Primera Guerra Carlista

De Uiquipedia
Saltar a: navegación, buscar
Batalla en Mendigorría.

La Primera Guerra Carlista foi una guerra civil que se desarrolló n'España ente 1833 y 1840 ente los partidarios del infante Carlos María Isidro de Borbón, conocíos como carlistes y d'un réxime absolutista, y los d'Sabela II, denominaos cristinos por sofitar a la rexente María Cristina de Borbón, cuyu gobiernu foi orixinalmente absolutista moderáu, y acabó convirtiéndose en lliberal p'algamar el sofitu popular.

Anicios[editar | editar la fonte]

L'infante Carlos María Isidro, autoproclamáu rei col nome de Carlos V.

La guerra planteóla Carlos María Isidro, hermanu de Fernando VII, pola cuestión sucesoria, yá que fuera l'herederu al tronu a lo llargo del reinaú del so hermanu Fernando VII, debío a qu'ésti, depués de tres matrimonios, carecía de descendencia. Pero'l nuevu matrimoniu del rei y l'embaranzu de la reina abren una nueva posibilidá de sucesión.

En marzu de 1830, seis meses antes del so nacimientu, el rei publica la Pragmática Sanción de Carlos IV aprobada poles Cortes de 1789, que dexaba ensin efectu'l Reglamentu de 10 de mayu de 1713 qu'escluía la sucesión femenina al tronu hasta agotar la descendencia masculina de Felipe V. Restablecíase asina'l derechu sucesoriu tradicional castellanu, recoyíu nes Partíes, nel que s'establecía que podíen acceder al tronu les fíes del rei difuntu en casu de morrer el monarca ensin fíos varones.

Magar too ello, Carlos María Isidro nun reconoció a Isabel como princesa d'Asturies y cuando Fernando morrió'l 29 de setiembre de 1833, Isabel, que sólo tenía tres años, foi proclamada reina baxo la rexencia de so madre, María Cristina de Borbón-Dos Sicilies. Carlos, nel Manifiestu d'Abrantes, caltuvo los sos derechos dinásticos, llevando al país a la Primera Guerra Carlista.

La cuestión dinástica nun foi la única razón de la guerra. Depués de la Guerra de la Independencia, Fernando abolió la Constitución de 1812, pero tres el Trieniu Lliberal (1820-1823), Fernando VII nun volvió a restaurar la Inquisición, y nos últimos años del so reináu permitió ciertes reformes p'atraer a los sectores lliberales, que pretendíen igualar las lleis y vezos en tol territoriu del reinu eliminando los fueros y les lleis particulares, al tiempu los sectores más conservadores axuntábense en torno al so hermanu Carlos, que sí reconocía los derechos forales.

Contendientes[editar | editar la fonte]

Zones militarmente carlistes y zones d'apoyu popular.

El campu y les pequeñes ciudaes del País Vascu y Navarra sofitaron mayoritariamente al pretendiente Carlos debido al so tradicionalismu, gracias al encontu que-y dio'l baxu cleru local. Munchos autores especularon cola posibilidá de que la causa carlista en nel País Vascu y Navarra fuese fundamentalmente foralista. Nun esiste consensu nesti análisis, puesto qu'otros autores refuguen esta interpretación, faciendo la principal razón del sofitu vasconavarru a la influencia del cleru na sociedá.

N'Aragón y Cataluña viose como una oportunidá de recuperar los sos derechos forales, perdíos depués de la Guerra de Sucesión Española. La xerarquía eclesiástica mantúvose ambigua, por más qu'una parte importante del cleru (como por exemplu'l famosu Cura Merino) se xuniera a los carlistes.

Nel otru bandu, los lliberales y moderaos xuniéronse p'apoyar a María Cristina y a la so fía Isabel. Controlaben les principales instituciones del Estáu, la mayoría del exércitu y toles ciudaes importantes. Les tropes d'Isabel nun son quien a resistir ensin un encontu esterior y los lliberales recibirán sofitu del Reinu Xuníu, Portugal y Francia en forma de créitos pal tesoru y de fuerces militares. Los británicos enviaron la Llexón Auxiliar Británica, cuerpu de voluntarios al mandu del xeneral George Lacy Evans, mientres que la Royal Navy facía funciones de bloquéu. Los portugueses enviaron una división auxiliar baxo'l mandu del Barón das Antas y el rei Lluis Felipe I de Francia la Llexón estranxera francesa arriendes de collaborar nel control de la frontera y de les costes españoles.

La guerra nel frente del norte[editar | editar la fonte]

Entamos[editar | editar la fonte]

Depués de la muerte de Fernando VII, el pretendiente Carlos nomó a Joaquín Abarca como ministru universal y fizo un llamamientu al exércitu y a les autoridaes pa que se sumaren a la so causa, pero con escasa repercusión. Internacionalmente sólo'l rei Miguel I de Portugal lu reconoció, lo que llevó a la rotura diplomática ente España y Portugal. Nos primeros díes d'ochobre sucediéronse les insurrecciones en varios puntos d'España, protagonizaes por agrupaciones locales de Voluntarios Realistes, en xeneral con poco éxitu, esceutu nel País Vascu, Navarra y Logroño, pero ensin llegar a controlar más que per pocu tiempu les ciudaes de dichos territorios.

Les sublevaciones nun tuvieron el sofitu del exércitu. Asina, el xeneral Ladrón de Cegama, ensin mandu en Valladolid (residencia de la Capitanía Xeneral de Castiella la Vieya), y el coronel Tomás de Zumalacárregui, retiráu pero viviendo na plaza fuerte de Pamplona, fuxeron de los sos llugares de residencia pa pronunciase ensin arrastrar consigo nenguna fuerza de les guarniciones de les places nes que s'atopaben. La guerra considérase como entamada cuando'l xeneral Ladrón de Cegama proclamó rei al infante don Carlos col nome de Carlos V el 6 d'ochobre de 1833 en Tricio (La Rioja), apoderándose colos voluntarios sublevaos de Logroño y pasando a Navarra a xunise colos sublevaos d'esta provincia. La xunión d'estos voluntarios en Navarra foi'l guañu de les tropes de les que se fizo cargu Tomás de Zumalacárregui y que ficieron posible que la guerra durase siete años. El xeneral Zumalacárregui asume la direición de los continxentes navarros el 15 de payares y de les tres provincies vasques tres selmanes depués, reactivando la rebelión del Norte.

Quesada - Zumalacárregui[editar | editar la fonte]

Les fuerces carlistes del norte quedaron centraes na figura de Tomás de Zumalacárregui, qu'organizó en pocu tiempu un exércitu carlista en Navarra, al que tamién se xunieron los carlistes vascos debilitaos depués de la espedición de Pedro Sarsfield.

Zumalacárregui equipó a los sos homes con armes tomaes a los exércitos cristinos nel campu de batalla o n'ataques contra fábricas o convois, y cosciente de la so inferioridá numbérica y armamentística reproduxo la táctica guerrillera que conocía dende la Guerra de la Independencia, amparándose no crespo del relieve y nel sofitu de gran parte de la población civil. El 7 d'avientu de 1833, les diputaciones de Vizcaya y d'Álava nomáronlu xefe de les tropes d'estes provincies. Bien popular ente los sos soldaos (llamábenlu "Tíu Tomás"), nun duldó en mostrase cruel na represión de los lliberales nin n'emplegar el terror pa caltener controláu'l territoriu, ganándose'l nomatu de Tigre de les Amescoas (Navarra).

Rodil - Zumalacárregui[editar | editar la fonte]

Demientres l'añu 1834 sucediéronse les victories carlistes n'importantes acciones, como l'asaltu a un convoi d'armes ente Logroño y Cenicero, les acciones d'Alegría d'Álava y Venta de Echavarri. Pero pa los carlistes l'añu acabó con una derrota na batalla de Mendaza y la prudente retirada na batalla d'Arquijas.

Espoz y Mina - Zumalacárregui[editar | editar la fonte]

Pero en marzu y abril de 1835, cola Acción de Larremiar contra Francisco Espoz y Mina, Zumalacárregui volvió participar con éxitu.

Valdés - Zumalacárregui[editar | editar la fonte]

Cola Acción d'Artaza contra Gerónimo Valdés, Zumalacárregui desfizo la tropa cristina que se vio obligada a desmantelar toles estratéxiques guarniciones (Maeztu, Alsasua, Elizondo, Santesteban, Urdax, ente otres), quedando como úniques guarniciones les de les capitales de les provincies vasques, Pamplona y dellos puertos de la costa. El gruesu del exércitu lliberal retiróse a la oriella sur del Ebro. Animáu polos sos éxitos militares y pola necesidá de conseguir financiación y reconocimientu internacional, el pretendiente ordenó-y tomar Bilbao, magar de la opinión contraria de Zumalacárregui, que prefería atacar Vitoria y dende allí abrise camín hacia Madrid. La operación entamó con éxitu, al abrise pasu hacia Bilbao al vencer al xeneral Espartero nel Puertu de Descarga, entamando a sitiar la capital vizcaína el 10 de xunu de 1835; pero feríu cuando observaba les operaciones, morrio'l 24 de xunu de 1835.

Fernández de Córdova - González Moreno[editar | editar la fonte]

Depués de la muerte de Zumalacárregui'l mandu recibiólu Vicente González Moreno, que llevantó'l sitiu de Bilbao ante l'aproximación de tropes lliberales al mandu de Luis Fernández de Córdova, que pocos díes depués, venciólu na batalla de Mendigorría.

Fernández de Córdova - Eguía[editar | editar la fonte]

N'ochobrede 1835 Nazario Eguía asumió'l puestu de xeneral en xefe de les tropes carlistes nel País Vascu y Navarra. A lo llargo del so mandatu l'exércitu carlista aumentó los sos efectivos hasta algamar los 36.000 homes y el so sucesor Bruno Villarreal, caracterizóse por fomentar les espediciones fuera del territoriu carlista.

Fernández de Córdova - Villarreal[editar | editar la fonte]

Bruno Villarreal caracterizóse por fomentar les espediciones fuera del territoriu carlista.

Espartero - Villarreal[editar | editar la fonte]

N'ochobre de 1836 tuvo llugar el segundu sitiu de Bilbao, que fracasó a los cinco díes y en payares un tercer intentu que duró mes y mediu y que fracasó ante la defensa de Baldomero Espartero. Esti fracasu provocó'l nomamientu de Sebastián Gabriel de Borbón y Braganza como xeneral en xefe de los carlistes. Esti xeneral enfrentaríase a les tropes lliberales en marzu de 1837, a les que vencería na batalla de Oriamendi. Nesi tiempu los sectores más radicales del carlismu ficiéronse col control políticu, un control qu'espoxigaría cola Espedición Real.

Espartero - Maroto[editar | editar la fonte]

Depués de la batalla de Peñacerrada, Juan Antonio Guergué, que se ficiera col mandu del exércitu, foi sustituyíu por Rafael Maroto, que reorganizó l'exércitu y mandó fusilar en febreru de 1839 a Guergué y a otros militares acusaos de conspirar en contra de so, al tiempu qu'intentaba conseguir del pretendiente la destitución de los sos adversarios, polo que foi destituyíu por Don Carlos, anque pocu tiempu depués foi restituyíu nel so puestu pol pretendiente, qu'accedió a les sos demandes.

Maroto negoció col gobiernu d'Isabel II ensin el sofitu del pretendiente y cola oposición de parte de les sos tropes y el 29 d'agostu de 1839 Espartero y los xenerales La Torre y Urbiztondo, representantes de Maroto, firmen el Conveniu d'Oñate que puso fin a la guerra nel norte d'España, confirmáu col conocíu como abrazu de Vergara ente Maroto y Espartero'l 31 d'agostu. El 14 de setiembre de 1839 el pretendiente carlista y les tropes que-y permanecíen fieles cruzaron la frontera francesa y la guerra terminó nel frente norte.

La Guerra n'Asturies[editar | editar la fonte]

Nun se pue falar de Guerra Carlista n'Asturies yá que'l carlismu nun foi quien más qu'a facer llevantamientos puntuales en delles zones, pero ensin amenazar el poder de los lliberales. Les partíes realistes, que proveníen del mundu rural, yeren afalaes fundamentalmente pol cleru y los nobles y conseguiríen el so mayor éxitu col llevantamientu en La Pola (Siero), nel añu 1822, consiguiendo un ciertu ecu en delles parroquies del conceyu pol mou nel que se taben vendiendo les propiedaes eclesiástiques. Con estos antecedentes, les autoridaes lliberales asturianes temíen que les insurreciones que tienen llugar en 1833 tuvieren seguimientu nel Principáu y por ello entamaron delles midíes preventives. Al pocu tiempu tendría llugar el llevantamientu del capitán de los Voluntarios Realistes de La Pola, Benito Escandón, que consiguió que'l pueblu s'amotinara, pero al pocu tiempu tuvo que fuxir al monte fracasáu'l llevantamientu. Tamién en La Pola (Ḷḷena) tuvo llugar una sublevación.

Pero mayor problema qu'estos llevantamientos causábenlos les partíes rurales, que torgaben los sorteos de reclutamientu y otres actividaes.

La simpatía del cleru y de dellos sectores de la población pola causa carlista, fizo que les autoridaes desterraren a delles persones d'ideariu tradicionalista. Munchos d'ellos pasaríen a formar parte del exércitu del Norte.

Ente los xefes de les partíes carlistes qu'operaron n'Asturies destacaron el capitán de caballería Francisco Suárez Baíña y el teniente del cuerpu de Voluntarios Realistes de Mieres, Bernardo Sánchez, asina como José Villanueva qu'entamaría les sos acciones nel conceyu de Llangréu, onde proclamaría a Carlos V.

Los lliberales sufrieron el golpe más fuerte en Llaviana onde la partida de Francisco Suárez Baíña consiguió rescatar a los presos carlistes de la cárcel. La muerte de Baíña tendría llugar en Morcín. Tamién el conceyu d'Ibias foi escenariu d'un llevantamientu carlista.

Magar too lo anterior nun hubo n'Asturies un llevantamientu que pudiere considerase xeneralizáu, lo que llevó a los carlistes a intentar introducir nel Principáu una fuerza espedicionario col envís de que'l pueblu se pronunciara a favor del pretendiente don Carlos y asina foi que en xineru de 1835, cuatrocientos carlistes al mandu de Flórez Collar y el Coronel Arroyo entamaron la espedición, a la qu'intentaríen resistir los lliberales en Colombres, pero la columna consiguió entrar n'Asturies y llegar hasta L'Infiestu, por más que tropes gubernamentales la obligaren a desviase a tierres de Palencia.

Pela parte ocidental d'Asturies los carlistes gallegos internáronse en delles ocasiones y llibraron combates más o menos intensos, unu d'ellos tuvo llugar nel conceyu d'Ibias, concretamente'l pueblu de Tablao.

Llegáu l'añu 1836, siguiendo idees de Zumalacárregui, caltrió pel Puertu de Tarna una columna al mandu del xeneral Gómez sofitada por guerrilleros asturianos. Llegaría a Uviéu y allí derrotaría a les fuerces del xeneral Pardiñas, a les que causaron notables baxes, y atopando un ciertu ecu de delles capes de la sociedá capitalina. Esta ocupación d'Uviéu nun duró más allá de tres díes y sería'l propiu xeneral Espartero'l que llegaría a la capital y espulsaría a los carlistes que fuxeron pel Puertu de Ḷḷeitariegos.