Nava

De Uiquipedia
Saltar a: navegación, buscar
Nava
Bandera de Nava Escudu de Nava
Bandera de Nava Escudu de Nava
Mapa:
Nava Asturies map.svg
Asturies
Nome en castellanu Nava
Xentiliciu Navetu, -a, -o.
Comunidá autónoma Bandera d'Asturies Asturies
Estáu Flag of Spain.svg España
Capital Nava
Coordenaes 43°20′44.88″ N, 5°29′38.4″ W
Partíu xudicial Piloña
Parroquies 6
Población (2010)
 -Habitantes
 -Densidá
 -% d'Asturies
Puestu: 30
5.635 habitantes
58,39 hab/km²
0,50 %
Superficie
 -Total
 -% d'Asturies
Puestu: 37
95,81 km²
0,90 %
Mayor altitú La Triguera, 1.293 m
Códigu postal 33520
Alcalde Emilio Ballesteros Baños (APN)
http://www.ayto-nava.es/
Ayuntamientu de Nava.

Nava ye un conceyu d'Asturies, asina como una parroquia d'ésti, y una villa de dicha parroquia. La villa de Nava ye la capital del conceyu.

El conceyu cuntaba con una población de 5597 habitantes (INE, 2011). Llenda'l norte con Sariegu, Villaviciosa y Cabranes, al sur con Llaviana, al este con Piloña y al oeste con Bimenes y Siero.

Na so capital alcuéntrase'l Muséu de la Sidra. Dende 1969 celébrase tolos años ellí'l Festival de la Sidra de Nava que dio muncha sonadía al conceyu.

Etimoloxía[editar | editar la fonte]

Etimolóxicamente Nava quier dicir “tierra baxo y llano” asitiao xeneralmente “ente montes”, yá qu'asina s'atopa.

Historia[editar | editar la fonte]

Prehistoria y época romana[editar | editar la fonte]

Los sos primeros afayos son del Paleolíticu con restos de materiales llíticos alcontraos al aire llibre. Atopáronse también un túmbulu aislláu nesta zona, concretamente en Paraes, siendo ésti l'únicu catalogáu, anque apaecieron más pero tán ensin datar. Tamién han apaecieron brueses de bronce en Purnea, dos d'aniellu doblu, una con un solu asa y otra con calcañu pero ensin aniellos. La so cultura castreña ta bien representada por trés castros. La Cogolla en Cesa, El Castiellu de Salas en La Polenava y La Forca en Viobes, aprucieron otros restos que nun fueron siquiamente escavaos. Los sos restos romanos nun son de gran abundancia, son restos numismáticos y de cerámica.

Edá media y moderna[editar | editar la fonte]

De la so época medieval y nes sos primeres datess, sabemos qu'había unes tierres denominaes Nava. Sedrá alredor del sieglu XII, cuando empezamos a alcontrar documentación sobro unes donaciones qu'incluyíen un llugar llamáu Salas de Nauna. Tamién alcontramos noticies sobro un monesteriu de San Bartolomé. Pel sieglu XIII yá apaecen señoríos llaicos con influyencia nesta zona, como la Casa de Noreña y tamién influyencia relicosa como la illesia d'Uviéu, el monesteriu de San Vicente y San Bartolomé de Nava qu'estenderán les sos influyencies non solo per esti conceyu, sinón pelos vecinos, esti monesteriu foi mui favorecíu pola casa de Noreña. Foi Alfonso X el que funda la pola de Nava a la que dota col fueru de Benavente colos privilexos d'un mercáu selmanal y otros beneficios convirtiéndose nel principal noyu económicu y alministrativu. Esta pola de Nava nun algamó'l so oxetivu, en parte debío a la influyencia monástica de San Bartolomé. Esti conceyu pasa per diferentes manes, la casa de Noreña, al conde de Trastamara futuru Enrique II, que-y la cederá a so fíu bastardu'l conde don Alfonso que tuvo continues rebeldíes escontra la corona, hasta la so derrota que significó'l regresu d'estes tierres a la corona.

Nel sieglu XV hai una familia qu'entama a destacar, la Casa de Nava que tendrá continuos enfrentamientos con otres Cases pa obtener la so hexemonía sobre estes tierres. Los monesterios de San Bartolomé de Nava y Santa María de Villamayor son anexonaos pol monesteriu de San Pelayu d'Uviéu. Hebo diferentes focos de llucha ente'l cotu eclesiásticu y la Casa de Nava, siendo'l propiu correxidor el que punxera frenu a estos enfrentamientos, anque los problemes continuaron pelos sieglos siguientes.

Nel sieglu XVIII, había namái dos cotos, el de San Bartolomé y el cotu de Nava. Hai que destacar les dures condiciones de vida nesta época, reflexaos nos episodios epidémicos qu'afeutaron al conceyu.

Sieglu XIX endelantre[editar | editar la fonte]

Nel sieglu XIX, la Guerra Peninsular tuvo una incidencia llocal. Nes guerres carlistes destaca l'ataque a Nava, obra de la partida tradicionalista de Faes. Lo más sorrayable foi l'abolición de los cotos y la so incorporación a la llexislación ordinaria. Nesti conceyu'l desenrollu mineru tuvo un calter marxinal. Inaugúrase'l tramu de ferrocarril Uviéu-L'Infiestu que pasa per Nava. Nesta época ye un conceyu con una gran espansión ganadera.

Nel sieglu XX, esti conceyu ye de tendencia conservadora, en parte debío al so ambiente rural. Esto vióse roto pola revolución d'ochobre de 34, del qu'hai que destacar el llevantamientu de xentes del camp y de les fábriques ataquen el cuartel de la Guardia Civil y quemen la casa rectoral y la d'un terrateniente. Tres la derrota dalgunes partíes siguieron lluchando escontra'l réxime franquista per una década. El restu del sieglu Nava tien un calter marxinal tocántenes a la industrialización, especializándose nel sector lacteu. Cosidérasela una de les capitales asturianes de la sidra xunto a Villaviciosa.

Xeografía[editar | editar la fonte]

Tien una población de 5.597 habitantes y los sos principales núcleos son, por númberu d'habitantes: Nava, la so capital, Llames, Cecea, El Remediu, Piloñeta, Quintana, Purnea y Castañera. Les sos víes de comunicación son: la N-634 que treviesa'l conceyu d'oeste a este y que va d'Uviéu a Santander y el ferrocarril Económicu d'Asturies que va paralelu al ríu Viao primero y, a partir de Cecea, al Piloña. Ta a una distancia de la capital d'Asturies de 31 kilómetros.

Ye un conceyu de relieve sele que s'alcuentra ente montes, les sos principales altures son la Peña Mayor de 1.140 metros o Picu La Triguera de 1.291 metros. Los sos principales ríos son: Pra, Pendón, La Llavandera, Viao, que dan orixe al ríu Piloña, y Punegru, afluente del anterior.

Nava ye un conceyu nel que predominen los praos ya qu'ocupen más de la metá del so territoriu tando arreyaos a la cría del ganáu. Una tercer parte de la so superficie ta ocupada por grandes masas forestales, les principales especies son: el pinu, l'ocalitu, el fresnu, el texu, la castañal y el carbayu.

Parroquies[editar | editar la fonte]

El conceyu, con una densidá de población de 58,39 habitantes por km cuadráu, dixébrase en seis parroquies:

Evolución demográfica[editar | editar la fonte]

Gráfica de población de Nava (Asturies)

Fonte: Institutu Nacional d'Estadística - Ellaboración gráfica por Uiquipedia

Nel padrón municipal d'habitantes de 2011 tenía una población de 5.597 habitantes. Esta población sofrió dellos altibaxos per tol sieglu XX, asina nos tres primeros decenios la so población aumentó non pola so evolución económica, sinón por crecimientu vexetativu que compensa les perdes producíes pola so emigración, asitiándolu nel añu 1900 con una población de 5.857 habitantes, llegando en 1930 a 6.437, pero ente 1930 y 1950 la emigración aumenta y el so crecimientu vexetativu nun ye abondo como p'algamar el crecimientu demográficu, entrando esti conceyu nuna fase de despoblamientu. Ésti veráse paráu ente 1950 y 1960 debío al puxu económicu de los conceyos mineros vecinos. Acabada esta época'l conceyu fúndese nuna dinámica de represión que se verá acentuada por un descensu de la tasa de natalidá.

Esto truxo una estructura demográfica avieyada imposible d'asegurase la so propia supervivencia ya que'l 27,5% lo ocupen les persones mayores de 60 años y el 23,5% son mozos. La emigración tuvo importancia a finales del XIX y principios del XX, el so destín preferidu foi Arxentina. Na segunda metá del sieglu XX hebo una nueva corriente d'emigración pero nun tan fuerte como la anterior y esta vuelta dirixida haza'l centru d'Europa.

Economía[editar | editar la fonte]

De manera tradicional el sector económicu más destacáu dientro'l conceyu foi'l primariu, sector que s'especializó na ellaboración de lleche que dio pie a una ocupación del suelu na que dominen les praderíes, tierres dedicaes a consiguir alimentu pal ganáu. Esto nun implicó la desapaición de les manches forestales, les qu'inda s'esparden pel sur del conceyu ocupando'l 39 % del territoriu. La industria del conceyu céntrase en sectores como la madera nes fasteres de la N-634 cola instalación de fábriques del mueble. De calidá y perconocíu ye'l productu fabricáu por escelencia, la sidra, con una producción de más de 10 millones de llitros añales. Destaca nel sector industrial Fuensanta, una de les mayores empreses del conceyu. De toles actividaes terciaries la de mayor importancia ye la comercial. El so desarrollu foi paralelu al incrementu de los escedentes agrarios, dominando los establecimientos de venta d'alimentos (66 % del total), sector comercial que se concentró na capital. Nestos caberos años ye destacable'l sector turísticu del que ye mui visible l'aumentu non solo nel númberu de visitantes a la villa gracies a la creación del Museu de la Sidra, que se convirtió na tarxeta de presentación turística de Nava, sinón tamién pola cantidá de cases d'aldea (cerca d'unes 30), núcleos de turismu rural y hostelería, esta última, favorecida pol festival de la Sidra y tamién por xornaes gastronómiques como les de los platos de caza, etc.


Emplegaos nos diversos sectores económicos (añu 2009)
Númberu de trabayadores Tantu por cientu
TOTAL 1.455 100
Agricultura, ganadería y pesca 213 14,64
Industria 266 18,28
Construcción 164 11,27
Servicios 812 55,81
* Datos tomaos del Anuariu Estadísticu d'Asturies 2009, SADEI


Usos del suelu del conceyu (añu 2009)
Usu Superficie (km²)
Tierres de llabrantíu 3,11
Praderíes 38,31
Terrenu forestal 35,96
Otros usos (industrial, residencial, tierra ermo...) 18,43
* Datos tomaos del Anuariu Estadísticu d'Asturies 2009, SADEI


Característiques del sector primariu (añu 2009)
Ganaderíes de bovín 359
Cabeces de ganáu bovín 6.569
Cabeces de ganáu ovín 688
Cabeces de ganáu cabrín 284
Ganaderos con cuota llechera 42
Quilos de cuota llechera 5.860.329
Metros cúbicos de madera valtao 966
* Datos tomaos del Anuariu Estadísticu d'Asturies 2009, SADEI

Política[editar | editar la fonte]

Nel conceyu de Nava, el partíu que más tiempu gobernó foi'l PSOE, y xunto col PAS, son los únicos partíos que gobernaron el conceyu (véase Llista d'alcaldes de Nava). L'alcalde actual, y dende 2011, ye'l candidatu d'APN Emilio Ballesteros Baños (fíu del alcalde socialista que gobernó per trés llexislatures), que nel últimu momentu, y pesie a ser la segunda fuerza más votada, féxose cola alcaldía (quitándo-yla al PSOE) gracies a los apoyos de FAC y PP.

Eleiciones municipales
Partíu 1979 1983 1987[1] 1991[1] 1995[1] 1999[1] 2003[1] 2007[1] 2011[2]
PSOE 9 8 8 6 6 5 6 7 5
APN / Asturianistes por Nava - Compromisu por Asturies 2 2 3
FAC 3
AP / PP 5 3 6 6 4 5 4 2
UCD / CDS 2 0
PAS-UNA / PAS 1 1 4 0
Independientes 4
Total 13 13 13 13 13 13 13 13 13


Arte[editar | editar la fonte]

Esti conceyu tien gran cantidá de monumentos ente los sos palacios, casones, o illesies, ente los que destacaremos:

  • El monesteriu de San Bartolomé de Nava del que nun queden restos arquitectónicos. Hai restos de la so illesia que forma parte de la capiella del cementeriu, destacando los sos entellazaos d'influyencia nórdica na llinia d'impostes de la fachada de la capiella y dos efixes sobre la puerta de fierro que da accesu al recintu.
  • La illesia parroquial de San Andrés, ye de 1896. El templu ye de planta allargada y una sola nave, con cabecera poligonal, cubriéndose por cuatro bóvedes d'estrelles apoyaes sobre pilastres nervaes. El so esterior ta arrodiáu d'añadirures como'l pórticu de teyes, la sacristía o otres dependencies auxiliares. La so fachada principal ye d'arcu apuntáu con fines columnines adosaes a cada llau y dos ventanes apuntaes. La illesia ta realizada en lladrieyu, los encuadres de los vanos tán fechos n'arenisca y tallaos de manera rica. L'interior ta restauráu tres la quema que sofrió pela Guerra Civil, conservando del so orixe namás la imaxe titular de San Andrés Apóstol.
Iglesia parroquial de San Bartolomé.
  • La illesia parroquial de San Bartolomé en Nava, ta nel centru de la villa xunto al ayuntamientu y la casa rectoral. Llevántase en sustitución de l'anterior parroquia que foi templu románicu de San Bartolomé, obra del arquiteutu Luis Menéndez Pidal. Ye una illesia de trés naves y cruceru llixeramente sobresaliente que cubre la nave central de mayor altura con bóveda de cañón y los llaterales con bóveda d'arista. Ta construyida en sillaría pa les muries y sillar pa la portada de mediu puntu.
  • La capiella de los Santos Mártires en Llames. Ye d'estructura cenciella y de pequeña dimensión. La so estructura ye de cabecera cuadrada y pórticu precediendo la portada.
  • El palaciu de la Ferrería, en Ḥuentesanta, ye Monumentu Históricu Artísticu. La torre data del sieglu XIV, ye de cuatro pisos y forma rectangular, el grosor de la muria ye de metro y medio con pocos vanos, dalgunes saeteres y troneres, la entrada de la torre y les ventanes del últimu pisu son alteraciones posteriores. A esta torre se-y fueron faciendo añadidures, faciendo una composición desordenada en dos pisos con vanos de diferentes tamaños. La so portada principal ta a un llau, ye d'arcu de mediu puntu con grandes doveles en sillar. El pisu superior tien cuatro ventanes con moldures d'oreyes y balcón con voladizu y balaustrada de fierro, sobre'l balcón podemos divisar l'escudu. Del sieglu XVIII ye l'amiestu de la capiella. La so estructura ye de planta rectangular formada por nave y cabecera cuadrada, la nave ta cubierta por bóveda envaída. La puerta ye d'arcu de mediu puntu con moldures y arrodiada por un entablamientu cenciellu y rematáu por un pináculu ferrerianu. Hai que destacar la fachada sur abierta a los xardinos por trés arcos de mediu puntu, sobre la qu'hai una solana de madera.
  • El Portalón debe'l so nome a la portada de la fachada principal, que ye un gran arcu de mediu punto molduráu. Cabu la puerta hai una inscripción na piedra col símbolu de la cruz de Calatrava. El so pisu superior ye d'época diferente con un balcón y dos ventanes que se cubren con una solana de madera. El restu de la vivienda tien diferentes amiestos con lladrieyu modernu.
  • La casa de la capiella, denomada asina porque ta delantre de la capiella de Santa Lucía, construcción del sieglu XVIII, tien forma de “L” siendo la zona corta la más antigua de la vivienda, onde namás hai vanos nel piso superior. El so pisu inferior destínase a fines agrarios, los pisos superiores tienen corredores con talles mui fines de madera.
  • La Fundación Roel, debida al illustre mélicu don Faustino García Roel. Esti edificiu debía desendolcar les funciones d'escuela y dispensariu mélicu. L'edificiu ye cenciellu con frontis na fachada principal, realizáu en lladriellu y piedra artificial. En 1993 el pueblu dedicó-y un bustu asitiáu na plaza que lleva'l so nome.
  • El cementeriu de Cecea, ye un ejemplu de cementeriu financiáu por capital indianu. Ye un cercu cuadráu con altes muries, la so portada ta fecha de cantera en xambes, arcu y pilastres que sostienen un frontis triangular rematáu en cruces.
  • L'ayuntamientu de Nava del sieglu XX, de tipu clásicu. Ye de planta rectangular con cuerpu central con un frontis clasicista y un balcón voláu nel primer pisu. El so accesu ye un pórticu en forma de “U”, los balcones son adintelaos y sobre'l balcón principal ta l'escudu de Nava.
  • Villa Maximina en Nava, realizada en 1925 d'estilu montañés y elementos eclécticos. La so estructura ye de volume cuadráu, con cuerpu atorruxáu nuna corneyal y una terraza nuna de les fachaes. Destaca la so decoración con cerámica nes llinies d'impostes que separten los pisos. Hai que destacar la importancia del cercu que ye de fundición enxertada ente pilares de mampostería, coronaes por xarrones de flores realizaos en piedra.
  • El Muséu de la Sidra, del arquiteutu Juan Ramón Fernández Tresguerras, asitiáu na plaza de la villa de Nava, nelli puen vese la ellaboración de la sidra y actividaes de la cultura asturiana. L'edificiu ye de forma semicircular como un anfiteatru griegu. La entrada ye un pórticu con pilastres de formigón construyíu en fierro, piedra, formigón y madera. Destaca nel edificiu un cuerpu saliente semicircular que corona l'edificiu y simula la seición d'una pipa de sidra.

Fiestes[editar | editar la fonte]

Les sos fiestes principales son:

  • Relixoses en Nava son: en xunu les fiestes de San Xuan, n'agostu a últimos San Bartolomé patrón de la llocalidá, en mayu los díes 16, 17 y 18 son les fiestes de Nuesa Siñora de Fátima.
  • Feries más importantes son na capital, teniendo toles selmanes un mercáu y a finales d'ochobre una feria de ganáu. En mayu la primer fin de selmana se celebra Merca Astur dedicáu a productos artesanos.

Ver tamién[editar | editar la fonte]

Enllaces esternos[editar | editar la fonte]

Referencies[editar | editar la fonte]


 
Conceyos d'Asturies
Amieva | Avilés | Ayande | Ayer | Bimenes | Bual | Cabrales | Cabranes | Candamu | Cangas del Narcea | Cangues d'Onís | Caravia | Carreño | Castrillón | Castropol | Casu | Colunga | Corvera | Cuaña | Cuideiru | Degaña | Eilao | El Franco | Gozón | Grandas de Salime | Grau | Ibias | Illas | Llanera | Llanes | Llangréu | Llaviana | Ḷḷena | Mieres | Miranda | Morcín | Muros | Nava | Navia | Noreña | Onís | Parres | Peñamellera Alta | Peñamellera Baxa | Pezós | Piloña | Ponga | Pravia | Proaza | Quirós | Les Regueres | Ribedeva | La Ribera | Ribeseya | Riosa | Salas | Samartín d'Ozcos | Samartín del Rei Aurelio | Santalla d'Ozcos | Santiso d'Abres | Santu Adrianu | Sariegu | Siero | Sobrescobiu | Somiedu | Sotu'l Barcu | Tapia | Taramundi | Teberga | Tinéu | Uviéu |Valdés | A Veiga | Vilanova d'Ozcos | Villaviciosa | Villayón | Xixón | Yernes y Tameza