Radovan Karadzic
De Uiquipedia
Radovan Karadžić (19 de xunu de 1945, Petnjica, Montenegru), 64 años, ye un ex-políticu, psiquiatra, y poeta serbiu acusáu de crímenes de guerra.
En 1989 fundóu'l Partíu Democráticu Serbiu (SDS) na república yugoslava de Bosnia-Herzegovina col enfotu de protexere los intereses de los serbios énte la supuesta radicalización integrista de parte de la población musulmana.
Dirixó la República Serbia pente los años 1990 tres la cayía del comunismu en Yugoslavia.
Tabla de conteníos |
[editar] Supuestu criminal de Guerra
Radovan Karadzic ta acusáu pol Tribunal Penal Internacional de crímenes cometíos na guerra civil de Bosnia-Herzegovina, tales como la Masacre de Srebrenica.
[editar] Biografía
[editar] Vida temprana
Karadžic ñació en Petnjica cerca de Šavnik, Montenegru, Yugoslavia. So pá, Vuko, foi miembru de los Chetniks - Los restos del exércitu del Reinu de Yugoslavia. So pa ingresó na cárcele cuando Karadžic entá yera un neñu. Radovan Karadžic treslladose a Sarajevo, Bosnia y Herzegovina en 1960 pa continuar los sos estudios en psiquiatría y trabayar nel Hospital de Koševo. Nesta dómina fizo daqué de poesía y nótense les influyencies del escritor serbiu Dobrica Cosic, foi élli que lu afalagó pa dedicase a la política. Con 23 años asoleyó la so primer colleición poética, La llanza lloca. "Amiyemos a la ciudá, matemos a dalgún inútil": ye'l títulu d'un poema de Karadzic que data de 1971. En 1985 pasó 11 meses na cárcele por fraude.
[editar] Vida política
En 1989 foi cofundador del Partíu Democráticu de Serbia (Srpska Demokratska Stranka) en Bosnia-Herzegovina y dende él afalagó a recolleutar serbios de los países de la redolada pa la República de Serbia, siendo'l so oxetivu ensamar lo que se denomaba la Gran Serbia. El 24 d'ochobre de 1991 formóse una xunión de países, col envís de representar a los Serbios en Bosnia y Herzegovina. El partíu políticu serbiu que gobernaba en Bosnia y Herzegovina, llideráu por Radovan Karadžic, organizó la criación de "Provincies Autónomes de Serbia" (SAOs) en Bosnia y afitó una asamblea pa la so representación. En payares de 1991, los Serbios de Bosnia tovieren un referéndum y el so resultáu ufría una mayoría absoluta en favor de permanecer nún estáu en común con Serbia y Montenegru. El 9 de xineru de 1992 l'asamblea serbia proclamó la República de Bosnia y Herzegovina (Република српског народа Босне и Херцеговина / Republika srpskog naroda Bosne i Hercegovine). El 28 de febreru de 1992, foi adoutada la constitución de la República de Bosnia y Herzegovina na que declaraba que los territorios autónomos serbios, les municipalidaes y les entidaes étniques serbies en Bosnia y Herzegovina yeren baxo esta constitución parte del estáu federal de Yugoslavia.
El 29 de febreru y el 1 de marzu de 1992 celebróse un referéndum sobro la independencia de Bosnia y Herzegovina de la Yugoslavia. Los serbios boicotearon el referéndum mentantu que los Bosnios y los Croates, que representaben un 64% del total del votu, algamaren el resultáu final que foi d'un 98% en favor de la independencia. El 6 d'abril de 1992, Bosnia foi reconocida poles Naciones Xuníes como un estáu independiente. Karadžic entamó d'esta miente a ser el primer presidente de los Bosnios n'alministración serbia de Pale aprosimadamente el 13 de mayu de 1992 tres d'el colapsu de Yugoslavia. Al empar qu'asumía esti nuevu cargu, alquiría talo y como describe la constitución de l'alministración Serbo-Bosnia el mandu del exércitu en tiempos de guerra y paz, teniendo la capacidá de promocionar o de degradar a cualesquier oficial del exércitu.
Sicasí, continuando cola idega d'una Gran Serbia, Karadžic nun tuvo dubia n'alcontrar sofitu dientro d'aquellos países seguidores mayoritariamente de la fe Ortodoxa tales como Rusia y Grecia. En febreru de 1994, por exemplu, contautó en secretu col gobiernu griegu cola idega de criar una Confederación Greco-Serbia fundamentada na conocida amistá serbiogriega, una idega que Miloševic ya propunxo en 1992.
Exerció un control permanente sobro les cuatro cadarmes armaes qu'efeutuaben la llimpieza d'unes 41 rexones, más de la metada de l'antigua república yugoslava. L'Exércitu de la República Serbia, los paramilitares, la Defensa territorial y la Policía, a les órdenes de Karadzic, dedicáronse con tolos recursos posibles, a afarar con tola población que nun fuera serbio, ye dicir, cásique'l 50%
Ta acusáu d'haber ordenao la llimpieza étnico de bosnios y croates. En 1995 el Tribunal Penal Internacional pa la ex-Yugoslavia (TPIY) abrió una vista escontra Karadzic y la so mano drecha, el xeneral Ratko Mladic, inculpándolos por xenocidiu. Consiguió caltenese na presidencia hasta'l mes de xunetu de 1996, y en 1997, cuando les órdenes de captura escontra élli se multiplicaren y alquirieron un tono más amenazador, l'ex-psiquiatra fuxó. Foi deteníu el 21 de xunetu de 2008.
