Güestia

De Wikipedia
Pintura de Hans Meyer (1846-1919): La muerte encabezando la procesión

La güestia[1] o Santa Compaña[2] ye un grupu d'ánimes que visiten a los moribundos pocu enantes de morrer. Normalmente tán formaos por antiguos conocios del moribundu qu'efectuaron el viaxe enantes que él. Suelen portar güesos prendios y sudarios blancos, y n'ocasiones lleven un ataud nel cual llevarán l'ánima del futuru fallecíu. La misión de la Güestia nun ye infundir temor a los vivos, sinón solo de servir de porteadores del anima del futuru difuntu. Anque nun son peligrosos si un vivu por error o despiste alcuéntrase con ellos y tócalos sufriría la muerte él tamién, polo que pa defendese nesti casu había que facer un círculu nel suelu y metese nél.

En San Xuan de Beleño considerábase tamién como un índiz de seguridá el suxetase o arreyase a la cría machu d'una vaca: un xatu [3].

Versos de los componentes de la Güestia:

Cuandu nós yéramos vivos
andábamos a éstos figos
y agora que somos muertos
andamos per estos güertos
¡Andar, andar,
hasta'l tueru la figar!

La procesión o grupu d'ánimes arrodia trés vegaes la casa d'un moribundu, y al finar la tercer vuelta, en enfermu muerre, y la so imaxe apaez nel ataúd que llebaven los cuatro espectros, o conviértese na imaxe del muertu la forma que había nes andes portaes poles figures fantasmales. Entós la Güestia, glaya, apáguense les lluces y desaparecen.

La ronda davezu dura siete nueches, y óyense cánticos tristayos. La imaxe del desahuciáu figura na procesión, de tal mou que si se ve a un vecín nella, albídrase la so muerte. Aurelio de Llano cunta'l siguiente asocedíu en Caravia[3]

Y cunten qu'una nueche, una muyer que vivía na Teyera, oyó'l soníu d'una campaniella; asomóse a la ventana y acolumbró a dos fileres de persones con veles enceses, que s'averaben al pueblu. Camentando que tratábase de viaticar a dalgún vecín, garró una vela y acercóse a un miembru del grupu que-y la encendió, y dempués siguió darrera d'ellos hasta la casa d'un enfermu.
Una vegada que finó la ceremonia, la muyer tornó pa so ca y la comitiva siguió en direición al conventu de Santiago. A la nueche siguiente, la bona muyer oyó otra vegada la campaniella, foi a garrar la vela que guardara nel estoxu del arca, y alcontróse con un güesu. Salió a la cai, empobinó pal que la nueche anterior-y encendiere la vela y díxo-y:
- "Pantasma de la Güestia, toma esti güesu y dame la mio vela!"
- "Malditu seya'l que t'ensiñó" - dixo'l de la comitiva; y dio-y la vela a la muyer. Y ye que la vela alliviaba les penes d'aquella alma; por eso se quedare con ella.

Na tradición gallega[editar | editar la fonte]

En Galicia recibe'l nome de "Santa Compaña". Nesti, la "Santa Compaña" ye una lleenda fantástica sobre una procesión d'ánimes o apaecíos qu'escurre dende los dolce de la nueche polos términos d'una parroquia col propósitu de visitar, o alvertir, a toes aquelles cases nes qu'en curtia va haber un óbito, decesu o fallecimientu.

Na traducción estremeña[editar | editar la fonte]

En Les Hurdes (Estremadura) apaez un Corteju de Genti de Muerti compuestu por dos caballeros pantasmales que causen de madrugada la llerza polos pueblos, una y bones quien los ve pue resultar muertu.

Proteición[editar | editar la fonte]

Contar la lleenda supón tamién una proteición escontra esta procesión de non muertos.

  • Abrir los brazos en cruz y pronunciar Xesucristu cuando te vaigan dar la cruz.
  • Responder "Cruz yá tengo" cuando'l vivu que lleve la cruz intente dar la cruz diciendo "tócate a ti" o "toma tu".
  • Llevar los brazos cruzaos.
  • Llevar les dos manes ocupaes, con una piedra, un palu...
  • Cuenta la lleenda que la Güestia nun va tener el poder de prindar l'alma del mortal que se crucia con ella si esti s'atopa nos pasos de dalgún cruceru de los asitiaos nes cruces de caminos o si porta una cruz consigo y llogra remanala a tiempu.
  • Dibuxar con xiz un círculu en suelu y metese dientro mientres la Güestia pasa.

Referencies[editar | editar la fonte]

  1. Esti términu apaez nel Diccionariu de l'Academia de la Llingua Asturiana. Ver: güestia, la
  2. Esti términu apaez nel Diccionariu de l'Academia de la Llingua Asturiana. Ver: compaña, la
  3. 3,0 3,1 Supersticiones y creencias de Asturias. Ayalga Ediciones, 1976. Luciano Castañón. ISBN 84-400-9864-2

Enllaces esternos[editar | editar la fonte]