Raleigh (Carolina del Norte)

De Uiquipedia
Saltar a: navegación, buscar
Bandera de Raleigh

Raleigh ye la capital del estáu de Carolina del Norte, nos Estaos Xuníos, y centru alministrativu del condáu de Wake. La ciudá, conocida tamién como la ciudá los carbayos (City of Oaks) pola gran cantidá d'ellos que tien, tenía una población estimao (U.S. Census Bureau, 2011) de 416.468 habitantes nos sos 299,3 km² d'estensión. Ye, poro, la 42ª mayor ciudá de los Estaos Xuníos, y una de les de mayor crecimientu, y recibe'l so nome por Walter Raleigh, que foi el qu'intentó crear el primer asentamientu no que ye anguaño Carolina del Norte a finales del sieglu XVI.

Capitoliu estatal de Carolina del Norte

La ciudá, una de les poques planeaes y construyíes específicamente col envís de que fuera la capital estatal, llevantose a partir de 1788 nuna zona anteriormente deshabitada. Llevantose siguiendo un planu axial, con cuatro places públiques arrodiando una plaza central y una trama urbana llendada poles cais qu'anguaño se llamen North, East, West and South Street. Acabada la so construcción, foi bautizada y fecha capital del estáu en payares de 1792.

Vista de Fayetteville St, nel downtown de Raleigh

La ciudá, qu'aparez regularmente nel top 10 de les ciudaes estaunidenses con meyor calidá de vida y más atractives pa facer negocios, forma parte del North Carolina's Research Triangle, ún de los más grandes y dinámicos parques empresariales del país. Destaquen, poro, les empreses d'investigación biotecnolóxica, electróniques, médiques y farmacéutiques como les más importantes de la ciudá. Esta ye, tamién, un importante centru de distribución de productos pa la fastera este del estáu. Pesie a ello, siguen siendo les instituciones estatales, les universidaes y los hospitales los qu'empleguen a un mayor númberu d'habitantes de Raleigh.

Enllaces esternos[editar | editar la fonte]