Cidade de Miranda l Douro

Miranda de l Douro
Llingua/gües oficial/es	mirandés y portugués
Comarca hestórica	Tierra de Miranda
Provincia	Trás-os-Montes
Conceyu	Miranda l Douro
Superficie	488,36 km²
Población	8.048 hab
Densidá	16 hab/km²
Santu Patrón	Santa María Mayor
Día la ciudá	10 de xunetu

La ciudá de Miranda de l Douro (Miranda'l Dueru asturianizao, y Miranda do Douro en portugués) ye una ciudá portuguesa del conceyu homónimu, asitiada na rexón alministrativa de Trás-os-Montes y na hestórica de Tierra de Miranda (Terra de Miranda en portugués).

Hestoria

Nun orixe, alredor de los sieglos V y VI, pertenez al Reinu los Suevos. Col tiempu, la ciudá de Miranda pasó a ser controlada pol conventu d'Astorga que la influyó cultural y llingüisticamente. La ciudá más cercana ye Zamora, au se firmó'l Tratáu de Zamora (1143) ente'l rei portugués Alfonsu I y el llionés Alfonsu VII, au se reconoció la independencia del reinu portugués, proclamada años enantes, esautamente nel 1139.

Situación d'anguaño

L'alcalde de Miranda de l Douro ye Manuel Rodrigo Martins, del Partíu Socialdemócrata de Portugual, y el presidente de l'Asamblea del Conceyu ye Domingos Duarte, de la mesma formación política.

La principal atraición turística ye'l ríu, que sirve de forma de producción d'enerxía tamién. Tamién hai viaxes organizaos pa ver la fauna selvaxe, principalmente basada en páxaros.

La ciudá en si ye pequeña, pero ta arrodiada per pueblos de tamañu inferior per toles fasteres esternes de l'área. La población vive principalmente de l'agricultura, pero d'unos años p'acó, vien ganando importancia'l seutor terciariu, anque l'aumentu del nivel de vida portugués y l'aperturismu européu mancó a esgaya la so economía, anque sigue habiendo enforma de turistes pel branu, principalmente d'orixe español, pero tamién francés o de los Estaos Xuníos, margar qu'abonda la xente mozo llariego que torna nel estíu a la so tierra.

Xeografía

Dique de Miranda

Miranda ta asitiada nel marxe pertués del ríu Duero y dende España accedese a ella cruciando pel furacu na lliende que s'abre sobro'l dique de la "Barragem" (dique) de Miranda, una les preses que curtien el ríu a lo largo la lliende. El paisaxe característicu del so allugamientu ta formáu por paredes de granitu qu'arrodien el cursu l'agua y que se prollonga ta la incorporación del ríu Águeda ena confluyencia coles provincies de Zamora y Salamanca.

Estos son dellos datos xeográficos so la llocalización de la ciudá:

• Altitú: 584 metros.
• Latitú: 41º 30' N
• Llonxitú: 006º 16' O

Llingua y Cultura

Chapa d'información en mirandés

Nesta ciudá, ya nel restu la Tierra de Miranda falase'l mirandés, variante dialeutal del asturllionés que tien el calter de llingua oficial (la única en tola República Pertuesa xunto col pertués). Amás ye de destacar que la toponimia y tolo de calter oficial ta en billingüe y ye poro una llingua n'espansión que tolos ciudadanos saben falar ya estudien dende bien mozos nes escueles de mena obligatoria.

Estes implicancies culturales de tradición asturllionesa faen qu'esta tierra seya reivindicada como parte d'un proyeutu de País Llïonés y tamién que n'esta ciudá haya un festival pola oficialidá de la llingua asturiana perimportante.

Tamién ye de destacar la importante cantidá de museos (tanto oficiales como privaos) sobro la hestoria, tradiciones y cultura mirandeses, como'l Museu da Terra de Miranda qu'alluga perimportantes descubrimientos arquiolóxicos de la zona, amás de traxes tradicionales, escenes de la vida rural...

Parroquies

Nel Conceyu de Miranda l Douru hai 17 parroquies:

• Águas Vivas (Augas Bibas en mirandés)
• Atenor (Atanor)
• Cicouro (Cicuiro)
• Constantim (Constantin)
• Duas Igrejas (Dues Eigreijas)
• Genísio (Zenízio)
• Ifanes (Infainç)
• Malhadas
• Miranda do Douro (Miranda de l Douro)
• Palaçoulo (Palaçuôlo)
• Paradela
• Picote (Picuôte)
• Póvoa (Pruôba)
• São Martinho de Angueira (San Martino)
• Sendim (Sendin)
• Silva
• Vila Chã de Braciosa (Bila Chana de Barceosa)

Enllaces esternos

• Página web oficial (pertués)