Mocedá d'Izquierda Asturiana

Mocedá d'Izquierda Asturiana (MIAS) ye la organización política de mocedá venceyada al partíu nacionalista Izquierda Asturiana, anguaño integráu na federación de partíos Unidá Nacionalista Asturiana (UNA). Creóse a finales de 2001 y en febreru de 2008, la militancia de la organización anunció la so disolución, fechu que nun aceptó la direición del partíu. Sicasí, tres esti anunciu, dicha organización nun tuvo más actividá.

Ideoloxía

Les sos exes ideolóxiques son la xusticia social, la soberanía d'Asturies, l'ecoloxismu y la defensa de la cultura asturiana.

Historia

Creóse en 2001 anque foi especialmente a finales de 2005 cuando mias>> conoz un mayor espoxigue en militancia y actividá. Nesti crecimientu ye mui significativa la fecha del 29 de xunetu de 2006, cuando se fai la I Asamblea Xeneral de la organización, configurando una Direición Nacional y marcando les llinies polítiques a seguir d'ehí p'alantre.

Desque entama esi espoxigue, mias>> participó en delles manifestaciones y ensames (pola oficialidá, pola igualdá ente sexos, contra la tauromaquia, contra la invasión d'El Líbanu por Israel,...) y espublizó mensualmente un cartafueyu (Na Cai>>) onde recoyía les actividaes y comunicaos más importantes, amás de desendolcar campañes diverses.

Sicaí, tres delles diferencies de criteriu cola Direición Nacioal d'IAS nel procesu de refundación d'Unidá Nacionalista Asturiana (UNA), mias>> espubliza en febreru de 2008 la so disolución como estaya de mocedá del partíu.

Enllaces esternos

• Páxina web oficial na Wayback Machine (archiváu'l 25 d'avientu de 2009).
• Páxina oficial d'Izquierda Asturiana