Certhia brachydactyla

De Wikipedia
Certhia brachydactyla
esguilón
Estáu de caltenimientu
Preocupación menor (LC)
Esmolición menor (IUCN)[1]
Clasificación científica
Reinu: Animalia
Filu: Chordata
Clas: Aves
Orde: Passeriformes
Familia: Certhiidae
Xéneru: Certhia
Especie: C. familiaris
Brehm, 1820
Distribución
Consultes
[editar datos en Wikidata]

Les especies d'aves con nome común en llingua asturiana márquense como NOA. En casu contrariu, conséñase'l nome científicu. L'esguilón[2] (Certhia brachydactyla) ye una especie d'ave de la familia Certhiidae que vive principalmente nel sur de la Europa Occidental y alredor del restu de la cuenca del Mediterraneu. Carauterízase por tener les partes cimeres parduces, que lo mimeticen colos tueros de los árboles, y les partes inferiores ablancazaes, col picu llargu, finu y curváu escontra baxo. Esguila con facilidá polos árboles ayudáu de la so cola ríxida que lu sirve de sofitu.

Descripción[editar | editar la fonte]

Nuna mano aprecia la proporción del esguilón.

L'esguilón ye un páxaru pequeñu, mide de 11-13 cm de llargu y pesa unos 8-10 g. Ye de color pardu chiscáu con llixos escuros y clares nes partes cimeres y les sos zones ventrales son de color blancu puercu. El so picu ye relativamente llargu y curvado (aprox. 2/3 partes del llargor de la tiesta, o unos 16,5- 22,05 mm). La so cola tien plumes ríxides que-y dexen usala como puntu de sofitu cuando s'atopa nos tueros verticales.

L'área de distribución del esguilón solapa en gran parte d'Europa col del esguilón montés col que puede tracamundiase. Comparáu con esta especie les partes inferiores d'esguilón son d'un color blancu menos intensu, y les cimeres son d'un color marrón más apagáu y menos motudes, tien una llista superciliar más escura. El so picu ye llixeramente más llargu y los deos de los sos pies más curtios. Ainda asina, ye abegoso estremar visualmente al 5% de los individuos, inclusive teniéndolos na mano.[3] Sicasí los sos cantares son bien distintos, anque sábese que dambes especies puen emitir los soníos de la otra.[3]

El so cantar ye un "ti-ti-tí--teroi-ti-tít" constituyíu por notes bien marcaes y agudes, dixebraes por curties poses, con una duración de 1,5 a 2 s . Fora de la dómina reproductora ye muncho más frecuente oyer una serie de 3 a 5 notes ‘ti’ o ‘tzi’ agudes, marcaes, d'acabáu sópitu y separyaes por percurties poses de 0,1-0,5 s ("ti-ti-ti-ti-...").

Distribución[editar | editar la fonte]

Alcuéntrase principalmente nel sur de la Europa occidental, amás del norte d'África y alredor del Mediterranéu oriental. Ocupa cuasi tola Península Ibérica, siendo menos frecuente na zona oriental más mediterranea, según nos sectores más deforestaos de les submesetes norte y sur. Ta distribuyíu n'altitú dende'l nivel del mar hasta los 1600 m, siendo bien escasu dende esta altitú hasta los 2000 m, au lu sustitúi'l esguilón montés nos cordales del norte d'España. Dambes especies asolapen les sos árees de distribución en gran parte d'Europa, ocupando l'esguilón onde coinciden preferentemente les rexones baxes con montes abiertos y l'esguilón montés les altes y los montes trupos de coníferes.[4]

Taxonomía[editar | editar la fonte]

L'esguilón describióse científicamente col so actual nome pol ornitólogu alemán Christian Ludwig Brehm en 1820.[5] El so nome binomial deriva de los términos griegos kerthios, un pequeñu ave habitante de los árboles descritu por Aristóteles, y brachydactyla, compuestu de brakhus (curtiu) y dactilos (deu), colo que xuníu significa «de deos curtios»,[6] en comparanza colos del esguilón montés.

Esta especie ye bien paecida al restu de los componentes del xéneru Certhia. Reconócense anguaño ocho especies dientro del xéneru de los esguilones, estremaos en dos llinaxes evolutivos: una rama holártica y otra nel sur d'Asia. L'esguilón pertenez al grupu de norte, xunto al esguilón montés, l'esguilón americanu de Norteamérica y l'esguilón de Hodgson del sur del Himalaya.[7]El cantar del grupu del holárticu ye más garlleru, siempres empieza y termina con un chillón sriih. Sicasí les especies del grupu del sur tienen un trinu de ritmu más rápidu ensin el soníu sriih.

L'esguilón montés, qu'a güeyu ye malu d'estremar del esguilón común.

Reconócense seis subespecies:[5]

  • Certhia brachydactyla brachydactyla (Brehm, 1820) - nel sur de Dinamarca, Polonia, l'estremu sur de Lituania, sur y este de Francia, España (sacante'l noroeste), el centru d'Alemaña. Italia, Sicilia, norte de Grecia, Hungría, oeste d'Ucraína, y delles zones de Rumanía y Turquía.
  • Certhia brachydactyla megarhyncha (Brehm, 1831) - nel oeste y norte de Francia, Bélxica, Países Baxos, l'oeste d'Alemaña y el noroeste de la península ibérica y nes islles de la canal.
  • Certhia brachydactyla dorotheae (Hartert, 1904) - sur de Grecia, Creta y Xipre.
  • Certhia brachydactyla mauritanica (Witherby, 1905) - norte d'África (Marruecos, Arxelia y Túnez).
  • Certhia brachydactyla stresemanni (Kummerlowe y Niethammer, 1934) - Turquía central.
  • Certhia brachydactyla rossocaucasica (Stepanyan, 2000) - nel oeste d'El Cáucasu.

Na península Ibérica estrémense dos subespecies: C. b. megarhyncha, nos Pirineos Occidentales, noroeste d'España y Portugal, y C. b. brachydactyla nel restu del área. Nun ta presente nes islles Baleares, Canaries, Madeira y Azores. Un analís del xenoma mitocondrial citocromu b amuesa que les poblaciones del noroeste d'África formen un llinaxe separtáu de les poblaciones europees.

Comportamientu[editar | editar la fonte]

Esguilón col picu llenu d'inseutos.

Ye un páxaru xeneralista d'ambientes forestales. Los medios nos que la especie ye más abondosa son bien variaos, pero tienen la carauterística común de ser montes con arboláu maduro. Ye bien escasu, o nun ta presente, en mases arbolaes d'amenorgada estensión (< 1 km²). Algama densidaes llocales máximes de 70-150 aves/km², con valores medios de 41-65 aves/km² en pinares de clima supramediterraneu percima de 1250 m d'altitú.

Ye una especie básicamente sedentaria, que cuasi puramente fai curtios movimientos dispersivos dende'l so llugar de nacencia, o desplazamientos altitudinales mientres l'iviernu énte temporales fríos.

La so dieta ye puramente insectívora mientres tol añu. Principalmente consume coleópteros y arácnidos (fundamentalmente Araneae). Gueta l'alimentu mayoritariamente en tueros y cañes grueses. Dientro del árbol ocupa principalmente los 2/3 inferiores onde la corteza ye más rugosa.

Suel movese en solitariu, anque dacuando forma bandos mistos con otres especies. Mientres l'iviernu, en zones fríes, suelen xuntase dellos individuos pa dormir formando auténtiques ‘boles de plumes’. Mientres los díes soleyeros del iviernu ye capaz de faer un usu selectivu del mosaicu sol-solombra, de manera qu'usa selectivamente les zones insolaes per debaxo de los 6 °C.

Por cuenta del so plumaxe crípticu y al so usu del espaciu bien específicu tien pocu depredadores, tando escasamente representáu na dieta de les rapiegues más monteses..

Reproducción[editar | editar la fonte]

Güevos de Certhia brachydactyla

Empecipia la reproducción a finales de marzu, enllargándose hasta xunu. Añera siempres a cubiertu del abertal en tueros d'árboles, en resquiebros fondos o so ‘solapes’ de corteces desprendíes, xeneralmente a poco altor sobre'l suelu. Usa con perpoco (frecuencia <0,5% d'ocupación) les caxes de anidación típiques para páridos. Fai dos puestes por temporada (ente 3 y 6 güevos caúna). Los güevos son subelípticos de superficie mate y color blancu-crema con llixos marrones-acolorataes más concentraes escontra l'estremu menos aguyáu. En pinares montanos del centru d'España (Sierra d'Ayllón, Madrid-Guadalaxara) el tamañu mediu de puesta ye 4,73 güevos. El númberu de güevos nun varia ente primeres y segundes puestes. Los tamaños de puesta n'España son menores que los reparaos n'otres rexones europees más septentrionales (en permediu de 5 a 6,5 güevos). La guariada dura, en permediu, 14 díes. L'ésitu d'eclosión (90%) y la proporción de pollos qu'abandona'l nial (98% de los güevos eclosionados) son elevaos (datos pa un pinar montano de la Sierra d'Ayllón).

Referencies[editar | editar la fonte]

  1. BirdLife International (2010). «Certhia brachydactyla» (inglés). Llista Roxa d'especies amenazaes de la UICN 2011.1. Consultáu'l 17 d'agostu de 2011.
  2. URL de la referencia: http://www.sabencia.net/nomenclator.php.
  3. 3,0 3,1 Harrap, Simon; Quinn, David (1996). Tits, Nuthatches and Treecreepers. Christopher Helm. páxs. 177–195. ISBN 0-7136-3964-4.
  4. Snow, David; Perrins, Christopher M (editores) (1998). The Birds of the Western Palearctic edición curtia (2 volúmenes). Oxford: Oxford University Press. ISBN 0-19-854099-X. 1411–1416
  5. 5,0 5,1 Alan P. Peterson. Certhia brachydactyla en Certhidae en Zoonomen p. 49
  6. «Short-toed Treecreeper Certhia brachydactyla [CL Brehm, 1820]». BirdFacts. British Trust for Ornithology (BTO). Consultáu'l 17 d'agostu de 2011.
  7. Tietze, Dieter Thomas; Martens, Jochen & Sun, Yue-Hua (2006). «Molecular phylogeny of treecreepers (Certhia) detects hidden diversity». Ibis 148 (3):  páxs. 477–488. doi:10.1111/j.1474-919X.2006.00547.x. 

Bibliografía[editar | editar la fonte]

Enllaces esternos[editar | editar la fonte]