Parque Natural de Redes

Parque Natural de Redes
Situación
País	España
Autonomía	Principáu d'Asturies
Tipu	área protexida
Coordenaes	43°11′N 5°23′W / 43.19°N 5.38°O
	Parque Natural de Redes Parque Natural de Redes (Asturies)
Datos
Superficie	377,36 km² y 37 702,0485 ha
	Web oficial

Redes ye, dende 1996, un parque natural allugáu nel centru-oriente del monte asturiano y compartío polos conceyos de Casu (308 km²) y Sobrescobiu (68 km²). En setiembre de 2001 foi declaráu Reserva la biosfera pola UNESCO, magar que tamién gocia de les siguientes figures d'abeyu:

Clima[editar | editar la fonte]

Dientro la rexón Eurosiberiana, la mayor parte Redes allúgase na provincia Orocantábrica, magar que les estayes más baxes pertenecen a la Cantabro-Atlántica. L'altor y l'abondosa pluviosidá (1.300 milímetros de media) fai que l'ambiente seya abeyosu (81% de permediu d'homidancia) demientres tol añu, con temperos seles pa por primavera o branu y muy friyos n'iviernu.

Flora[editar | editar la fonte]

La faya ye l'árbole más representativu'l parque, ocupando cuasi un cuartu'l mesmu. Son importantes, en cuantes a estensión, les mates de Moniacos, Llaímu, Castrillón, La Salguerosa, Valleseru y Sapéu. Por mor de la mestura de la ramascaya, so sotoviesca ta malpenes espoxigada. Mécese, de cutio, con delles tribes d'árboles, como la texa de fueya grande o la de fueya pequeña, alcafresnes, pláganos, xardones, texos, abedugos celtibéricos o mostayales, asina como con bardiales como son la Daphne laureola o la Vaccinium myrtillus, y tamién mumberoses herbácies como la Carex sylvatca, Helleborus viridis, Scilla lilio-hyacinthus, Melica uniflora, Luzula sylbatica y la Saxifraga spathularis.

Amiyando n'altor, espoxíguense viesques de la triba de los Quercus, como son el carbayu, el rebollu y l'albar, acompañaos por llameres, ablanales, castañales, cirgüeyos, cornexos, espineres o endrines, y nos sotos y arriegos alcuéntense umeres, salgueres, etc...

Los bardiales tán formaos por piornales, escobonales, gabuyes, delles subtribes d'argañes y l'escasu Isoetes asturicense.

Fauna[editar | editar la fonte]

Mamíferos

El robezu cantábricu ye l'animal simbólicu'l parque, recordando l'antigua actividá cinexética de los antiguos cotos que formaron el parque d'anguaño, cuando malpenes quedaben 60 exemplares en 1943, pasando a 3.000 en 1974 tres una ralura de veda y otra de caza controlada. Otres especies cinexétiques son el corciu, el venáu (reintroducíu en 1952), el gochu xabaz, la llebre europea y la de piornal. Los carnívoros más importantes son; l'osu, l'ablaidu, el raposu, l'algaire, el turón, la fuina, la lliria, la xineta, el melandru, la llóndriga, etc... Magar que tamién tan; el desmán pirenaicu, musgañu paticandu, l'esperteyu de cueves, grande y común, tamién l'esguil o'l llirón buxu.

Aves

Hai un colmiellu d'aves abondo importante, pues de les 141 tribes adicaes, alredor de 110 nialen dientro Redes.

Ente la mestura pueden atopase; el gallu montés, la piquetina, el picafayes, el picapinos o'l picaniellu. Delles rapaces como l'aigla rial, la zapiquera, el palomberu y el ferre. Les rapaces nuecherniegues tan representaes pola cubata, la coruxa, el miagón, el coruxón, la tubeca o'l coruxín. Tamién son abundantes; la pardina, la cueita, el verderríos, l'aguanieves y la mobeya, la garcia rial o el coríu azulón ente les acuátiques.

Reptiles

Puédense atopar; el Llagartu verdiprietu y verde, llanciertes serrana y de turbera, la víbora de seoane, el colobrón, la culiebra meriodional y europea, etc..

Anfibios

Figuren; el mexafontes alpín, xaro ya iberico, la sacavera común asina como'l sapu común y les xaronques común y verde

Pexes

Ye perarrume la trucha común nos rigos y banzaos del parque, anque l'anguila y el salmón atlánticu tienen menor presencia. Otres tribes como la trucha arco-iris o'l piscardu introduxéronse por mor de les piscifactoríes o'l remane de xarria vivo de los pescadores.

Historia[editar | editar la fonte]

La estaya suroesti'l parque yera'l Cotu l'afamáo Pepe Argüelles, el duchu caciador que nos años trenta cobróse al caberu bardión llegalmenti caciáu na Peña de los Cabrones. Tres la Guerra Civil la fauna afayábase afarta desaniciada, poro, al tresuel de la Orden de 28 de xunetu de 1941, prohibióse por dos años la cacia n'Amieva, Casu, Ponga, Piloña, Onís y Cangues d'Onís, enanchándose la prohibición por Orden de 20 d'ochobre del mesmu añu. Dos años dempués, en 1943, permítese la cacia al tresuel de la llei de 4 de setiembre de 1943, na que, amás, crea cotos especiales de cacia y que, al escoyer como cotu nacional al fayéu de Redes, hebo un enquivocu y, nel Boletín Oficial de l'Estáu púnxose Reres, popularizándose pola gran sonadía'l cotu. En 1945 piésllase'l cotu por 14 años por mor de l'escasu múmberu de robezos y corcios. Los cotos creaos pola llei de 1943 (Moniacos-Semeldón, Pouropinto-Fresnedal , Caliao, Sobrescobiu, Moniello, Saoya, Llagador y Piedrafita y el de Pandemules) taben xestionaos por particulares o pola Sociedá Astur de Cacia, pero en 1983 el Gobiernu rexonal fízose colos cotos de Moniacos y Pouropinto. En 1991 promúlgase la llei del Principáu d'Asturies númberu 5, de 5 d'abril, de Poteición de los Espacios Naturales, aprovándose, pol Drecretu 38/1994, de 19 de mayu, el Plan d'Ordenación de los Recursos Naturales d'Asturies. El PORNA aconseya y propón la declaración de parque natural, presentando tamién les sos llendes xeográficos. Al cabo, la llei 8/1996, de 27 d'avientu, declara el Parque Natural de Redes.

Rutes o gulipos[editar | editar la fonte]

Bibliografía[editar | editar la fonte]

Luis Mario Arce, "Guía de los espacios naturales de Asturias". Ediciones TREA, S.L.ISBN 84-89427-57-7.
Luis Frechilla García y Fernando Fernñandez Álvarez, "Por la naturaleza asturiana".Editoria Edilesa. ISBN 84-8012-217-X.
Fernando Montes, "Fauna asturiana".Editorial Picu Urrielu. ISBN 84-932070-8-X
Manuel Quintana, "Parque Natural de Redes (Caso y Sobrescobio). El viajero independiente. Ediciones Júcar. ISBN 84-334-1490-9

Referencies[editar | editar la fonte]

↑ Afirmao en: Inventario de áreas designadas nacionalmente. Data de consulta: 26 xunu 2021. Llingua de la obra o nome: inglés.

Enllaces esternos[editar | editar la fonte]

[2b0b0a0a111fb94791a26090a9935424c25bab3a-1] Afirmao en: Inventario de áreas designadas nacionalmente. Data de consulta: 26 xunu 2021. Llingua de la obra o nome: inglés.

[1]