Gran Esposición

De Uiquipedia
Saltar a: navegación, buscar

Gran Esposición, (n'inglés Great Exhibition of the Works of Industry of all Nations) nome cola que se conoz a la esposición universal cellebrada en 1851 en Londres. Concebida p'amosar el progresu de tol mundu: maquinaria, productos manufacturaos, escultures, materies primeres, tolos frutos de la creciente industria humana y del so ilimitáu maxín. La so apertura, el 1 de mayu, en Hyde Park, amosó toes estes maravíes nuna maraviya más: The Crystal Palace (el Palaciu Cristal). El príncipe Albertu, maríu de la Reina Victoria, foi'l principal promotor d'esta esposición.

Grabáu amosando la entrada al Crystal Palace en Hyde Park

Esta exhibición simboliza ya entama la mirada del ser humanu haza'l progresu y la modernidá; amosó nel so tiempu, la supremacía d'Inglaterra como'l país más avanzáu industrialmente. Los artículos ingleses, ocupaben más de la metá del Crytal Palace, ya espeyaben el sutil confliutu ente lo vieyo y lo nuevo que tantu esmoleció a la Europa del sieglu XIX. Varios países mandaron los sos productos, dientru de los cualos tovía podía vese muncha manu artesanal. Les colonies ingleses, unviaron una gran variedá de productos que cautivaron el maxín del públicu inglés. Amás, ye equí onde s'entamó a ver la estremancia ente un emerxente grupu que sedría'l Primer Mundu escontra otros que depués sedríen países en "vía de desendolque" o'l Tercer Mundu.

Como bas d'esta esposición, s'alcontraba la fe na conocencia científica. La ciencia taba produciendo nuevos y poderosos camudamientos na manera de producir y de ver la vida, camudando asina mesmu'l pensamientu. L'home quería tener la mayor conocencia posible pa poder controlar a la ñatura. Les ciencies como la física, la xenética, la sicoloxía, l'antropoloxía y la socioloxía, escomenzaron a tener más adeutos pal so estudiu, propiciando camudamientos y descubriciones na aplicación de nueves conocencies científiques.