Organización Mundial de Xóvenes Esperantistes

De Uiquipedia
Saltar a: navegación, buscar

La Organización Mundial de Xóvenes Esperantistes (n'esperanto Tutmonda Esperantista Junulara Organizo, TEJO) ye una organización pa los falantes xóvenes de la llingua internacional (hasta los 29 años). L'organización tien miembros individuales y seiciones nacionales, anguaño tien 46 seiciones y otres 13 coles que TEJO tien contautu pero nun son miembros. La mesma TEJO ye la seición xuvenil de l'Asociación Universal d'Esperanto.

TEJO organiza'l Congresu Internacional Xuvenil (IJK), tolos años en diferentes llugares nel mundiu. El congresu ye d'una selmana y tien conciertos, presentaciones, escursiones, y diferentes actividaes pa xóvenes de tol mundiu. TEJO tamién organiza seminarios pa xóvenes tolos años. Estos seminarios axunta grupos internacionales de xóvenes pa discutir temes d'actualidá.

Al traviés d'UEA, TEJO espubliza la revista Kontakto, que contién l'editorial TEJO tutmonde sobre'l movimientu esperantista xuvenil, y tamién la gaceta informativa n'Internet TEJO-aktuale. Kontakto ye una revista sociocultural, que mira polos llectores xóvenes asina como por principiantes na llingua, contién artículos sobre temes d'interés xeneral pa los xóvenes y nun estilu llingüísticu fácil de comprender.

TEJO tamién alministra Pasporta Servo, una rede de falantes d'esperanto que reciben nes sos viviendes ensin costu otros falantes de la llingua.

Hestoria[editar | editar la fonte]

Yá enantes de TEJO esistieron iniciatives d'organizaciones pa la xuventú esperantista. Nos años 1920 esistió la Tutmonda Esperanto-Junulara Asocio (Asociación Mundial de Esperanto-xóvenes), otres organizaciones foron Esperantista Junularo (Xuventú Esperantista) y Esperanto-Junularo (Esperanto-Xuventú).

TEJO entamó como un grupu de profesores d'esperanto na so mayoría. Dos profesores holandeses, Elisabeth van Veenendaal y el so esposu, organizaron un alcuentru en 1938 en Groet, Países Baxos, pa neños falantes d'esperanto de 10 países. Nesi alcuentru ñaz TJO, Tutmonda Junular-Organizo, colos oxetivos d'esparder l'esperanto, organizar alcuentros internacionales y trabayar pol Esperanto nes escueles.

Sin embargu, TJO sufrió un paru pola Segunda Guerra Mundial, y nun se reactivó hasta 1945, cuando se volvió a espublizar la so gaceta La Juna Vivo (La vida xoven) y s'organizó'l Congresu Internacional Xuvenil n'Ipswich, Gran Bretaña, en 1947.

Pronto, TJO fíxose más una organización xuvenil cuando más xóvenes comenzaron conformar les xuntes direutives, en 1951 la xunta de TJO taba conformada toa por xóvenes y en 1952 l'organización camudó'l so nome pol Tutmonda Esperantista Junulara Organizo. En 1956 TEJO fíxose la seición xuvenil d'UEA, y en 1971 les finances y alministración de TEJO integráronse plenamente n'UEA.

Enllaces esternos[editar | editar la fonte]