Samartín de Grazanes

Grazanes ye una parroquia del conceyu asturianu de Cangues d'Onís.

Ta formáu polos vinientes núcleos de población: Samartín, Beceña, Cuerres, Llenín, Tarañu y Villaverde. El llugar de Soto de la Ensertal paez ser que foi agregáu a la parroquia de Con.

Nel pueblu de Samartín alcuentrase la ilesia parroquial, del sieglu XII, d'estilu románicu. L'antigua Casa Reutoral ta, por mor del so abandonu por parte del obispáu, en ruines dafechu.

Nel sitiu conocíu como La Torre alcuentrense los restos d'una fortificación que daten de los tiempos de la reconquista, les guerres escontra los moros.

La parroquia ye eminentemente ganadera, anque por mor del so allugamientu, con unes vistes privilexaes sobre los Picos d'Europa, empieza a despuntar el turismu rural y de fuelga.