Pilar Varela Díaz

De Wikipedia
Pilar Varela Díaz
alcaldesa d'Avilés

2007 - 13 xunu 2015 - Mariví Monteserín
Vida
Nacimientu Llaranes25 de febreru de 1960 (64 años)
Nacionalidá España
Estudios
Llingües falaes castellanu
Oficiu política
Creencies
Partíu políticu Partíu Socialista Obreru Español
Cambiar los datos en Wikidata

Pilar Varela Díaz nacida n'Avilés l'añu 1960 foi l'Alcaldesa d'Avilés ente'l 2007 y el 2015

Biografía[editar | editar la fonte]

Pilar Varela nació'l 25 de febreru de 1960 en Llaranes Vieyu (Avilés). Ye diplomada en Maxisteriu y Llicenciada en Pedagoxía pola Universidá d'Uviéu. Afilióse al PSOE en 1997. Ente 1981 y 1987 asumió estremaes responsabilidaes na "Juventud Obrera Cristiana de España" (JOCE) n'Asturies y Cantabria, organización moza de la que foi presidenta estatal ente 1984 y 1987.

Ente 1987 y 1992 desendolcó estremaes xeres pa la Comisión Europea en rellación con iniciatives y programes de emplegu pa xovenes. Foi direutora de Formación en Ciudá Industrial Valle del Nalón (1992-1999). Nel añu 1999 forma parte de la candidatura local cola que'l PSOE algama l'Alcaldía d'Avilés.

Nel periodu 1999-2003 ye conceyal de Facienda y de Polítiques Actives d'Emplegu y nel periodu 2003-2007 Conceyal de Facienda y Promoción Económica. Arriendes d'esta responsabilidá ye miembro de la Comisión Executiva de la Fundación del Metal d'Asturies.

Tres de los comicios eleutorales del 27 de mayu, la so candidatura conviértese na más votada, ganando les eleiciones y enanchando'l númberu de conceyales del PSOE, convirtiéndose asina na primer alcaldesa d'Avilés socediendo nel cargu al tamién socialista Santiago Rodríguez Vega.

Trayeutoria[editar | editar la fonte]

Pilar Varela vivió nel barriu de Llaranes, onde s'allugaren so pá y so ma, d'orixe lucense, hasta los seis años. D'ellí treslladóse a Villalegre, motivu pol que cursó los sos estudios primarios na Escuela de Neñes de Doña Luz nel Altu Vidrieru, pa darréu facer el bachilleratu nel Institutu de La Luz. En 1978 entamó estudios de Maxisteriu na Universidá d'Uviéu que completó depués cola Llicenciatura en Pedagoxía. Demientres esa etapa universitaria, foi elixida en 1982 p'asumir la direición de la JOC pa la zona d'Asturies y Cantabria y en 1984 Presidenta de la JOC d'España, polo que se tresllada a vivir a Madrid pa formar parte del equipu estatal, asumiendo la direición de les rellaciones de la JOC d'España cola JOC europea y internacional. Nesti tiempu, la JOC ye llegalizada pol Ministeriu del Interior español como una organización autónoma, frañendo con ello la so venceya xurídica cola xerarquía de la Ilesia católica.

En Madrid, xunto a otros economistes, abogaos, pedagogos y sociólogos mozos, creó en 1988 la "Cooperativa Proempleo de Madrid" de la que formó parte como socia trabayadora. Dende esa Cooperativa punxo en funcionamientu dellos programes d'emplegu empobinaos a la mocedá. Crearon cooperatives agroalimentaries, proyeutos d'autoconstrucción de viviendes o la creación d'empreses d'inxerción llaboral de mozos. Amás, ocupóse tamién d'afalar una iniciativa pionera pa facilitar l'accesu a la vivienda, al traviés de la que se xestiona l'alloguer de cientos de viviendes.

Toes estes esperiencies nel campu de les polítiques actives llevó-y a Pilar a participar ente los años 1989 y 1990 nun grupu d'espertos de los doce países qu'entós formáben parte de la Comunidá Europea pa proponer esperiencies y programes piloto de formación y emplegu pa la mocedá, propuestes que tuvieron reflexu depués en iniciatives europees como los programes Equal, Horizont, etc.

En 1992, Pilar Varela regresó a Asturias y a Avilés, au tenién-y ofrecíu participar na gestión de lo que güei ye'l centru Valnalón, el polígonu de les antigües instalaciones siderúrxiques de La Felguera. Baxo la so xestión púnxose en marcha un centru d'empreses, un centru de formación profesional, una escuela d'hostelería, y otres actuaciones empobinaes a la formación d'emprendedores y la creación del "pebidal d'empreses".

Involucróse tamién col coleutivu feminista venceyáu al PSOE "Mujeres Progresistas", onde intensificó la so rellación con militantes socialites. Esti fechu, llevó-y entós a comprometese políticamente col PSOE.

Llabor como conceyal[editar | editar la fonte]

Foi Santiago Rodríguez Vega (PSOE), anterior alcalde d'Avilés, quien ufrió a Pilar participar na candidatura cola que'l PSOE volvió ganar l'Alcaldía d'Avilés en 1999. Participó en dos llexislatures como conceyal de Facienda y de Polítiques Actives d'Empleu, y previamente como responsable de turismu, comerciu y feries.

Tres de les eleiciones de 2007, Pilar Varela ye la primer alcaldesa de la historia d'Avilés.


Predecesor:
Santiago Rodríguez Vega

Alcaldesa d'Avilés

2007- 2015
Socesor:
Mariví Monteserín
Predecesor:
Graciela Blanco
(Bienestar Social)

Conseyera de Servicios y Derechos
Sociales del Principáu d'Asturies

2015-anguaño
Socesor:
Nel cargu

Ver tamién[editar | editar la fonte]

Referencies[editar | editar la fonte]

Enllaces esternos[editar | editar la fonte]

  • PSOE Avilés, Páxina del PSOE d'Avilés, con información sobre Pilar Varela.