Felibritge

De Uiquipedia
Saltar a: navegación, buscar

El Felibritge (Felibrige según les sos normes ortográfiques) ye una asociación fundada por Frederic Mistral y otros escritores provenzales a mediaos del sieglu XIX col envís de preservar y difundir la llingua y la cultura de les rexones de llingua occitana.

Aparte de los escritores provenzales que tuvieron nel orixe del movimientu, como Josèp Romanilha y Teodòr Aubanèu, formaron parte del Felibritge autores d'otres rexones como Miquèu Camelat (Gascuña) Simin Palay (Béarn), Justin Besson (Rouergue) o Arsèni Vermenosa (Auvernia).

L'actual capolier ("cabezaleru") del Felibritge ye Pèire Fabre.


Orixe del nome[editar | editar la fonte]

La pallabra Felibrige ye un neoloxismu creáu a partir de Felibre, que designa a los sos miembros. Mistral atribúi-yos a esti términu y el so femenín felibresso (felibressa según la norma ortográfica clásica) el significáu de "Sabios" . El so empléu ta cargáu de connotaciones místiques y evoca per otra parte la pallabra occitana libre, que se pue traducir a la vez por "llibru" y "llibre".

Dellos autores propunxeron como etimoloxíes posibles l'español feligrés, o'l llatín fellebris ("neñín de pechu"). Según estes interpretaciones, el llabor de los poetes, alimentaos pola lleche de les muses, garra una dimensión relixosa.

Sicasí, la interpretación más probable ye que'l térmínu venga d'un error d'interpretación nun versu d'un cantar popular, Lis revelacions de sant Antòni, qu'evoca los siete dolores de la Virxe María. El tercer d'ellos foi'l de perder a so fíu que s'alcontraba nel templu "emé li Sefer , libre de la lei" ("colos Sefer, llibros de la llei"). El desconocimientu de la pallabra sefer ("rollu que contién los llibros sagraos" n'hebréu) y la tresmisión oral d'esti cánticu llevó a que s'entendiere como "emé li sèt felibre de la lèi", otorgando-y a la secuencia "felibre" el significáu de "sabiu" o "intérprete de los testos sagraos".

Organización[editar | editar la fonte]

Los primeros estatutos del Felibritge, fueron redactaos por Frederic Mistral en 1862. A lo llargo de la historia, estos estatutos conocieron varies modificaciones, principalmente en 1876, 1905 y 1911, siendo la última la de 1997.

Según los estatutos de 1876, debíos a Mistral, al barón Charles de Tourtoulon y al marqués de Villeneuve-Esclapon, los miembros de l'asociación, conocíos como felibres, divídense en mantenaires y majoraus (majouraus según la norma ortográfica mistraliana). Los primeros son los simples miembros interesaos pola defensa de la llingua occitana, mientres que los segundos reciben el reconocimientu polos sos méritos lliterarios.

El Felibritge ta presidíu por un capolier (capouliè según la norma ortográfica mistraliana). Ta asistíu por una asamblea, el Consistòri (Counsistori ) formada por 50 majoraus, nomaos con carácter vitaliciu.

Los felibres axúntense en Mantenenças (Mantenènço) que correspuenden a los diferentes dialectos occitanos. Cada Mantenença ta formada por varies Escòlas (Escolo). Asina, a finales del sieglu XIX, formaben parte de la Mantenença de Provenza les secciones que vienen darréu: Lou Flourege (Aviñón), Escolo dis Aup (Forcalquier), Escolo de la mar (Marsella), Escolo de Lar (Aix-en-Provence), Escolo doufinalo (Valence), Escolo de Belanda (Niza), Escolo de la Mountagno (Gap), Escolo de Lerin (Cannes), Escolo de la Sedo (Lyon), Escolo dou Lioun (Arles), Escolo de Tamaris (Toulon), Escolo dou Ventor (Carpentras).

Enllaces esternos[editar | editar la fonte]