Ramón García Tuero

De Wikipedia
(Redirixío dende Gaiteru Libardón)
Ramón García Tuero
Vida
Nacimientu Arroes6 de febreru de 1864[1]
Nacionalidá España
Muerte Lliberdón21 d'ochobre de 1932[1] (68 años)
Estudios
Llingües falaes castellanu
Oficiu músicu
Instrumentu musical gaita asturiana
Cambiar los datos en Wikidata

Ramón García Tuero (6 de febreru de 1864Arroes – 21 d'ochobre de 1932Lliberdón), conocíu como'l gaiteru Libardón foi un gaiteru y cantaor asturianu de gran popularidá. Fixo xires per Europa y América, participó en varies esposiciones universales y grabó'l primer discu de gaita asturiana.

Ramón García Tuero nació en Molín del Matu (ArroesVillaviciosa) el 6 de febreru de 1864. El nomatu de Gaiteru Libardón col que ye conocíu vien–y del nome castellanizáu del pueblu de Lliberdón, del que yera la muyer, María Caravera, y pa onde foi a vivir tres casar con ella en 1890.

De rapaz prestába-y tocar flautes o xiblates feches de castañu con una navaya. Los padres viendo la so soltura, l'inxeniu y les dotes pa la música, compráron-y una gaita sobre los años setenta del sieglu XIX, que-yos costara seis pesetes. Con ella comienza a despuntar nos pueblos de la zona d'Arroes.

García Tuero solía actuar solu o acompañáu al tambor, les más de les veces de José García, conocíu como'l Tambor de l'Abadía. Tuero tenía la peculiaridá de tocar la gaita y cantar a la vez, improvisando munches de veces los cantares.

Inda que yá yera conocíu como músicu nes romeríes, algamó la fama a los 25 años, cuando en 1889 representó a la empresa de sidra El Horreo, de Colunga, na Esposición Mundial de París d'esi mesmu añu y participó depués n'otres como les de 1900 na mesma ciudá de París, la de 1911 en Buenos Aires o les deBarcelona y Sevilla en 1929.

Prueba del so éxitu son tamién les xires que fixera per Europa y América, les numberoses condecoraciones españoles y estranxeres que recibió y el tratu que llegó a tener col rei Alfonsu XIII o col dictador Miguel Primo de Rivera. Llegó ser el gaiteru oficial del rei español. Foi tamién músicu titular de l'agrupación La Infiesta.

Nuna época na que la industria fonográfica taba principiando, foi un artista pioneru. Grabó'l primer discu de gaita asturiana en 1909 convirtiéndose nel primer músicu asturianu n'acceder a la grabación. Dos años más tarde robló un contratu en Milán pa diez años pol que se comprometía a grabar cuarenta cantares. La imaxe pública que gastaba como músicu valíase de la tradición y l'asturianía, vistiendo siempre col traxe'l país pa definise internacionalmente como gaiteru asturianu col envís de diferenciase y d'identificase con Asturies y l'autenticidá como músicu.

García Tuero morrió en Lliberdón el 21 d'ochobre de 1932. El diariu Informaciones, de Madrid, con motivu del so fallecimientu dio la noticia na portada cola lleenda:

Asturias en su comarca de Libardón, se han quedado sin su mejor gaitero.

El 10 d'agostu de 1969 rindióse-y un homenax en so casa de La Quintana, que tovía se pue visitar actualmente y na que se guarden parte de los instrumentos y ropa qu'usó nes sos actuaciones.

En 1986 el gobiernu del Principáu editó un discu con una seleición de los sos temes más populares.

Referencies[editar | editar la fonte]

  1. 1,0 1,1 Afirmao en: Diccionario biográfico español. Identificador DBE: 66923/ramon-garcia-tuero. Apaez como: Ramón. El Gaitero Libardón García Tuero. Data de consulta: 9 ochobre 2017. Editorial: Real Academia de la Historia. Llingua de la obra o nome: castellanu. Data d'espublización: 2011.

Enllaces esternos[editar | editar la fonte]