Espionax

De Uiquipedia
Saltar a: navegación, buscar

Conozse col nome d'espionax al conxuntu de práutiques y téuniques empobinaes a algamar información de calter secretu. Les téuniques propies ya hestóriques del espionax foron siempres la infiltración, el sobornu y el chantax.

  • La infiltración ye l'emplegu d'una persona, denomada topu, que tien por xera qu'aquellos que tienen la información s'enfoten nella pa tener accesu a ella.
  • El sobornu ye'l procesu de compra d'información con perres o otros medios, anque tamién emplégase davezu la coacción p'algamala, téunica denomada chantax polo xeneral al traviés de la obtención d'información de calter personal sobro'l chantaxeáu, qu'esti nun quier se se faiga pública.

De toes formes, toes estes téuniques básense nel emplegu d'informadores que puen cayer embaxo les redes d'a quien se quería espiar, tresformándose d'esti xeitu n'axentes duples, polo que la información qu'apurren nun ye siempres verídica.

Col desendolcu de les nueves teunoloxíes, apaecieron téuniques que valen pa sacar información oxetiva como semeyes, converses, etc. ensin intervención humana. D'esti mou, hai anguaño una industria destinada a la producción de medios teunolóxicos, dende satéllites espíes fasta microcámares, lo mesmo pal espionax que pa la proteición de la información.

L'espionax industrial ye la obtención illícita d'informaciones rellatives a la investigación, desendolcu y producción de prototipos. Con estes informaciones, les empreses puen adelantase a les sos competidores na colocación nel mercáu d'un productu nuevu.

Tamién, cola apaición de los nuevos medios de tresmisión de la información nos que la rede dixital ye'l mayor exemplu, atópense les téuniques pa codificar la información, non namás téunica, sinón tamién privada, qu'impiden qu'un terceru qu'interceute'l mensax seya quien a interpretalu.

Enllaces rellacionaos[editar | editar la fonte]