Daimyo

De Uiquipedia
Saltar a: navegación, buscar
Un daimyo en visita d’Estáu

Daimyo (xaponés 大名, daimyō) ye un términu xenéricu a respeutive los poderosos señores territoriales del antiguu Xapón, que gobernaben la mayor parte del país dende les sos posesiones llariegues, hereditaries y enforma grandes. En dichu términu, "dai" (大) significa lliteralmente "grande"; y "myō" vien de myōden (名田), col significáu de país particular.

Solamente subordinaos al shogun, los daimyo yeren los gobernantes feudales más poderosos de la hestoria de Xapón dende’l sieglu X a mediaos del sieglu XIX.

El términu "daimyo" úsase a veces a respeutive los cabezaleros d’aquellos clanes, a los que tamién llamaben "señores". Davezu, anque non siempre, yera d’estos señores de la guerra d’ente los que remanecía un shogun o d’ente los que s’escoyía un rexente.

Hestoria[editar | editar la fonte]

Dende los shugo (gobernadores provinciales) del periodu Muromachi, pasando pel periodu Sengoku, hasta los daimyo del periodu Edo, el rangu tuvo una hestoria llarga y variada.

Sicasí enantes del periodu Muromachi emplegábase más el títulu de myōden (名田) pa denomar los grandes propietarios de señoríos. Entós estos foron dividíos en kokushu (国主, gobernador d’una provincia polo menos), ryōshu (領主, gobernador d’un territoriu menos importante), y jōshu (城主, gobernadores de castiellos). Estos daimyo llibraben guerres continues col envís d’enantar los sos territorios. Nel sieglu XV, gracies a los pilancos qu’empatanaron el país, munchos shugo (守護) arramplaron con tierres y tomaron el títulu de shugo-daimyō (守護大名), construyendo castiellos pa defendese de les ambiciones espansionistes de los sos vecinos. Solamente foron pacificaos dempués de la batalla de Sekigahara, en 1600.

Nel periodu Edo, el términu daimyo aplicábase a unos doscientos príncipes o grandes señores de "han" (feudu) con un ingresu anual igual o superior a diez mil koku (unos 2.700 m3) d’arroz. Los que teníen ingresos menores denomábense shōmyō (小名, “pequeñu nome”).

Los daimyo pertenecíen a delles categoríes:

  • los shimpan daimyō (新藩大名), que pertenecíen a la familia Tokugawa.
  • los fudai daimyō (譜代大名), venceyaos personalmente al shogun Tokugawa.
  • los tozama daimyō (外様大名 o daimyo “esterior”), xuníos al bakufu.

Los daimyo, masque con della autonomía, taben asina y too suxetos a delles regles particulares, la mayor parte codificaes nel Buke Shohatto, y teníen que siguir la llei de les cases guerreres (武家, buke). Ente otres obligaciones, teníen la de caltener una residencia na corte d’Edo, vivir nella ún de cada dos años (o seis meses por añu) y cuando colaben pal han (feudu o señoríu) dexar como rehenes a la so familia y vasallos. Esti sistema yera’l “sankin kotai” ("presencia alterna"). El viaxe del daimyo a Edo pa rindir homenax al shogun llamábase daimyō gyōretsu (大名行列), esto ye la “procesión de los señores”. Esto facíase al envís d’agrandar el control políticu y fiscal qu’Edo exercía sobre los daimyo.

Dende 1639 yá nun teníen permisu pa construyir castiellos y barcos de gran calume, teníen que pechar contribuciones obligatories pa trabayos públicos como la construcción de carreteres, y teníen d’asegurase de que’l cristianismu nun s’asitiara nos sos territorios. Controlábense muncho les muestres de puxu militar de los daimyo.

Trestornaos por estos controles, y davezu en mala situación económica por aciu de coses como’l sankin kotai, el sofitu forciáu de los trabayos públicos y los gastos estravagantes, munchos daimyo rebalbiaron contra’l shogunáu Tokugawa na Restauración Meiji. Al añu siguiente de la restauración, en 1869, los daimyo alliniaos col nuevu réxime, xunto colos kuge, (cortesanos del emperador), formaron una nueva aristocracia xaponesa, los kazoku. Dellos daimyo foron nomaos gobernadores de les sos provincies (daquella llamaes 藩, han), pero en 1871 toles han foron desaniciaes y el territoriu del Xapón dividióse en prefeutures (県, ken). Los antiguos daimyo convertiéronse entós en pensionistes del gobiernu, obligaos a vivir en Tokyo.

Dalgunes families de daimyo conocíes son, por casu, los Maeda, los Mori, los Shimazu, los Date, los Uesugi, o los Hachisuka.