Dacia (provincia romana)

De Uiquipedia
Saltar a: navegación, buscar
Allugamientu de la provincia Dacia nel Imperiu romanu.

Dacia, na Antigüedá, yera'l país de los dacios -nomaos tamién Xetas-, taba bordiada polos Cárpatos nel norte, el ríu Danubiu nel sur; el ríu Tisza nel oeste; y pal este por ríu Nistru. Lo que correspuende, a grosso modo, cola autual Rumanía. Los habitantes yeran parte del enxeme cultural traciu y el sou nome fou un exonome dáu polos romanos que-ys chamorun dacios; los griegos nomórun-ys Xetas.

Cultura[editar | editar la fonte]

Los dacios tenían un altu nivel cultural cuando contautorun colos romanos. La súa creyencia basábase na inmortalidá de l'ánima , considerando la muerte como daqué habitual y necesariu. El ritual xiraba alrodiu del sacerdote que yera la másima figura como representante del diéus supremu, Zamolxis na Tierra. Yera una sociedá dividida en dúas clase: aristocracia, con privilexos y que se creyen son los precedentes de los boyardos rumanos; y el proletariáu. Orixinalmente vivían n'aldegas circulares con empalizadas de madera, por embargu col contautu romanu emprincipiarán a costruyire foralezas con torres cónicas de piedra. La súa economía centrábase na agricultura y na ganadería. Tamién conocías las esplotaciones auríferas y arxentíferas; asina como'l comerciu esterior que pola numismática sabemos fou pergrande.

Roma[editar | editar la fonte]

La conquista por Roma escomienza nel 89 a.C., chegando a un alcuerdu pol que los dacios pagarán a Domicianu un tributu cadañeru pero siguirán seyendo independientes. Nun ye ta Trayanu nel 106 d.C. que se toma tola Dacia y conviértese en provincia romana. La provincia taba costituyía por Transilvania y Oltenia; yera dirixida por un gobernador pretorianu. La Legio XIII Gemina taba asitada en Dacia de continu pa protexere a los colonos romanos de las guerras colos dacios. Fundáronse dellas ciudáes qu'inda perviven como Apulum (Alba Iulia, Napoca (Cluj-Napoca) y Potaissa Turda. Los dacios, al igual que los outros pueblos conquistaos por Roma, sufrieron un procesu d'aculturización relixosa y tamién llingüística; lu que llevóu a qu'anguaño se fale una llingua románica como'l rumanu nuna zona eslava.

Nel 129, Hadrianu, dividíu la Dacia en Dacia Superior (Transilvania) y Dacia Inferior (Oltenia ou Valaquia). Por embargo, Marcu Aureliu tornóu a dividila en tres: Porolissensis, Apulensis y Malvensis, malque las tres formaban un enxeme con capital en Ulpia Traiana (Sarmizegetusa) con un aconceyamientu común. Malque militarmente fueran provincias independientes unas d'outras.

Tres las invasiones góticas de la provincia nel 270 Aurelianu decide dexar la provincia y trellada las tropas y colonos a la provincia de Mesia, al sur del Danubiu onde creya la Dacia Aureliana. Esta volvería a dividise en Dacia Ripuaria y Dacia Mediterránea -capital en Sofía-. Si qu'asina esta cabera fou outra vegada dividia en Dardania y en Dacia Mediterránea ta l'intre nel que pasa a formar parte del Imperiu Romanu d'Oriente.