Edwin E. Aldrin

De Uiquipedia
Saltar a: navegación, buscar
Edwin E. Aldrin

Edwin E. Buzz Aldrin (ñacíu en Monclair, Nueva Jersey, 20 de xineru de 1930) foi astronauta de la NASA y la segunda persona en pisar la Lluna na llexendaria misión del Apolo XI.

Aldrin asistió a l'Academia Militar de los Estaos Xuníos en West Point, y entró a la Fuercia Aérea de los Estaos Xuníos aú recibió entrenamientu como pilotu en 1951. Aldrin voló en 66 misiones de combate n'aviones F-86 demientres la Guerra de Corea, baltiando dos MIG-15. Conocíu por toos al traviés del so nomatu, "Buzz", Aldrin foi amás una de les figures más importantes nel llogru del Programa Apolu colo cual los estaunidenses llegaron a la Lluna en 1969, venciendo a los soviéticos demientres la carrera espacial.

Aldrin convirtióse n'astronauta mentantu la seleición del tercer grupu de la NASA n'ochobre de 1963. El 11 de payares de 1966 voló al espaciu a bordu de la Gemini XII, un vuelu de 4 díes de duración nel cual orbitó 59 vueltes alredor la Tierra, finando esitosamente'l Programa Gemini. La seleición d'astronautes resultó ser l'acondada yá qu'Aldrin foi una de les figures más importantes trabayando demientres el Proyeutu Gemini pal problema del acoplamientu de naves n'órbita terrestre o llunar. Ensin estos entrenamientos les misiones Apolo enxamás nun podríen tenese concretaos. Aldrin, que tenía un doctoráu n'astronáutica del Institutu de Teunoloxía de Massachusetts, taba perfechamente calificáu pa esti trabayu, y les sos enclinaciones intelectuales aseguráron-y llevar a cau les sos xeres con gran entusiasmu.

Sistemáticu y llaborioso, Aldrin trabayó pa desendolcar ferramientes y procedimientos afayadizos p'algamar l'alcuentru y acoplamientu espacial. Aldrin tamién foi una figura central p'afitar los métodos afayadizos pa llevar a cau les actividaes estravehiculares (EVA) que los astronautes faen fuera de les sos naves. Esti foi otru de los avances críticos pal ésitu d' Apolu.

Aldrin sobro la superficie llunar

Aldrin foi elexíu como pilotu de la tripulación de la misión d'Apolu XI. D'esta mena'l 20 de xunetu de 1969 llograron cumplir col mandáu del entós presidente John F. Kennedy, qu'estableciera unviar a los primeros estaunidenses a la Lluna enantes de la fin de la década de 1960.

Aldrin foi la segunda persona en triar la Lluna dempués del comandante de la misión, Neil Armstrong, y los dos pasaron cerca de 20 hores sobro la superficie llunar enantes de tornar al módulu de comandu Apollo, onde Michael Collins-yos esperaba pa emprimar el so viaxe de torna. La nave y los sos esploradores tornaron pa la Tierra'l 24 de xunetu de 1969. Pesia al ésitu algamáu cola arribada a la Lluna, Aldrin entró nuna fondera depresión pocu tiempo depués de la so torna y nunos meses más sero entamó a tener problemes d'alcoholismu. Gracies a un duru tratamientu Aldrin puo recuperase y convertise na personalidá pública que ye anguañu.

En 1971 Aldrin tornó a la Fuercia Aérea y retiróse un añu más sero. Escribió dos llibros importantes sobro les sos actividaes nel programa espacial d'Estaos Xuníos. En Return to Earth (1970), Aldrin remembra'l vuelu del Apolu XI. En Men from Earth (1989), alderica acerca de la carrera espacial ente los Estaos Xuníos y la Xunión Soviética.

Edwin Aldrin ye un importante analista del programa espacial dende la década de 1960. A estremancia de los sos collacios, siempres foi'l más espuestu a los medios; yá seya pa conferencies n'universidaes, entrevistes, ya inclusu conferencies sobro futuribles viaxes a Marte. Anguañu vive cerca de Los Ánxeles, California.

Tres esti hestóricu viaxe, foi afalagáu xunta los sos collacios por diversos países, recibiendo numberoses condecoraciones, ente elles la Medal for Freedom del Presidente de los Estaos Xuníos, la Distinguised Service Medal de la NASA, o l'Air Medal, ente otres.

Depués de delles depresiones, que-y somorguiaron nel alcohol, tien algamao sortir de l'adicción y continúa dando conferencies sobro la so esperiencia llunar y escribiendo llibros sobro ciencia ficción. Una de les sos frases más controvertíes ye: “Si aportamos a la Lluna nun foi pa estudiala nin recoyer mueses del so suelu, sinón p'aventayar a los rusos na carrera espacial. Tolo demás quedó en segundu planu...”.

Ye miembru honorariu del American Institute of Aeronautics and Astronautics y tien trabayáu nes especificaciones pal diseñu del proyeutu del tresbordador espacial, siendo amás autor de dos llibros sobro'l programa espacial norteamericanu: “Return to Earth” (1970) y “Men from Earth” (1989).

Aldrin recibío numberoses mofles per aciu a que la so ma nomábase Moon (Lluna n'inglés) y por ser el primer ser humanu en realizar "agües mayores" sobro la superficie llunar.


Bibliografía[editar | editar la fonte]

Enllaces esternos[editar | editar la fonte]