Llucha grecorromana

De Uiquipedia
Saltar a: navegación, buscar
Llucha grecorromana

La llucha grecorromana ta considerada pola Federación Internacional de Lluches Asociaes (FILA) como una de les cuatro principales formes de llucha amatéur, y ta presente Xuegos Olímpicos modernos dende 1896.

Neta al pancraciu, la llucha grecorromana tamién yera un deporte importante nos festivales griegos. Yera parte del pentatlón de l’antigua Grecia, una triba de campeonatu atléticu que tamién incluyía carrera, saltu, xavalina y discu. Los griegos valoraben la llucha llibre como una forma perbona de desendolcar l’habilidá física y mental.

Na so forma moderna, la llucha grecorromana tien más de deporte que d’arte marcial, y debe más al estilu de llucha llibre francesa del sieglu XIX qu’al antiguu pancraciu. Nun hai que tracamundiala cola llucha llibre, porque la llucha grecorromana sigue unes regles centraes dafechu na parte superior del cuerpu, pudiendo’l competidor usar solamente los miembros superiores y atacar al contrariu penriba la cintura. L’oxetivu ye inmovilizar los costazos del adversariu hasta que se dea. La llucha grecorromana tien un estilu y téunica únicos en comparanza con otres formes de llucha; una carauterística propia ye la llucha coles manes, como por casu l’habilidá de controlar y remanar les manes y brazos del adversariu p’algamar ventaya nel intre de contracción de los miembros superiores. Los atletes d’esta modalidá son xeneralmente fuertes enforma darréu que la llucha grecorromana esixe bastante de los miembros superiores. Como estilu torga ataques y golpes perbaxo la cintura, y los competidores son afalaos a valtar al adversariu al nun poder usar les piernes pa torgar que los tiren.

La llucha grecorromana podría correr riesgu de desaniciu de los Xuegos Olímpicos por aciu de los cambeos na so estructura. La estructura de la llucha grecorromana foi cambiando por mor de la popularidá de les artes marciales mestes (mixed martial arts, MMA), y el vale tudo. Al ser la llucha grecorromana un arte que produxo campeones d’estos deportes, munchos atletes cambien les competiciones olímpiques poles artes marciales mestes. Una de les lleendes del UFC, Randy Couture, ye especialista en llucha grecorromana.

Enllaces esternos[editar | editar la fonte]