Llaranes
De Uiquipedia
Llaranes ye un barriu del conceyu asturianu d'Avilés, construyíu nos años 50 p'acoyer a los trabayadores que vinieron de tol estáu a trabayar na empresa siderúrxica Ensidesa (actual Aceralia). Construyéronse viviendes pa los trabayadores y les sos families, asina como servicios complementarios: colexu, ilesia, campos deportivos, economatu, etc.
Anguaño'l barriu xébrase en "Llaranes vieyu" (anterior a l'aporte d'Ensidesa y comprende la zona y cais alredor de l'antigua ilesia de San Llorienzu, patrón de Llaranes) y "Llaranes nuevu", (bloques de dos pisos y pantalles de trés, construíes nos años 50, asina como la espina: edificios de 8 a 10 plantes, construíu nos años 70).
Rescamplen tamién les instalaciones deportives de La Toba, con varios campos de fútbol y ḥoquei d'herba artificial, pista d'atletismu, pistes de tenis, polideportivu, etc.
Hai un estadiu de fútbol llamáu "Muro de Zaro", onde xugaba l'equipu de fútbol de "Ensidesa", que llueu pasó a llamase Real Avilés Industrial.
Hai dos colexos d'educacion primaria colos sos respeutivos parbulinos, el Colexu Públicu de Llaranes y el Colexu Públicu Apolinar Garcia Hevia y nél tamién esiste un complexu pa formar aprendices pa l'acería.
El barriu tien un equipu de fútbol, el Llaranes C.F., que milita en Segunda Rexonal Preferente.
