Monesteriu Shaolin

De Uiquipedia
Saltar a: navegación, buscar
Fachada principal del monesteriu Shaolin en Henan.

El Monesteriu Shaolin o Templu Shaolin (少林寺, Shàolín Si) ye un templu budista Chan allugáu nel monte Song (Song Shan), en Dengfeng, xunto a la ciudá de Zhengzhou, na provincia china de Henan, anque hai delles tradiciones que falen d’otros templos con esti nome esperdigaos per China, cuasi siempre a resultes de destrucciones del orixinal, sobre too les que tuvieron llugar nos sieglos XVII y XVIII, qu'asina mesmo contribuyeron al ensame de les artes marciales per toa China. Los tres caráuteres que formen la pallabra "Shaolin" signifiquen en xunto "viesca nueva", y créyese qu’esti nome surdió dempués d’una gran quema qu’afaró les viesques alredor del templu de Song Shan. Los árboles afaraos replantáronse llueu, lo que fixo que la viesca fuera "nueva". Hailos tamién qu'interpreten los caráuteres como "pequeña viesca".

En Shaolin síguese'l budismu Mahayana, y el monesteriu ta venceyáu a la orde budista Chan (xaponés: Zen) fundada nel 527 d.C. pol monxu indiu Tamo (Bodhidharma). Esta ye quiciabes la orde budista china más conocida n’Occidente, pero Shaolin algamó sonadía principalmente pola so asociación col desendolcu de les artes marciales de China. Los monxos de Shaolin entrenen a diario les artes marciales, y disciplines arreyaes como’l Chi Kung, como forma de meditación. Anguaño son conocíos per dayures pol so perfeutu dominiu corporal.

Na serie de televisión de los años 1970 Kung Fu, el protagonista, Kwai Chang Caine (David Carradine), fórmase dende neñu como monxu nel Monesteriu Shaolin, y ye allí onde se fai espertu en Shaolin Kung Fu.

Ver tamién[editar | editar la fonte]

Enllaces esternos[editar | editar la fonte]



Coordenaes: 34°30′01″N 112°54′56″E