Sardina pilchardus

De Wikipedia
(Redirixío dende Parrocha)
Sardina pilchardus
sardina
Clasificación científica
Reinu: Animalia
Filu: Chordata
Clas: Actinopterygii
Orde: Clupeiformes
Familia: Clupeidae
Xéneru: Sardina
Antipa, 1904
Especie: S. pilchardus
Walbaum, 1792
Sinonimia
  • Clupea pilchardus Bloch, 1795
  • Clupea pilchardus Walbaum, 1792
Consultes
[editar datos en Wikidata]

La sardina[1] (Sardina pilchardus) ye una especie de pez clupeiforme de la familia Clupeidae.[2] Ye la única especie del so xéneru.[2] Ta estrechamente emparentada colos bocartes y arenques. Les sardines pequeñes, n'Asturies conócense col nome de "parrocha".

Diagnosis[editar | editar la fonte]

El cuerpu ye allargáu, non mui estruyíu. El quexal cimeru ye pocu o nada escotáu. Maxilares nun van más allá de la parte media del güeyu. El güeyu tien un párpagu adiposu bien desendolcáu. Los dientes son pequeños o nulos. L'aleta dorsal naz más cerca de la cara que de la base del caudal. Les pelvianes ensertaes en posición abdominal (metanes la zona ventral, so la dorsal). L'opérculu tien unes estríes radiaes.

Color[editar | editar la fonte]

El dorsu ye de color gris escuru, azul y plateáu y a lo llargo de los lladrales presenta una banda azulada. El banduyu ye blancu platiáu. Les aletes son incolores, menos la dorsal, que ta un pocu escurecida.

Otres carauterístiques esternes[editar | editar la fonte]

Les escames son caedices y cicloidees (ensin espinines visibles a la llupa). Tolos radios son blandos. Presenta de 26 a 30 series d'escames visibles na llinia llonxitudinal máxima. Presenta branquiespines na parte interna de les branquies, que son allongamientos que sirven pa retener los pequeños organismos de los que s'alimenta.

Diferencies con especies cercanes[editar | editar la fonte]

La sardina europea forma delles races xeográfiques qu'algamen distintu tamañu y edá, dependiendo del área nel que vivan. D'especies como l'arencón (Alosa alosa) estrémase na posición de les aletes pélviques, el númberu d'escames o'l tamañu de la boca. De la trancha Sprattus sprattus estrémase porque ésti tien l'opérculu llisu.

Bioloxía[editar | editar la fonte]

Estaya de vida[editar | editar la fonte]

Ye una especie peláxica que vive sobre la plataforma, averándose más a la mariña na dómina de reproducción, pel hibiernu vanse a zones cercanes a la turria continental, de fondos d'unos 150 m.

Alimentación[editar | editar la fonte]

Aliméntase de plancton que peñera per mediu de les branquiespines que presenta especialmente'l primer arcu branquial. Delles vegaes asítiense frente a la corriente y van faciendo pasar l'agua hasta les branquies; otra forma ye nadando viviegamente. Cuando les sardines s'alimenten, suelen desorganizar los bálamos que formen.

Triba de puesta[editar | editar la fonte]

Peláxica con emisión al mediu de los productos sexuales.

Vezos[editar | editar la fonte]

Axúntense en grandes bálamos. Los güevos permanecen formando parte del plancton una o dos selmanes (depende de la temperatura); tienen un diámetru de 1,5 mm y tienen gota de grasa. Cada fema pon ente 50.000 y 60.000 güevos. Les careses tamién son planctóniques un periodu más llargu de tiempu. Pasu ente pasu van abandonando la vida planctónica pa pasar a vezos nectónicos, nesti casu tamién peláxicos.

Edá y tamañu máximu[editar | editar la fonte]

Pueden vivir hasta 8 años y algamar unos 25 cm, siendo les de races d'agües fríes les más grandes y llonxeves.

Migraciones[editar | editar la fonte]

Son pexes gregarios por excelencia y que realiza importantes desplazamientos. En primavera avérase a la zona más costera y superficial y cuando lleguen les agües fríes allóñase y funde. Nel pasáu describiéronse importantes migraciones que güei nun se reconocen; pensábase que les sardines nacíes nel Cantábricu buscaben agües fríes, llegando hasta les mariñes franceses y la Canal de la Mancha, volviendo reproducise al Cantábricu. Güei sábese que les sardines van apaeciendo en superficie (xubiendo dende agües más fondes) en función del calentamientu d'agua, empezando pel sur del Golfu de Bizcaia (Cantábricu), mariñes franceses escontra'l Norte y, finalmente, pel branu nel sur de les Islles Britániques, dando la sensación d'una migración de Sur a Norte.

Formes de vida[editar | editar la fonte]

Axúntense en cardúmenes o bálamos abondo numberosos, de normal constituyíos por delles clases d'edá.

Ver tamién[editar | editar la fonte]

  • Sardines en llata

Referencies[editar | editar la fonte]

Enllaces esternos[editar | editar la fonte]