Elleiciones parlamentaries escoceses de 2007

De Uiquipedia
Saltar a: navegación, buscar

Les eleiciones parllamentaries escoceses de 2007 son les terceres eleiciones xenerales del Parllamentu escocés dende la so refundación en 1999. Les votaciones desendolcáronse'l xueves 3 de mayu 2007, dos díes dempués del tricentenariu de l'Acta de xunidá qu'unifica Escocia ya Inglaterra en 1707.

Foron éstes unes eleiciones mui esperaes por mor de les encuestes favoratibles al Partíu nacional escocés (Scottish National Party) y el proyeutu de dixebra que representa un aspeutu central nel so programa. Les eleiciones a conceyu tovieron llugar el mesmu día. Dempués de dellos problemes importantes col sistema de votu lleutrónicu, diéron-y la victoria al Partíu Nacional Escocés, con un escañu más que'l Partíu llaborista.

Desendolcu[editar | editar la fonte]

Jack McConnell, como Primer Ministru, implicóse nes eleiciones con una pequeña mayoría de 5 escaños fecha por mor d'una coalición de diputaos del Partíu llaborista y del partíu de los Demócrates lliberales. Les cuestiones principales na campaña foron la National Health Service (Sanidá), l'enseñu, la reforma de la "council tax", les pensiones, l'Union y la independencia, y l'enanchamientu de los poderes del Parllamentu escocés. Dellos partíos suxirieron tamién pasar el llímite d'edá de 16 a 18 años pa dexar la escuela y aumentar la edá mínima pa mercar tabacu.

Na mañana del 4 de mayu, los resultaos de les eleiciones inda taben paralizaos polos problemes del nuevu sistema de votu lleutrónicu. Confirmóse a la fin na tardi d'esi mesmu día que'l Partíu Nacional Escocés yera'l ganador de les eleiciones con namái qu'un escañu de diferencia. La comisión elleutoral comprometióse a investigar les 100.000 papeletes refugaes.

Los analistes preveíen que'l Partíu Nacional Escocés habría pautar colos Demócrates Lliberales si quier facer una coalición. Esto causaría-yos un problema a los nacionalistes, tres de que los lliberales confirmaren nun tener la intención de sofitar el proyeutu d'independencia y, por mor d'ello, la llexislación ñecesaria pa entamar un procesu plebiscitariu. Entrevese tamién una alianza colos verdes, que son, como'l PNE, un partíu progresista ya independentista.

Resultaos[editar | editar la fonte]

  • Aspeutu de la nueva composición del Parllamentu:
Parllamentu escocés.