Centralismu democráticu

De Uiquipedia
Saltar a: navegación, buscar

El Centralismu democráticu ye'l modelu d'organización y funcionamientu de los partíos y organizaciones marxista-leninistes, anque non asina de toa organización socialista, marxista o comunista. La combinación de centralismu y democracia supon potenciar la disciplina consciente y el sacrificiu voluntariu de la llibertá n'ares de la máxima eficacia. El centralismu democráticu opónse al burocratismu y a otres formes d'organización como les de los partíos socialistes o les organizaciones asamblearies.

Na metodoloxía del centralismu democráticu los discutinios y decisiones flúin de baxo a enriba y de riba a embaxo, nun viaxe d'ida y vuelta ente l'órganu inferior y el superior, ensin lo cual el procesu queda incompletu.

Carauterístiques[editar | editar la fonte]

Les sos principales carauterístiques son:

  • Calter electivu y revocable de tolos órganos de direición de baxo a enriba.
  • Rendición periódica de cuentes polos órganos de direición énte'l que los escoyeron y énte los órganos cimeros.
  • Llibertá de crítica y autocrítica dientro del partíu.
  • Estricta disciplina de partíu, subordinación de la minoría a la mayoría.
  • Les decisiones de los órganos cimeros son venceyantes pa los órganos inferiores.
  • Trabayu y direición coleutivos, responsabilidá individual de cada participante nel procesu de direicionamientu del estáu

En formulaciones recién el centralismu democráticu equival a: democracia interna, unidá d'aición y direición coleutiva.

Papel hestóricu[editar | editar la fonte]

Históricamente puédese amestar el centralismu democráticu a les formes organizatives de la Comuña de París espuestes por Karl Marx en "La guerra civil en Francia" (1871), anque atribúise la so formulación moderna a V. I. Lenin, na so obra "¿Qué facer?" (1902). Correspondió darréu a la forma d'organización de los partíos comunistes dempués de 1917.

Ye una propuesta que nunca se concretó (con bien poques esceiciones, mayormente nos partíos comunistes y con matices) a un nivel más xeneral a pesar que les persones o partíos que lo propunxeron llegaren al poder del Estáu, cuantimás pola dificultá de concretar organizaciones que sían coles mesmes de baxo escontra riba y de riba escontra baxo ensin que se produza un procesu de xerarquización sobro les unidaes de base y la consecuente centralización; sicasí nun rangu bien llindáu y dientro de la subordinación al aparatu central, estes organizaciones de base tienen o tuvieron dalguna capacidá de decisión y aición, anque bien relativa.