Pete Postlethwaite
Peter «Pete» William Postlethwaite, Oficial del Imperiu Británicu (Warrington, Cheshire, Inglaterra, 16 de febreru de 1946 – Shropshire, Inglaterra, 2 de xineru de 2011), foi un actor británicu.
Índiz |
Biografía [editar]
Nació en Warrington, Cheshire (Inglaterra), siendo'l cuartu fíu de Mary (Geraldine de soltera) y William Postlethwaite. Formóse nel St. Mary's University College, en Londres, y demientres un tiempu pensó en convertise en sacerdote. Finalmente dedicóse a la educación, antes de decidise polos escenarios en la Bristol Old Vic Theatre School.
Postlethwaite entamó la so carrera nel Everyman Theatre, xunto a Bill Nighy, Jonathan Pryce, Sher Antonio y Julie Walters, cola que tuvo un romance a lo llargo de la segunda mitá de la década de los setenta.[1]
Trabayó habitualmente como actor teatral, destacando'l so papel protagonista na obra Scaramouche Jones. Trabayó igualmente cola compañía británica Royal Shakespeare Company y n'obres como El suañu d'una nueche de branu o Every Man and His Humour.
Dióse a conocer internacionalmente en 1993 al interpretar a Giuseppe Conlon na película En el nombre del padre, de Jim Sheridan. Por esti trabayu foi candidatu a un Óscar al meyor actor de repartu. La película, nominada tamién al Óscar a la meyor película, ta basada nos casos de los Cuatro de Guildford y los Siete de Maguire.
Steven Spielberg describiólu como «el meyor actor del mundu» depués de trabayar con él en El mundo perdido: Parque Jurásico II y Amistad, dambes en 1997. Tamién participó en películes como The Usual Suspects (1995) y Romeo + Julieta (1996).
Ente les sos últimes películes destaquen Solomon Kane (2009), Inception (2010), The Town (2010) o Furia de titanes (2010), remake de la película de 1981 del mismo nombre.
En 2004 nomáronlu oficial de la Orden del Imperiu Británico, y en 2006 foi nomáu Doctor honoris causa de la Universidá de Liverpool.
En 2008 protagonizó la película, en clave de documental, The Age of Stupid. Trata sobre'l calentamientu global antropoxénicu a través d'un drama con elementos documentales y dellos dibuxos humorísticos. Postlethwaite fizo'l papel d'un vieyu que vive nel mundu arruináu del añu 2055. Observa los reportaxes del dañu causáu poles aciones humanes y plantéase la entruga: «¿por qué tener fecho nada pa evitalo?».
Premios [editar]
| Añu | Premiu | Categoría | Trabayu | Resultáu |
|---|---|---|---|---|
| 1993 | Premios Óscar | Meyor actor de repartu | En el nombre del padre | Candidatu |
| 1994 | Premios BAFTA | Meyor actor de televisión | Martin Chuzzlewit | Candidatu |
| 1995 | National Board of Review Awards | Meyor repartu | The Usual Suspects | Ganador |
| 1997 | Premios Saturn | Meyor actor de repartu | El mundo perdido: Parque Jurásico II | Candidatu |
| 1999 | Premios BAFTA | Meyor actor de televisión | Lost for Words | Candidatu |
| 2000 | Premios BAFTA | Meyor actor de televisión | The Sins | Candidatu |
| 2002 | Premios TMA (Theatrical Management Association) | Meyor actor | Scaramouche Jones | Candidatu |
| 2003 | Theatregoers' Choice Awards | Meyor interpretación en solitario | Scaramouche Jones | Ganador |
| 2010 | Washington DC Area Film Critics Association Awards | Meyor repartu | Inception | Candidatu |
| The Town | Ganador | |||
| 2011 | Broadcast Film Critics Association Awards | Meyor repartu | The Town | Candidatu |
Referencies [editar]
Enllaces esternos [editar]
Wikimedia Commons acueye conteníu multimedia sobro Pete Postlethwaite.
