y al primer equipu en 2006. Foi internacional coles selecciones sub-19, 20 y 21 nel so puestu de lladral maniegu. Y en la última campaña del Sporting en Primer División compitió mientres 2.032 minutos en 24 partíos. Una mancadura na parte final del campeonatu torgó-y ameyorar esos númberos. Roberto Canella llogró'l tercer premio Fútbol Draft na so edición de 2007, y al añu siguiente consiguió la plata. Na edición correspondiente a la tempoarada 2008/2009 ta escoyíu y ye el principal candidatu a faese col primer premiu, que lu reconocería como'l lladral maniegu más prometedor del panorama español. El 5 d'ochobre de 2008, marcó'l so primer gol na Primer División d'España, nun Mallorca 0 - 2 Sporting. Les sos bones actuaciones nel lladral esquierdu del Sporting fixeron qu'el Aston Villa afitárase nel futbolista llavianés nel mercáu inverniegu de la temporada 2008/2009. Anque na prensa circulaba la noticia d'una supuesta ufierta d'unos 11 millones d'euros, el Sporting negó tala cosa. El día 9 de Xineru del 2009, la prensa deportiva anunciaba l'interés del Real Madrid y el Real Zaragoza pol mozu llateral asturianu. El diariu The sun afirma, qu'el Wigan que dirixe Roberto Martínez, estaria interesáu, por una cifra al rededor de los 4.5 millones d'Euros.