Monte Emei
El Monte Emei o Emeishan (峨嵋山, Pinyin = Éméi Shān; Wade-Giles = O2-mei2 Shan1) ye un monte na provincia de Sichuan, al oeste de China.
Con 3.099 metros, el Monte Emei ye’l más altu de los “Cuatro Montes Sagraos Budistes de China”. El bodhisattva patrón d’Emei ye Samantabhadra, conocíu en chinu como Puxian (普贤菩萨). Consérvense referencies de los sieglos XVI y XVII al respeutive de la práutica de les artes marciales nos monesterios del Monte Emei.
Orográficamente’l Monte Emei asítiase na faza occidental de la cuenca de Sichuan. Los montes al oeste d’ella conócense como Daxiangling. Una estensión descomanada alredor conozse xeolóxicamente como la Gran Provincia Volcánica Pérmica d’Emeishan, xenerada poles erupciones volcániques de la fastera d’Emeishan nel periodu Pérmicu.
Alministrativamente’l Monte Emei ta cerca de la ciudá del mesmu nome (Emeishan), que forma parte de la ciudá-prefeutura de Leshan.
El Monte Emei foi nomáu Patrimoniu de la Humanidá de la Unesco en 1996.[1]
El liocichla omeiensis (liocichla d’Emei Shan) ye un ave paseriforme nomáu d’esta miente n’homenax al llugar.
Índiz |
[editar] Riscar y mar de nubes
Nel Monte Emei danse grandes espectáculos como'l riscar y el “mar de nubes” que se pue ver dende la Cume Dorada.
El riscar ye mui variáu, pero’l más aparente entama cola tierra y el cielu amosando’l mesmu púrpura escuro, pasando de secute al rosa de les nubes, siguío por un arcu púrpura brillante y darréu un semicírculu onde apruz el sol.[2]
El mar de nubes inclúi dellos fenómenos nublosos, como les nubes apaeciendo perriba nel cielu a la vez que perbaxo.
[editar] Arquiteutura
El Monte Emei ye’l sitiu onde se construyó’l primer templu budista chinu nel sieglu I d.C.
Equí hai setenta y seis monesterios budistes de los periodos Ming y Qing, la mayoría allugaos cerca’l cume. Estos amuesen un estilu arquiteutónicu flexible y adautáu al entornu. Dalgunos, como les sales de Baoguosi, tán construyíos sobre terraces n’estremaos niveles, mientres qu’otros, como les estructures de Leiyinsi, tán enriba pegollos. Equí los planos fixos de los monesterios budistes de dómines más tempranes camudáronse o refugáronse al envís d’adautase meyor al decoráu natural. Los edificios de Qingyinge tán trazaos según un plan irregular nuna fastera ente los ríos Dragón Negru y Dragón Blancu. El sitiu ye pergrande, y la trabayosa sienda de 50 km lleva dellos díes percorrela.[3]
Hai un teleféricu que facilita l’ascensu a los dos templos de (3.077 m), a una hora andando dende’l picaruetu.[4][5]
[editar] Los monos
Los que visiten el Monte Emei van ver probablemente docenes de macacos tibetanos, qu’avecen arrampuñar con comida de los turistes. Los mercadeles llocales vienden nueces pa que los turistes ceben a estos animales. Pero tamién se ven monos comiendo alimentos humanos como pataques frite o bebiendo gaseosa de les botelles tiraes.
[editar] Galería
-
El Baoguosi, un templu budista
-
Una ponte de madera sobre’l Regatu de Cristal, na fastera oeste
-
Macacos tibetanos nel Monte Emei
-
Macacu nuevu
[editar] Referencies
- ↑ http://whc.unesco.org/en/list/779 Mount Emei Scenic Area, including Leshan Giant Buddha Scenic Area. Unesco
- ↑ Dreams Travel - Four Great Spectacles of Mt. Emei
- ↑ Sun Dazhang. “Chinese Architecture -- The Qing Dynasty”. Yale University Press, 2002. Isbn = 0-300-09559-7
- ↑ Hayes, Holly (2009) Emei Shan, Sacred Destinations.
- ↑ Gluckman, Ron (2002). Getting to the Top, Silk Road, December 2002. Hong Kong; Dragon Airlines.
[editar] Enllaces esternos
