Panasturianismu
El panasturianismu ye una corriente de pensamientu minoritaria nacionalista y ensin espeyu políticu dalu que defende qu'Asturies forme un estáu independiente en tol so ámbetu llingüisticu xunto al denomáu País Llionés, Cantabria y, en delles ocasiones, Miranda l Douro. Poro, defende qu'Asturies ye un país en confliutu col estáu español y portugues.
Esta ideoloxía ta marcada pola poca veracidá hestórica de les sos xustificaciones espansionistes, sofitándose na "vieya Asturia" a la que se-y da 3.000 años d'hestoria y calter nacional como xunión de tolos ástures. El nome que se propón davezu ye País Astur.
La ideoloxía, como fía de la corriente mayoritaria na que ta enxerta, el nacionalismu asturianu, ye de recién creación y anque anguaño non, tuvo nun pasáu sofitu. Sicasí, el panasturianismu presenta delles variantes, como son les de refugu de la incluxón de Cantabria o mesmo, les que consideren al mirandés una llingua hermana pero que frañó la so xuntura col restu del tueru llingüísticu asturllionés.
Históricamente los partíos nacionalistes asturianos tienen defendío la inclusión de los territorios llendantes con cultura asturiana. Inclusu'l Partíu Asturianista plantegó ésta iniciativa na Xunta Xeneral del Principáu d'Asturies a entamos de la década de los años 90 del sieglu XX. Partíu políticu, qu'amás, tuvo un conceyal nuna llexislatura nel municipiu llionés d'Oseya de Sayambre.
Suel presentase como'l llau opuestu al localismu de dellos seutores igual de minoritarios que non sólo nun defenden una xunión política, sinón que mesmamente ñeguen la xunidá de la llingua.
[editar] Simboloxía
La simboloxía del panasturianismu ye variada y diversa, y carauterízase bien pol emplegu d'elementos de les banderes de los países que formaríen la nación pan-astur (Asturies y Llión, o bien por versiones de la vieya bandera blanca cola cruz de San Xurde, que foi la primer bandera emplegada pol vieyu Reinu asturllionés.
