Ecosistema
| Ecosistema | |
|---|---|
| tipu de sistema | |
sistema biológico (es)  | |
 | |
 |
Un ecosistema ye un sistema que ta formáu por un conxuntu d'organismos vivos (biocenosis) y el mediu físicu onde se rellacionen (biotopu). Un ecosistema ye una unidá compuesta d'organismos interdependientes que comparten el mesmu hábitat. Los ecosistemes suelen formar una serie de cadenes qu'amuesen la interdependencia de los organismos dientro del sistema.[1] Tamién puede definise asina: «Un ecosistema consiste de la comunidá biolóxica d'un llugar y de los factores físicos y químicos que constitúin l'ambiente abiótico».[2]
Esti conceutu, qu'empezó a desenvolvese ente 1920 y 1930, tien en cuenta les complexes interacciones ente los organismos (por casu plantes, animales, bacteries, protistas y hongos) que formen la comunidá (biocenosis) y los fluxos d'enerxía y materiales que lo traviesen.[3]
Descripción[editar | editar la fonte]
El términu ecosistema foi acuñáu en 1930 por Roy Clapham pa designar el conxuntu de componentes físicos y biolóxicos d'una redolada. L'ecólogu británicu Arthur Tansley refinó más tarde el términu, y describolu como «El sistema completu, ... incluyendo non yá el complexu d'organismos, sinón tamién tol complexu de factores físicos que formen lo que llamamos mediu ambiente».[4] Tansley consideraba los ecosistemes non a cencielles como unidaes naturales sinón como «aislamientos mentales» («mental isolates»). Tansley más palantre definió la estensión espacial de los ecosistemes por aciu el términu «ecotopo» («ecotope»).[5]
Fundamental pal conceutu d'ecosistema ye la idea de que los organismos vivos interactúen con cualesquier otru elementu na so redolada llocal. Eugene Odum, unu de los fundadores de la ecoloxía, declaró: «Toa unidá qu'inclúi tolos organismos (esto ye: la comunidá”) nuna zona determinada interactuando cola redolada física de tala forma que un fluxu d'enerxía conduz a una estructura trófica claramente definida, diversidá biótica y ciclos de materiales (esto ye, un intercambiu de materiales ente les partes vivientes y non vivientes) dientro del sistema ye un ecosistema».[6] El conceutu d'ecosistema humanu básase en desmontar la dicotomía humanu/naturaleza y na premisa de que toles especies tán ecológicamente integraes unes con otres, según colos componentes abióticos del so biotopu.
Bioma[editar | editar la fonte]
Un bioma ye una clasificación global d'árees similares, incluyendo munchos ecosistemes, climática y xeográficamente similares, esto ye, una zona definida ecológicamente en que se dan similares condiciones climátiques y similares comunidaes de plantes, animales y organismos del suelu, son de cutiu referíes como ecosistemes de gran estensión. Los biomes defínense basándose en factores tales como les estructures de les plantes (árboles, arbustos y yerbes), los tipos de fueyes (plantes de fueya ancha y aguya), la distancia ente les plantes (monte, selva, sabana) y el clima. A diferencia de les ecozonas, los biomas nun se definen por xenética, taxonomía o semeyances históriques ya identifíquense con frecuencia con patrones especiales de socesión ecolóxica y vexetación clímax.
La clasificación más simple de biomes ye:
- Biomas terrestres.
- Biomas d'agua duce.
- Biomas marinos.
Ver tamién[editar | editar la fonte]
Referencies[editar | editar la fonte]
- ↑ Christopherson, RW (1994) Geosystems: An Introduction to Physical Geography.
- ↑ The Concept of the Ecosystem.
- ↑ Tansley, AG (1935) The use and abuse of vegetational terms and concepts.
- ↑ «The whole system,… including not only the organism-complex, but also the whole complex of physical factors forming what we call the environment».
- ↑ Tansley, AG (1939) The British islands and their vegetation.
- ↑ «Any unit that includes all of the organisms (ie: the "community") in a given area interacting with the physical environment so that a flow of energy leads to clearly defined trophic structure, biotic diversity, and material cycles (ie: exchange of materials between living and nonliving parts) within the system is an ecosystem.
Bibliografía[editar | editar la fonte]
- Ehrlich, Paul; Walker, Brian "Rivets and Redundancy". BioScience, vol.48 non. 5. Mayu de 1998. páxs. 387. American Institute of Biological Sciences.
Enllaces esternos[editar | editar la fonte]
Wikimedia Commons acueye conteníu multimedia sobre Ecosistemas.
Datos: Q37813- Multimedia: Ecosystems