K-1

De Uiquipedia
Saltar a: navegación, buscar

K-1 ye una marca rexistrada pa la promoción de torneos de deportes de combate (básicamente Kickboxing) con sede en Tokyo, Xapón. Los torneos de K-1, arriendes del Kickboxing, combinen téuniques estrayíes de dellos deportes y artes marciales como Muay Thai, Kárate, Taekwondo, Savate o Boxéu ente otres. El K-1 foi creáu por Kazuyoshi Ishii, que fundara en 1980 la organización Seidokaikan Kárate na ciudá d’Osaka. La Seidokaikan Kárate organizó mui bien dellos combates contra otres escueles d’artes marciales, usando regles basaes nes del Kyokushin Knockdown, anque foron adulces adaptándoles a les del kickboxing. En 1993 Kazuyoshi Ishii funda la organización K-1, y nesi añu celébrase’l K-1 Grand Prix nel Estadiu Yoyogi.

Anguaño la organización de K-1 llévala’l "Fighting and Entertainment Group" (FEG) de Xapón, y l’entamu más importante ye’l K-1 World Grand Prix.

Regles[editar | editar la fonte]

Cada combate ye a tres asaltos y cada asaltu dura tres minutos. El combate pue terminar por K.O., K.O. téunicu, decisión del xuráu o descalificación. Tanto l’árbitru como’l médicu del ring tienen autoridá dafechu pa parar el combate. Esti síguenlu tres xueces que puntúen según un sistema de diez puntos, recibiendo los diez el ganador de cada asaltu, mientres que’l perdedor recibe nueve o menos. Si se produz l’empate, dambos lluchadores reciben diez puntos.

Si hai empate al cabu de los tres asaltos, les puntuaciones de los xueces desapúntense y dexen de contar pa otru asaltu estra de tres minutos de duración; el xuráu puntuará otra vuelta l’asaltu estra. Si dempués d’esta nueva ronda inda hai empate, los xueces decidirán un ganador basándose nel trescurrir de tol combate, teniendo en cuenta hasta la diferencia más pequeña. Un combate sólo pue terminar n’empate téunicu si entrambos lluchadores cayen al empar y nun son a llevantase, o nel casu de mancadures accidentales nos últimos momentos del combate. El procedimientu obligatoriu de cuenta ye hasta ocho.

Faltes[editar | editar la fonte]

Les siguientes aiciones considérense faltes nel K-1:

  • Usar la cabeza o’l coldu pa golpiar.
  • Atacar a los xenitales.
  • Facer proyeiciones de llucha o de yudu o téuniques de sumisión.
  • Meter los pulgares nos güeyos, estrangular o morder.
  • Los puñetazos al gargüelu.
  • Atacar al oponente cuando ta en suelu o nel intre de llevantase.
  • Atacar al oponente acabante l’árbitru de dictar dixebra.
  • Garrase a les cuerdes.
  • Usar un llinguax ofensivu haza l’árbitru.
  • Tentar que l’adversariu caiga fuera’l ring.
  • Salir arrémente del ring nel trescursu d’un combate.
  • Atacar a un oponente que se da la vuelta y amuesa’l llombu (a nun ser que pierda la voluntá de siguir lluchando).
  • Solmenar un golpe de revés en xiru nun área non autorizada.
  • Cargar dientro de los brazos del otru cola cabeza baxa (produciendo un cabezazu)
  • Lluchar de forma pasiva (ensin atacar), incluyendo los agarres y cuerpu a cuerpu continuos.
  • Atacar más d’una vez mientres se tien agarrada la pierna del oponente, o mientres se tien agarráu al oponente pel pescuezu con dambes manes.

Sanciones[editar | editar la fonte]

  • Avisu: reña verbal del árbitru.
  • Alvertencia: el lluchador recibe una tarxeta mariella.
  • Descuentu de puntos: el lluchador recibe una tarxeta encarnada.
  • Tres dos reñes o tarxetes marielles el lluchador pierde puntos, y tres tres reñes o tarxetes marielles el lluchador ye descalificáu.
  • La tarxeta encarnada amuésase automáticamente si un lluchador comete una falta a costa fecha.

Campeones del K-1 World Gran Prix[editar | editar la fonte]

  • 1993 - Branko Cikatić
  • 1994 - Peter Aerts
  • 1995 - Peter Aerts
  • 1996 - Andy Hug
  • 1997 - Ernesto Hoost
  • 1998 - Peter Aerts
  • 1999 - Ernesto Hoost
  • 2000 - Ernesto Hoost
  • 2001 - Mark Hunt
  • 2002 - Ernesto Hoost
  • 2003 - Remy Bonjasky
  • 2004 - Remy Bonjasky
  • 2005 - Semmy Schilt
  • 2006 - Semmy Schilt
  • 2007 - Semmy Schilt
  • 2008 - Remy Bonjasky

Bibliografía[editar | editar la fonte]