Corvera

Corvera

Bandera de Corvera Escudu de Corvera
Mapes: Asturies
Nome en castellanu	Corvera de Asturias
Xentiliciu	Corveranu, -a, -o
Comunidá autónoma	Asturies
Estáu	España
Capital	Nubleo
Coordenaes	43° 30' N 5° 54' O
Partíu xudicial	Avilés
Parroquies	7
Población (2007)  -Habitantes  -Densidá  -% d'Asturies	Puestu: 10 15.723 habitantes 349,4 hab/km² 1,46 %
Superficie  -Total  -% d'Asturies	Puestu: 62 46,01 km² 0,42 %
Mayor altitú	Prieto, 366 m
Códigu postal	33404 (Los Campos y Les Vegues); 33416 (y otros) restu conceyu
Alcalde	Luis Belarmino Moro (USPC)
http://www.ayto-corvera.es/

Casa'l conceyu

Corvera ye un conceyu d'Asturies. Llenda al norte con Avilés y Gozón, al este con Carreño y Xixón, al sur con Llanera y Illas y al oeste con Castrillón. Forma parte de la Cormarca d'Aviles xunto colos conceyos d'Avilés, Gozón, Illas y Castrillón.

Parroquies

Tresona Les Vegues Los Campos Villa Molleda Cancienes Solís

Demografía

La población de Corvera medró enforma al instalase en Tresona, en 1957, la planta de procesáu del aceru d'Ensidesa (anguaño ArcelorMittal).

Historia

La historia de Corvera como conceyu independiente entama nel sieglu XVI, al dixebrase del d'Avilés. Pa ver información anterior a esa época vea la historia d'Avilés.

Nel sieglu XIII l'alfoz de Gauzón pasa a ser conceyu d'Avilés cola mesma distribución xeográfica. Anque Corvera ya apaez como conceyu nesi sieglu, nun ye quién a independizarse de la villa avilesina, y vese obligáu a pagar un tributu añal de 660 maravedís pa poder esfrutar del Fueru d'Avilés. Va ser nel sieglu XVI cuando apaezca el primer conceyu d'habitantes de Corvera, que se celebró en Cancienes. Nél siguieron faciéndose les reuniones vecinales hasta que, a mediaos del XVII, se tresllada la casa'l conceyu a la Casa de los Bango en Nubleo. Pesie a la tardía formación y organización alministrativa del conceyu -nun se conocen ordenances d'elli hasta finales del sieglu XVIII- Corvera yá taba representáu, dende'l sieglu XV, por dos diputaos na Xunta Xeneral del Principáu d'Asturies.

Hasta los últimos años del sieglu XIX la principal actividá del conceyu yera l'agricultura, dirixida principalmente a abastecer a la villa d'Avilés y a la exportación a la Bretaña francesa, principalmente al puertu de Brest (les embarcaciones salíen de Tresona pa evitar el pago de tributos forales a Avilés). Esa dedicación agrícola nun quitó pa que hubiera, por guerres, enfermedaes y males colleches, tiempos de muncha fame nel conceyu. Pa fuxir d'ella muncha de la so población coló pa Cuba o México. Tocántenes a la industria, a finales del sieglu XIX hai noticia de qu'había una ferrería en Tresona, una cobrería en Cancienes y delles canteres.

Ye na segunda metada del sieglu XX, depués de sufrir les consecuencies de la Revolución Minera d'Asturies en 1934 y de la Guerra Civil Española (1936-1939) cuando camuden les condiciones demográfiques y económiques del conceyu cola implantación de la siderurxica ENSIDESA (güei ArcelorMittal), en Tresona. El conceyu pasa de ser emigrante a recibir xente de Galicia, Castiella, Lleón, Andalucía y Estremadura. Tala fue la cantidá de trabayadores foriatos que'l conceyu viose desbordáu, llegando a alquilase paneres y horros a delles persones, que compartíen les cames por turnos pa poder dormir.

Más alantre llegaríen al conceyu otres industries, como la fábrica de Fertiberia, y centros d'ociu y comerciales. Toos ellos s'asitiaron en Tresona, y son la principal fuente d'ingresos impositivos del ayuntamientu. Un ayuntamientu que, sieglos depués, vuelve a tar na órbita de la Villa del Adelantáu, ya que tanto Tresona como Les Vegues y Los Campos formen parte de la conurbación d'Avilés.

Política

Eleiciones 2007

17 conceyales:

• 7 del USPC (Alcalde: Luis Belarmino Moro, dende'l 21 d'agostu de 2008)
• 5 del PSOE (Alcalde: José Luis Vega Álvarez, hasta'l 21 d'agostu de 2008)
• 3 del PP
• 2 de IX-BA-LVA

Nun primer momentu l'alcaldía yera pal PSOE, en coalición con IX-BA-LVGP. Na eleición recibió apoyu de 2 de los 3 conceyales del PP, pero el 21 d'Agostu de 2008, pasa a manes d'USPC nuna moción de censura apoyada pol PP. Volviendo a ser alcalde Luis Belarmino Moro.

Eleiciones 2003

17 conceyales:

• 7 del USPC (Alcalde: Luis Belarmino Moro Suárez)
• 3 de IX - BA
• 3 del PSOE
• 3 del PP
• 1 de URAS

L'alcaldía correspondió a USPC, en coalición col PP.

Eleiciones 1999

17 conceyales:

• 8 del PSOE (Alcalde: Severino Zapico González)
• 4 del PP
• 3 de IX
• 2 de URAS

L'alcaldía correspondió a PSOE, en coalición con URAS.

Economía

Emplegaos nos diversos sectores económicos (añu 2006)

	Númberu de trabayadores	Tantu por cientu
TOTAL	5.488	100
Agricultura, ganadería y pesca	131	2,39
Industria	1.844	33,60
Construcción	706	12,86
Servicios	2.807	51,15
* Datos tomaos del Anuariu Estadísticu d'Asturies 2006, SADEI

Usos del suelu del conceyu (añu 2006)

Usu	Superficie (km²)
Tierres de llabrantíu	1,59
Praderíes	16,74
Terrenu forestal	15,40
Otros usos (industrial, residencial, tierra ermo...)	12,28
* Datos tomaos del Anuariu Estadísticu d'Asturies 2006, SADEI

Característiques del sector primariu (añu 2007)

Ganaderíes de bovín	195
Cabeces de ganáu bovín	1.892
Cabeces de ganáu ovín	226
Cabeces de ganáu cabrín	31
Ganaderos con cuota llechera	41
Quilos de cuota llechera	5.747.601
Metros cúbicos de madera valtao	8.160
* Datos tomaos del Anuariu Estadísticu d'Asturies 2007, SADEI

Deportes

Corvera ye un referente pal piragüismu nacional, y en menos midía pal remu, gracies al Centru d'Altu Rendimientu de Tresona, onde se celebren campeonatos nacionales y internacionales.

Fiestes

Les principales fiestes de Corvera son:

• La Xira al embalse de Tresona, el 1 de mayu.
• La Foguera de San Xuan de Tresona, 23 y 24 de xunu.
• Fiestes Populares de Corvera, 9, 10 y 11 de setiembre.

Ciudaes hermanaes

• Praia ( Cabu Verde)
• Sal ( Cabu Verde)
• Arroyo Naranjo ( Cuba)
• Maldonado ( Uruguái)

Ver tamién

• Conurbación d'Avilés
• Festival Intercélticu d'Avilés

Enllaces esternos

• Wikimedia Commons acueye conteníu multimedia sobro Corvera.
• Páxina web del conceyu
• Federación Asturiana de Conceyos