Pedro Díaz de Valdés

Pedro Díaz de Valdés
Vida
Nacimientu	Xixón, 1762
Nacionalidá	España
Muerte	Santiagu, 1826 (63/64 años)
Estudios
Llingües falaes	castellanu
Oficiu	funcionariu

Pedro Díaz de Valdés Argüelles y Galán (1762, Xixón – 1826, Santiagu) foi un altu funcionariu d'España en Chile.

Yera fíu de José Díaz de Valdés Argüelles (Xixón), y Mª Francisca Galán Reconco (Avilés). Descendía, per llinia paterna, d'una familia de comerciantes. So tíu, Pedro Díaz de Valdés Argüelles (Xixón, 1740 - Barcelona, 1807), que foi otru de los importantes ilustraos asturianos, foi determinante na decisión de que Pedro estudiase Lleis na Universidá d'Uviéu, llicenciándose en Cánones en 1786. Darréu asitióse en Madrid.

Les amistaes de so tíu (Campomanes y Xovellanos) ficieron posible qu'en 1799 fuere nomáu Asesor de la Capitanía Xeneral y Presidencial del Reinu de Chile. La so llegada a esti país coincide col afitamientu de la burguesía local.

N'abril de 1800 tomó posesión del so cargu d'Asesor. Ellí conoció a Javiera Carrera, cola que se casaría y tendría cinco fíos.

En 1801, Luis Muñoz de Guzmán sería nomáu Gobernador de Chile y Pedro gozaría de la so confianza hasta la muerte d'áquel en 1808. Esta dómina foi un tiempu de tensiones que finaría cola independencia. El socesor de Luis Muñoz, Francisco Antonio García Carrasco, persiguió a Pedro Díaz de Valdés pola posición de la so familia política, favorable a les tesis criolles. N'abril de 1809 foi sustituyíu del so cargu, entamando una riestra procesos que terminen col abandonu de Santiago rumbu a Buenos Aires.

Durante la etapa de gobiernu por parte del so cuñáu golpista, José Miguel de la Carrera, Pedro Díaz de Valdés nun s'aprovechó del so parentescu y siguió fiel a la causa española, renunciando a la ufierta de la nacionalidá chilena.

La Xunta de Gobiernu de Chile terminó por separtalu del so cargu de Contable Mayor por Decretu de 11 de marzu de 1814. Y tovía tendría que soportar hasta la so muerte, que tuvo llugar na metá de la segunda década del sieglu XIX, la cayida en desgracia de la familia de la so muyer.

Referencies[editar | editar la fonte]

Enllaces esternos[editar | editar la fonte]

Plantía:1762