Drabble

De Uiquipedia
Saltar a: navegación, buscar

Un drabble ye una obra lliteraria de ficción enforma curtia, exautamente 100 pallabres, magar que suel aceutase como drabble cualesquier hestoria curtia con menos de 500 pallabres. L'oxetivu d'ún drabble ye la brevedá y prebar la capacidá del autor pa espresar idegues interesantes nún espaciu llendáu.

Nos concursos de drabbles, dáse-yos a los participantes un tema y un tiempu pa escribir. Estos concursos son abondo populares ente les comunidaes de fanfiction (munches d'elles agrupaes en sitios como LiveJournal).

Dizse que'l conceutu de drabble ñació nel fandom de ciencia ficción del Reinu Xuníu nos años 80; y que'l formatu de 100 pallabres foi fixáu pola Birmingham University SF Society. El nome de drabble vién del Big Red Book de los Monty Python. Yera un xuegu de pallabres, nel que ganaba el primeru n'escribir la novela.

La llingua na que s'escribe un drabble ye perimportante na dificultá que tien pa facelu. Por exemplu, la fras: "Heittäytyisinköhän seikkailuun?" en finlandés, tórnase como: "¿Qu'asocedería si m'allanciara a la venturiega?. N'asturianu faen falta 6 pallabres ( y arriendes, que tán apostrofaes..) mentantu qu'en finlandés, 2 namái. Esto ye lo que fai qu'escribir un drabble nuna llingua seya más cenciello que n'otra.


Enllaces[editar | editar la fonte]