Muséu del Ferrocarril d'Asturies
El Muséu del Ferrocarril d'Asturies ye un gran complexu museísticu allugáu na ciudá asturiana de Xixón, nel barriu del Natahoyo, xunto a la sablera de Poniente, coxitáu ún de los museos más importantes d'Europa nel so xéneru.
El Muséu cunta con Sales d'Esposiciones Temporales, Centru de Documentación propiu (con biblioteca, hemeroteca, archivu documental y archivu d'imáxenes), sales d'actividades, talleres pa escolares, tienda y facilidaes pa persones con movilidá amenorgada. Delles vegaes al añu, prénden pa la so exhibición les llocomotores de xau que caltién n'estáu operativu, nes nomaes Xornaes del Xau.
Nes sos enanchaes instalaciones de más de 14.000 metros cuadraos, formaes pola antigua estación de Renfe, la llamada sablera de víes y dos edificios de nueva planta, guarda una de les mayores y meyor conservaes colleiciones de máquines y vagones de ferrocarril del continente européu.
Figura un ampliu conxuntu de llocomotores de xau d'estremaos ferrocarriles, como'l Ferrocarril de Llangréu tercera llinia ferroviaria costruyida n'España (tres el Barcelona a Mataró y Madrid a Aranjuez) que xunía los conceyos asturianos de Llangréu y Xixón. La colleición tamién posee llocomotores de los Ferrocarriles del Norte, Vascu Asturianu y de munches llinies mineres ya industries. Arriendes, caltién coches de viaxeros, vagones, tranvíes y otros oxetos y útiles arreyaos a los trenes y les víes ferroviaries.
Nun entamu estos ferrocarriles ñacieron p'atender los intereses mineros y les llinies saniciáronse n'una simple espansión de les criyaes internamente p'atender les necesidaes de fábriques y mines.
Ésto esplica que s'emplegaren estremaos anchos de vía asina como la falta de conexón ente les desemeyaes llinies, namái algamada con la creyación de FEVE ya integración en RENFE de los trazaos d'anchu Ibéricu.
Una amuesa de les compañíes ferroviaries qu'operaren n'Asturies y que s'afayen representaes nel muséu son les siguientes:
- Anchu de Vía Internacional.
- Ferrocarril de Llangréu.
- Compañíes de Vía Ancha.
- Compañíes de Vía Métrica.
