Malawi

De Uiquipedia
Saltar a: navegación, buscar

100 kuacha = 0,69 € (cambiu oficial el 28/02/2005)"

Republic of Malawi
Dziko la Malaŵi
Bandera de Malawi Escudu de Malawi
(Bandera de Malawi) (Escudu de Malawi)
Lema nacional: Unity and Freedom
(n'inglés; Xunidá y Llibertá)
Himnu nacional: Mlungu dalitsani Malawi
Situación de Malawi
Capital
 • Población
 • Coordenaes
Lilongwe
902.388 hab.
33°47'E
Mayor ciudá Blantyre
Idiomes oficiales Inglés y Chichewa
Forma de gobiernu Democracia multipartidista
Bingu wa Mutharika
Independencia
 • fecha
del Reinu Xuníu
6 de xunetu de 1964
Superficie
 • Total
 • % agua
Llendes
Costes
Puestu 98º
118.484 km²
20,6 %
2.881 km
Nun tien
Población
 • Total
 • Densidá
 • Densidá
Puestu 67º
10.385.849
88 ab./km²
88 hab/km²
PIB (PPA)
 • Total (2005)
 • PIB per capita
Puestu 145º
US$ 7.507'000.000
US$ 596
Moneda Kuacha = 100 tambala

100 kuacha = 0,69 € (cambiu oficial el 28/02/2005)

Xentiliciu Malawanu, -a, -o
Zona horaria
 • en Branu
UTC + 2
265
Dominiu d'Internet .mw
Códigu telefónicu +7QA-7QZ
Prefixu radiófonicu 454 MWI MW
Códigu ISO
Miembru de: ONX, XA, Commonwealth
Sitiu web del Gobiernu:
{{{web_gobiernu}}}

Malawi, oficialmente la República de Malawi (tamién Malaui[1];n'inglés, Republic of Malawi; en chichewa, Dziko la Malaŵi) ye un país ensin salida al mar que s'asitia al Sureste d'África. Llenda al noroeste con Zambia, al oeste, sur y este con Mozambique y al noreste con Tanzania; ta separtáu de los dos caberos países pol llagu Malawi. El topónimu del país, que na época de la colonización británica yera nomáu Nyasaland, vién-y del d'una de les tribus chewa qu'habitaben la zona, los Maravi. Tien una estensión de 118.484 km² y una población estimao (2009) de 15.028.757 habitantes. La so capital ye Lilongwe (902.388 habitantes en 2009), magar que la ciudá más poblada hasta va pocos años yera Blantyre (732.518 habitantes en 2008), la capital económica del país.

El so territoriu foi poblaú demientres el sieglu X, y se caltuvo independiente de les potencies coloniales hasta 1891. Nesi añu llegaron los ingleses, que dirixeron el país hasta 1964. Tres la independencia el país convirtiose nun estáu unipartidista dirixíu por Hastings Banda, nomáu presidente vitaliciu en 1971 y espulsáu del poder en 1994. L'actual presidente ye, dende 2004, Bingu wa Mutharika, y anguaño el país tien un sistema de gobiernu democráticu y multipartidista.

Malawi ye ún de los países con mayor densidá de población del mundu, y tamién ún de los menos desarrollaos. Su economía basase principalmente na agricultura, y la mayoría la población vive nel campu. La so precaria situación fai que'l país dependa grandemente de l'axuda foriata pa cubrir les sos necesidaes básiques. Esa axuda, que'l gobiernu dirixe, a lo menos dende 2005, a ameyorar los servicios básicos (educación, salú, protección y la protección del hábitat) y a potenciar el crecimientu económicu pa tentar de convertise nun país financieramente independiente, parez tar dando resultaos nos caberos años. Pesie a ello la esperanza de vida ye perbaxa, y hai una tasa peralta de mortalidá infantil y una prevalencia del SIDA preocupante, que ta afectando negativamente la riqueza del país pola perda de manu d'obra que provoca.

En cuantes a la composición de la so población, conviven nel país xentes de munchos grupos tribales africanos distintos con persones d'orixe européu y asiáticu. Fálense delles llingües autóctones (destaca'l chichewa, faláu pol 57% de la población), y amiéstense nel país xentes de distintes confesiones cristianes (80% de la población, con mayoría de católicos y presbiterianos) con musulmanes (13% de la población) y dalgunos xudíos, bahá'i y hindús. Los enfrentamientos ente los distintos grupos étnicos yeren frecuentes antaño, pero el conceptu de la nacionalidá Malawiesa parez que va afitándose na población.

Historia[editar | editar la fonte]

Esta zona d'África tuvo poblada a lo menos dende'l 8000 edC, y sábese que dellos reinos dominaron la zona y dempués foron desaniciaos por otros primero de que los portugueses aportaran al territoriu nel sieglu XVII. Tratantes d'esclavos veníos de Zanzíbar pañaben equí a dalgunes de les sos víctimes nos años 40 del sieglu XIX; dio testimoniu d'ello David Livingstone cuando, en 1859, visitó'l territoriu.

En 1875 dellos misioneros escoceses s'asentaron nelli, gobernando partes del país por un tiempu. Concretamente hasta 1889, cuando Sir H.H. Johnston proclamó'l protectoráu británicu sobro lo qu'él denomó como Shire Highlands. El nome cambió en 1891 pol de British Central Africa; en 1907 pasó a llamase Nyasaland, que yera'l nome que tenía cuando algamó la so independencia en 1964.

En 1953 incorporose a la recién creada Central African Federation, pero de mala gana. Lluchó pol so derechu a la independencia, que-y llegó en 1964. El país camudó'l nome pol de Malawi, y el Dr. Hastings Banda convirtiose nel so primer Primer Ministru. Dos años dempués, en 1966, el país pasó a ser oficialmente una república; Banda convirtiose nel so presidente, con calter vitaliciu dende 1971. Cellebráronse regularmente elecciones al Parllamentu Nacional, pero toos los candidatos teníen de ser del Malawi Congress Party, el partíu únicu. Esti controló la situación hasta l'entamu de la década de los 90.

En 1992 la oposición a esta situación espolletó enforma, y el cabezaleru de la oposición, Chakufwa Chilana, foi apresáu. Nin la presión violenta de la oposición nin la respuesta internacional, en forma de suspensión de l'ayuda humanitaria, consiguieron que les eleiciones de xunu d'esi añu foran multipartidistes. Nostante, les algaraes continues, qu'empantanaben la vida del país, llevaron a Banda a cellebrar un referéndum n'ochobre d'esi añu; de resultes del mesmu foi aprobáu el multipartidismu. A esti dió-y forma la nueva constitución, que diba ser provisional, aprobada en 1993. Nes eleiciones del añu siguiente ganó'l United Democratic Front, y el so cabezaleru Bakili Muluzi convirtiose'n presidente.

Diba selo hasta 2004, cuando foi sustituyíu pol Dr. Bingu wa Mutharika. Pero primero d'eso, el 18 de mayu de 1995, aprobose l'actual constitución, que consagró la división de poderes (llexislativu, executivu y xudicial) y la eleición de presidente y vicepresidente cada cinco años. Tamién cada cinco años son elexíos los 193 miembros del Parllamentu.

Mutharika foi reelexíu nes eleiciones de mayu de 2009.

Política[editar | editar la fonte]

Gobiernu[editar | editar la fonte]

El réxime políticu de Malawi ye una democracia multipartidista, y el so actual presidente ye Bingu wa Mutharika. La llei suprema del país ye la constitución aprobada el 18 de mayu de 1995, que diferencia trés poderes dientro del estáu: l'executivu, el llexislativu y el xudicial. El primeru inclúi un presidente, que ye a la vez el xefe del estáu y el cabezaleru del gobiernu, dos vicepresidentes (primeru y segundu) y dellos ministros. El presidente, y el vicepresidente primeru con elli, son elexíos cada cinco años. Puede haber, si quier el presidente, un segundu vicepresidente, pero tien que ser d'un partíu políticu distintu al de so. Los ministros son nomaos pol presidente, y pueden pertenecer o non a l'asamblea nacional.

El poder llexislativu ta representáu por una Asamblea Nacional unicameral, con 193 miembros elexíos cada cinco años. La constitución fala tamién de la formación d'un Senáu de 80 miembros, pero nun esiste. Si lo hubiera, tendríen de tar representaos nelli los cabezaleros de les tribus del país, y tamién representantes de distintos distritos xeográficos del país y de grupos específicos como les muyeres, los xóvenes o los discapacitaos. El sistema xudicial sigue'l modelu inglés, y inclúi un Tribunal Constitucional, un Tribunal Supremu, una Corte Suprema d'Apelaciones y dellos tribunales de rangu inferior.

Nel país esisten nueve partíos políticos. El que gobierna anguaño ye'l Democratic Progressive Party (DPP), y los principales partíos de la oposición son el Malawi Congress Party (MCP) y el United Democratic Front (UDF). El votu ye universal pa toos los que tienen 18 años o más, y el presupuestu del gobiernu central del país pal añu 2008 foi de 1.240 millones de dólares.

Malawi ta dividíu alministrativamente en trés rexones (central, septentrional y meridional) que se sodividen en 28 distritos, que se sodividen otra vuelta en 110 entidaes alministratives menores. Toes eses estructures yeren gobernaes, de siempres, por alministradores rexonales y comisionaos de distritu nomaos pol gobiernu central. Sicasí, el 21 de payares de 2000 cellebráronse les primeres elecciones locales, nes que'l UDF ganó'l 70% de los puestos de gobiernu que s'elexíen. Taba previsto que se cellebraran otres elecciones en mayu de 2005, pero foron cancelaes pol gobiernu.

El presidente Bingu Wa Mutharika

En febreru de 2005 el presidente Mutharika rompió col UDF y creó'l so propiu partíu, el DPP. Esti, que se vio reforzáu por personalidaes reformistes que s'averaron a elli dende los otros partíos, lleva ganando desde 2006 les elecciones. En 2008 Mutharika punxo en marcha reformes pa intentar iguar la gran corrupción que hai nel país, que llevó a los tribunales a cinco de los principales dirixentes de la UDF.

Les fuerces armaes de Malawi compónense d'exércitu, marina y fuerza aérea, con un total de 5.500 soldaos, 1.500 policíes paramilitares y 80 aviones (dengún d'ellos ye un caza de combate). La división naval del exércitu tien la so sé en Monkey Bay, a la vera del llagu Malawi.

Rellaciones esteriores[editar | editar la fonte]

El país tien una política esterior pro-occidental, que se vio favorecida pola transición d'un estáu de partíu únicu a un réxime multipartidista. A resultes d'ella hebo un averamiento a los Estaos Xuníos, que se concreta na marcha d'un bon garapiellu d'estudiantes Malawienses pa les universidaes d'aquél país y na apertura de delegaciones de delles instituciones estaunidenses (Cuerpu de Paz, Centru pal Control y Prevención de les Enfermedaes, Axencia Estaunidense pal Desarrollu Internacional...) en Malawi. Amás de con esi país, Malawi tien bones rellaciones diplomátiques con otros países occidentales.

En cuantes a la rellación colos otros países africanos, demientres l'apartheid el gobiernu Malawiés caltuvo bones rellaciones colos gobiernos de la República Surafricana, lo que fizo más difíciles les sos rellaciones colos otros países d'África. Sicasí, dende'l fin del réxime racista surafricanu la situación va normalizándose. Arriendes d'ello, Malawi foi, dende 1985, llugar d'abellugu pa refuxaos de países como Mozambique y Rwanda. La llegada d'esos foriatos, d'una banda, nun foi bona pa la economía del país, pero, por embargu, fizo que'l país recibiera sofitu económicu d'otros países (Estaos Xuníos, Canadá, Alemaña, Islandia, Xapón...) y instituciones (FMI, Bancu Mundial, Xunión Europea, Bancu Africanu de Desarrollu...).

El país ye miembru de la ONX (dende'l 1 d'avientu de 1964) y de la Xunión Africana, y tamién de delles organizaciones internacionales de calter económicu (Fondu Monetariu Internacional, Bancu Mundial, Bancu Africanu de Desarrollu). El so enfotu declaráu en política esterior ye'l de buscar la estabilidá económica y política nel sur del continente al traviés de la negociación pacífica de los conflictos.

El presidente Mutharika ye, dende'l 31 de xineru de 2010, presidente de la Xunión Africana.

Derechos humanos[editar | editar la fonte]

Acordies col 2006 Country Reports on Human Rights Practises del Departamentu d'Estáu de los Estaos Xuníos, la situación de los derechos humanos del país, nun siendo mui mala, presenta abondos casos de violación de derechos en situaciones concretos. Según el informe, la policía actúa, delles veces, con muncha violencia, y la vida nes cárceles ye enforma dura. Tamién apaecen nel informe casos de detenciones por motivos políticos, d'arrestos arbitrarios y de persones que pasen na cárcel munchu tiempu esperando xuiciu. Amás d'eses irregularidaes na actuación gubernamental, tán perestendíes tamién, na sociedá, actitudes reprochables como l'abusu sexual de guajes y muyeres, el trabayu infantil, la violencia doméstica, el tráficu de persones o la falta de respetu polos derechos de los trabayadores. Pesie a ello, el gobiernu parez trabayar p'ameyorar esa situación, y tenía aprobao recién, cuando s'espublizó l'informe, una llei escontra la violencia doméstica. Tamién hai nicios de que se ta entamando a lluchar seriamente escontra la corrupción.

Por embargu, en 2010 la homosexualidá ye inda illegal. En mayu d'esi añu una pareya fue xulgada por esi delitu y condenada a 14 años de trabayos forzaos cadún. Nostante, la intervención del secretariu xeneral de la ONX, Ban Ki-Moon, consiguió que, dos semanas dempués, se-yos perdonara la pena.

Xeografía[editar | editar la fonte]

Mapa físicu de Malawi

Xeografía física[editar | editar la fonte]

Malawi ye un país continental del sudeste d'África. Llenda con Zambia al noroeste, con Tanzania al noreste y con Mozambique al sur, suroeste y sureste. El Gran Valle del Rift percuerre'l país de norte a sur; nelli s'asienta'l llagu Malawi, el terceru mayor d'África. Esti, nomáu tamién llagu Nyasa, ocupa'l 20% del territoriu Malawies. Tien un llargor de 587 km (365 milles) y un anchor de 84 km (52 milles) y ye nomáu, tamién, poles sos midíes nel sistema imperial, Calendar Lake (llagu del calendariu).La superficie del llagu atópase a 457 m sobro'l nivel de la mar, y la so profundidá másima ye de 701 m; poro, hai partes d'elli que queden más de 200 m perbaxu del nivel de la mar. Nel so estremu meridional ñaz el ríu Shire, que s'axunta col ríu Zambeze 400 km más p'abaxu, en tierres de Mozambique. Nel sur del país hai otros dos llagos más pequenos, el llagu Malombe y el llagu Chilwa.

Alredor del valle del Rift hai delles mesetes, con una altitú media d'ente 900-1.200 m. Destaquen ente elles: la meseta Nyika, al norte del país, con un altor mediu de 2.100 m y un cumal, el picu Nganda, de 2.605 m d'altor; y, al sur del llagu Malawi, la meseta de Shire, con un altor mediu de 914 m sobro'l nivel de la mar. Atopase nella el cumal cimeru del país: el picu Sapitwa, de 3.002 m d'altor.

Mapa políticu de Malawi

Clima[editar | editar la fonte]

El clima de Malawi ye tropical, con una estación lluviosa, de payares a abril, y otra, de mayu a ochobre, na que malpenes cae agua. La zona qu'arrodia'l llagu Malawi y el valle del Shire tienen, de setiembre a abril, un clima caldiu y húmedu, con temperatures medies demientres el día de 27-29º; la zona de Lilongwe tien un clima asemeyáu, pero les temperatures nun son tan altes. El restu del país, pol so mayor altor sobro'l nivel de la mar, tien un ambiente más templáu, con temperatures másimes de día de 25º. Tocante a los meses del iviernu austral (xunu-agostu), la fastera meridional del país y les orielles del llagu tienen una bona temperatura (23º de másima), mentantu que'l restu del país ta más fresco, con temperatures de 10-14º pela nueche. Nes zones más altes del país (meseta Nyika, monte Mulanje) l'iviernu ye frío enforma, con temperatures nocturnes de 6-8º en xunu y xunetu. La zona más septentrional del país, alredor de Karonga, tien una temperatura diruna cuasi constante tou el añu (25-26º), y les lluvies más abondantes viénen-y en abril y mayu pola acción de los vientos fuertes del sur qu'apaecen na zona del llagu Malawi.

Principales ciudaes[editar | editar la fonte]

La capital, y ciudá más poblada dende 2008, ye Lilongwe. Nacida como un pequeñu asentamientu a la vera del ríu homónimu, convirtiose a entamos del sieglu XX nun centru alministrativu. De magar, la so situación, a la vera de la principal carretera del país (lo qu'anguaño ye l'autopista M1, que comunica el norte y el sur del país), fízo-y medrar enforma. Pa 1974, cuando pasó a ser la capital del país (primero yéralo Zomba), yá yera la segunda ciudá del país en población. Y siguió siéndolo hasta'l 2008, cuando pasó a Blantyre: en 2009 tenía 902.388 habitantes. Otres ciudaes importantes son:

  • Blantyre, capital comercial y económica del país y segunda ciudá en población (732.518 habitantes en 2008). Asitiada na zona meridional del país, ye la sé de la televisión estatal, del Tribunal Supremu y de munches de les facultaes de la Universidá de Malawi. Ye, tamién, la capital de la rexón meridional del país. Fundada en 1876 por misioneros escoceses, que-y dieron esi nome por ser el del pueblu escocés nel que naciera l'esplorador David Livingstone, foi la primer municipalidá del país (1895) y ye la más antigua de les ciudaes del centru, sur y sureste d'África. Centru industrial y turísticu, ye la más dinámica de les ciudaes Malawienses.
  • Zomba, que foi capital del África Central Británica, y dempués de Nyasaland, demientres la colonización británica. En 1964, al independizase Malawi, convirtiose na capital hasta 1974. Colos sos 101.140 habitantes (2008), esta ciudá del sur del país caltién della importancia como centru universitariu, y ye, pola arquitectura de la dómina colonial que tien nel cascu vieyu, ún de los principales destinos turísticos del país.
  • Mangochi, situada nel sur del país, a la vera del llagu Malawi. Fundada col nome de Fort Johnston na década de 1890 como un puestu militar pa controlar la oriella derecha del ríu Shire, algamó dempués sonadía como centru de venta d'esclavos y centru alministrativu. Nella construyóse, en 1897, el barcu de guerra británicu Gwendolen. Esti foi, hasta que lu esguazaron dempués de la Segunda Guerra Mundial, el barcu más grande qu'inxamás navegara pel llagu Malawi. Na Primer Guerra Mundial, en agostu de 1914, consiguió hundir al barcu alemán Hermann von Wissmann. La so economía básase na agricultura y na pesca, y tenía, en 2008, una población de 51.429 habitantes. Cerca d'ella ta'l principal enclave turísticu del país, Monkey Bay, que ye tamién la sé de la Marina de guerra Malawiesa.
  • Mzuzu, capital de la rexón septentrional del país. Ye un centru agrícola y comercial, y sé d'ún de los cuatru hospitales que hai nel país y de la Universidá de Mzuzu. Tenía, en 2008, una población estimada de 175.345 habitantes.

Economía[editar | editar la fonte]

Malawi ye ún de los países menos desarrollaos del mundu y, tamién, ún de los de mayor densidá de población. La so economía ye fuertemente agrícola: el 85% de la so población vive nel campu dedicada a l'agricultura, qu'aporta más d'un terciu del PIB y un 90% de los ingresos por esportaciones del país.

La economía del país ye fuertemente dependiente de les ayudes internacionales. Éstes suspendiéronse, poles sospeches de corrupción, n'avientu del 2000; a resultes d'ello, el presupuestu pa desarrollu del país cayó un 80%. Años dempués, en 2005, l'adopción por parte del presidente Mutharika y del so ministru d'economía Gondwe de midíes de control del gastu fizo que volvieren a recibise ayudes foriates (575 millones de dólares esi añu). Con elles el gobiernu impulsó midíes que buscaben el desarrollu de la economía de mercáu, la protección medioambiental y l'ameyoramientu de los sistemes educativu y sanitariu (la tasa d'infectaos pol VIH medró espectacularmente nos últimos años), too col enfotu d'algamar, a la fin, la independencia financiera del país.

La disciplina financiera parez qu'acabó en 2009. Esi añu el presidente mercó, pal so usu priváu, un avión. Poco dempués, hebo escasez de combustible en tou el país: oficialmente foi por problemes loxísticos, pero parez más probable que fora pola falta de divises que siguió a la compra del mentáu avión. Anque'l coste total pal país (y pal so sistema sanitariu) nun ta claro, esi añu hebo un descensu de la inversión del 23%, y el país tuvo problemes, por falta de divises, pa pagar les sos importaciones. El país, amás, sigue teniendo munchos problemes estructurales que dificulten la inversión (infraestructures precaries, altu coste de los servicios...), y el gobiernu nun ye quién p'acabar con ellos.

A resultes d'ello, Malawi ye ún de los países con menor renta per cápita de tou el mundu. El so PIB, en 2009, yera de 12.810 millones de dólares, lo que da una renta per cápita de 900 dólares. El 35% del PIB vien de l'agricultura, el 19% de la industria y el 46% del sector servicios. La inflación, nesi añu, yera d'alredor del 8,5%, y la tasa de crecimientu económicu estimada foi del 9,7% nel 2008[2].

Puestu de venta d'artesanía nun mercáu en Lilongwe

La probeza del país va amenorgando gracies a los puestos de trabayu que creen el gobiernu y les organizaciones d'ayuda. El porcentaxe de población que vive na probeza baxó del 54% en 1990 al 40% en 2006, y los que viven na probeza estrema, que yeren un 24% de la población en 1990, yeren namái un 15% en 2007[3]. Amás, la desnutrición va menguando muncho desde 2005 a resultes de l'aplicación de programes escontra la fame diseñaos nel propiu país. Programes que, paradóxicamente, van a la escontra de lo que recomienden organismos internacionales como la Organización Mundial del Comerciu o'l Bancu Mundial.

Los principales cultivos de Malawi son el tabacu, la caña d'azucre, el té, el maíz, les patates y el sorgu. Hai, tamién, ganáu vacunu y cabrín. En cuantes a la industria, les principales son les de procesamientu d'azucre, té y tabacu, y hai tamién sierres, fábriques de cementu y otres que producen bienes de consumu. La tasa de crecimientu de la producción industrial estimábase, pal 2009, nun 10%. Tocante a les fontes d'enerxía, el país nun usa gas natural. Amás, nel 2008 nun importó nin esportó lletricidá, pero tuvo qu'importar, al nun tener xacimientos nel so territoriu, tou el petróleu que consumió. En 2006 entamó a amestase con un 10% d'etanol, producíu nun par de fábriques construyíes nel país p'amenorgar la dependencia del petróleu foriatu. En 2008, amás, entamaron a facese pruebes con coches que furrulaben namái con etanol: los resultaos iniciales foron bonos, y l'usu del etanol va medrando. La lletricidá produzse, la más d'ella, a partir del aprovechamientu del agua en centrales hidrollétriques (96,7% del total de la enerxía producida en 2001).

Pal 2009 les esportaciones del país foron d'alredor de 945 millones de dólares. El 70% d'ellos pagáron-yoslos pol tabacu esportáu, lo que ye un gran problema pal país nun contestu mundial de descensu de los precios d'esi productu y de presiones crecientes de la comunidá internacional pa que se limite la so producción. Especialmente porque la importancia del tabacu nel total de les esportaciones medró enforma nos caberos años, pasando del 53% en 2007 al 70% citáu darréu en 2008-09. Otru 20% de los ingresos por esportaciones del país provienen del té, l'azucre y el café. El 10% restante obtiénenlo de la venta d'algodón, cacagüeses y productos forestales y testiles. Les esportaciones van, principalmente, a la República Surafricana, Alemaña, Exiptu, Zimbabwe y los Estaos Xuníos. Les importaciones (1.625 millones de dólares) inclúin, amás del petróleu, bienes de consumu, maquinaria y comida, que lleguen, principalmente, de la República Surafricana, India, Zambia, Tanzania, Estaos Xuníos y China.

Infraestructures[editar | editar la fonte]

La infraestructura del tresporte ye perprobe. El país tien 39 aeródromos, de los que namái 6 tienen la pista asfaltada. Hai tamién 797 km de vía férrea y una rede de carreteres de 15.451 km[4], de los que namái el 45% tán asfaltaos. Hai, pa finar, unos 700 km d'agües navegables nel llagu Malawi y nel ríu Shire.

La rede de ferrocarril (Malawi Railways) tien, como dixéramos, 797 km de vía de 1.067 mm d'anchor. Taba xestionada pol gobiernu hasta la so privatización en 1999; dende aquella ta operada pol consorciu nomáu Central East African Railways. Tocante a les conexones con otros países, nun la hai con Tanzania pola diferencia d'anchor de les víes de los dos países. Por embargu, Mozambique tien el mesmu anchor, y tradicionalmente había dos llínies que conectaben a los dos países. La primera d'elles, llamáu corredor de Nacala, va per Nayuchi al puertu de Nacala; la segunda, destrozada pola guerra civil en Mozambique y entá ensin arreglar, diba per Nsaje al puente de Doña Ana y a Beira.

El tresporte aéreu ta en manes de la llínia aérea nacional del país, Air Malawi. De propiedá estatal (hebo dos intentos fallíos de privatizala), tien la so sé nel Chileka International Airport de Blantyre. Dende ellí, y dende'l Lilongwe International Airport, vuela colos cuatru aviones de la so flota a dellos destinos rexonales: Lilongwe, Johannesburgu, Harare, Dar es Salaam y Lusaka.

No que cinca a les infraestructures de comunicación nel 2007 había 175.200 llinies telefóniques nel país, amás de 1.051.000 teléfonos móviles (8 por cada 100 habitantes). El sistema telefónicu Malawiés, que va tiempu yera de los piores del continente, ameyoró enforma nos caberos años. Sobremanera nes ciudaes, nes que se concentren el 75% de les llinies. Nesi añu de 2007 había tamién 139.500 usuarios d'Internet, 14 emisores de radio y una de televisión.

Demografía[editar | editar la fonte]

Malawi tenía en 2009, según les estimaciones, una población d'alredor de 15 millones d'habitantes, con una tasa de crecimientu añal de la población d'un 2,75%.

Tocante a la so composición étnica, el país comprende un garapiellu de grupos étnicos nativos (chewa, nyanja, tumbuka, yao, lomwe, sena, tonga, ngoni y ngonde), amás de dalgunos habitantes d'orixe asiáticu y europeu. El nome del país deriva de los maravi, una tribu bantú qu'aportó a la zona dende'l sur de la cuenca del ríu Congo fai 600 años. Al llegar a la fastera septentrional del llagu Malawi la tribu se dividió. Una parte d'ellos, los antepasaos de los chewa d'anguaño, ocuparon la fastera occidental del llagu; otros, los antepasaos de los nyanjas d'anguaño, ocuparon les sos fasteres meridional y oriental. Pal añu 1500 dambos grupos teníen establecío un reinu qu'abarcaba dende más al norte de l'actual ciudá de Nkhotakota hasta'l ríu Zambeze nel sur, y dende'l llagu Malawi al este fasta'l ríu Luangwa, en tierres qu'anguaño son de Zambia, al oeste. Pesie a ello, hebo conflictos étnicos y movimientos importantes de población que ficieron que nun pueda falase d'una sociedá Malawiense cohesionada hasta'l sieglu XX. Nos caberos años les distinciones étnicas y de tribu amenorgaron, y anque hai rivalidaes rexonales va creciendo na xente la idea nacional Malawiense. Anguaño los chewa son el 90% de la población de la rexón central, los nyanja predominen nel sur y los tumbuka al norte del país. Los tonga, pela so banda, viven al norte. Los ngoni, una tribu d'orixe zulú qu'aportó al país dende Sudáfrica a primeros del sieglu XIX, viven nes tierres baxes del norte y el centru del país. Finalmente los yao, que son na so mayor parte musulmanes, tán concentraos na zona del sur del país que va dende Blantyre y Zomba a la llende con Mozambique.

Población de Malawi, en miles de persones, dende'l 1961 a 2003

Los idiomes más falaos del país son: el chichewa, que ye l'oficial y ye falao pol 57% de la población, el chinyanja (12,8% de la población), el chiyao (10,1%) y el chitumbuka (9,5%). Fálense tamién: en lomwe Malawiense, con 250.000 falantes al sureste del país; el kokola, que ye la llingua de 200.000 habitantes, tamién del sureste; el lambya, con 45.000 falantes al noroeste del país; el ndali, con 70.000 falantes; el nyakyusa-ngonde, falao por 300.000 Malawienses del norte del país; el sena Malawiense, con 270.000 falantes de la fastera meridional del país; y el tonga, que se fala nel norte (170.000 falantes).

Tocante a les relixones más practicaes, cuasi'l 80% de la población ye cristiana. Dos millones de Malawienses son católicos, y tán dirixíos espiritualmente pol arzobispu de Blantyre. La so archidiócesis divídese en siete diócesis que cubren el territoriu del país. Ente los protestantes, los más d'ellos son presbiterianos, de la Church of Central Africa. Tien 1.300.000 seguidores en Malawi, que s'organicen en trés sínodos: el de Livingstonia al norte, el de Nkhoma nel centru y el de Blantyre al sur. Hai, tamién, baptistes, anglicanos, evanxélicos y adventistes del séptimu día. L'Islam, pela so banda, ye la relixón del 12,8% de la población. El Corán ta tornáu al chichewa, y hai dellos grupos que, dende Angola, faen proselitismu pa convertir a la xente a esta relixón. En cantidaes bien pequeñes hai tamién xudíos, rastafarianos, hindús y bahais, y un 4% de la población practica entá les sos creyencies tribales o ye atea.

Cultura[editar | editar la fonte]

El nome Malawi vién-y al país del de los maravi, una tribu bantú qu'aportó a lo qu'anguaño ye Malawi dende'l sur del Congo alredor del añu 1400. Al llegar al norte del llagu Malawi la tribu dividiose: parte d'ellos, que formaron el niciu de lo qu'anguaño ye la tribu chewa, foron pa la zona suroccidental del llagu; los otros, antepasaos de los actuales nyanja, ocuparon la oriella este del llagu hasta aportar a l'estremu suroriental d'ésti. Les engarradielles ente les tribus y les migraciones constantes impidieron que la esistencia d'una única sociedá Malawiana fora una realidá hasta'l sieglu XX. Foi nesi momentu nel que foi surdiendo esa conciencia nacional nesta sociedá, mayormente rural, conservadora y pacífica.

Mázcara de madera de la tribu chewa

Arte[editar | editar la fonte]

Una parte perimportante de la cultura Malawiana represéntela les sos dances. Esiste una compañía nacional de danza (National Dance Troupe, primero llamada Kwacha Cultural Troupe), que foi creada en payares de 1997 pol gobiernu. Aparte de nes sos representaciones, pueden vese entá eses dances en ritos relixosos (d'iniciación, casorios...) y otres cellebraciones. Nelles pueden vese, amás, les mázcares tallaes en madera y los goxos que son tradicionales ente les tribus natives del país. Nes zones urbanes del país atópense tamién otres figures tallaes en madera y pintures, feches les más de les veces col envís de vendé-yosles a los turistes. Hai, por últimu, dellos escritores reconocíos internacionalmente: el poeta Jack Mapanje o los novelistes Legson Kayira, Felix Mnthali, Frank Chipasula y David Rubadiri. Rescampla pola so celebridá, ente toos ellos, l'historiador, ensayista y novelista Paul Zeleza, actual presidente de l'Asociación d'Estudios Africanos de la universidá estaunidense de Rutgers (Nueva Jersey), y editor d'un blog centráu nos asuntos africanos[5].

Deportes[editar | editar la fonte]

El fútbol, que llegó al país na época colonial colos colonizadores ingleses, ye'l deporte más popular del país. La so selección nacional nunca participó nuna Copa Mundial de Fútbol, y namái una vez, en 1984, na fase final de la Copa d'África de Naciones. Los sos principales xugadores xueguen n'equipos de la República Surafricana, anque los de más sonadía emigraron a Europa y xueguen n'equipos de lligues pequeñes d'esti continente (Suecia, Rusia...). Ente los demás deportes destaca, pol númberu de practicantes, el baloncestu. Dende 1972, por últimu, deportistes Malawianos participaron n'ocho Xuegos Olímpicos, ensin tener conseguío denguna medalla hasta 2010.

Organización político-alministrativa[editar | editar la fonte]

Los distritos de Malawi


Malawi ta organizáu en trés rexones, qu'agrupen los 28 distritos del país.

Central Region (Rexón Central)

    • 1 Dedza
    • 2 Dowa
    • 3 Kasungu
    • 4 Lilongwe
    • 5 Mchinji
    • 6 Nkhotakota
    • 7 Ntcheu
    • 8 Ntchisi
    • 9 Salima
Northern Region (Rexón septentrional)

    • 10 Chitipa
    • 11 Karonga
    • 12 Likoma
    • 13 Mzimba
    • 14 Nkhata Bay
    • 15 Rumphi
Southern Region (Rexón meridional)

    • 16 Balaka
    • 17 Blantyre
    • 18 Chikwawa
    • 19 Chiradzulu
    • 20 Machinga
    • 21 Mangochi
    • 22 Mulanje
    • 23 Mwanza
    • 24 Nsanje
    • 25 Thyolo
    • 26 Phalombe
    • 27 Zomba
    • 28 Neno


Referencies[editar | editar la fonte]

  1. Cartafueyos Normativos. Nomes de los países del mundu y de les sos capitales y xentilicios, Academia de la Llingua Asturiana, 2010; ISBN 987-84-8168-500-8
  2. «Malawi economy grew by around 9.7 pct in 2008: IMF». Reuters Africa (1 d'abril, 2009).
  3. «Malawi releases the 2008 MDGs Report». United Nations Development Programme Malawi (23 d'avientu, 2008).
  4. «Malawi Roads Map». National Roads Authority, Malawi.
  5. http://www.zeleza.com The Zeleza post: Noticies fiables y comentarios del mundu panafricanu



África
Angola | Arxelia | Benín | Botswana | Burkina Faso | Burundi | Cabu Verde | Camerún | República Centroafricana | Chad | Islles Comores | El Congo | República Democrática d'El Congo | Costa de Marfil | Djibouti | Eritrea | Etiopía | Exiptu | Gabón | Gambia | Ghana | Guinea | Guinea-Bissau | Guinea Ecuatorial | Kenya | Lesotho | Liberia | Libia | Madagascar | Malawi | Mali | Marruecos | Mauriciu | Mauritania | Mozambique | Namibia | Níxer | Nixeria | Islles Seychelles | Sudáfrica | Tanzania | Rwanda | São Tomé y Príncipe | Senegal | Sierra Leone | Somalia | Sudán | Sudán del Sur | Swazilandia | Togo | Túnez | Uganda | Zambia | Zimbabwe

Dependencies: Islles Kerguelen | Mayotte | Reunión | Sáhara Occidental | Socotra | Tromelin