Cecos

Cecos ye una parroquia del conceyu asturianu d'Ibias. Asitiada na parte occidental del mesmu, tien una estensión de 41,1 km² y una población (INE, 2009) de 220 habitantes, que se reparten ente'l llugar homónimu y los de Boiro, Bustelo, Cadagalloso, Carbueiro, Centiales, Folgueiras de Boiro, Lagüeiro, A Mergulleira, Pousadoiro, El Rellán, Santesteba, Vilamayor y Vilarcebulín.

D'ente les edificaciones que hai nelli destaquen:

• la ilesia parroquial de Santa María, en Cecos. Nun se sabe cuándo se fizo, pero remocicáronla en 1681 p'acoyer les tumbes de varios miembros de la familia Ron y les sos muyeres. Ye de nave única y techa en madera, con presbiteriu techáu con bóveda d'arista y aspectu turriforme al esterior. Hai nella un par de retablos barrocos, del sieglu XVIII: el de la Virxe del Rosariu y el de la Virxe del Carmen, que se-y atribúi a José Bernardo de la Meana. Nella se celebra la fiesta del Corpus Christi. Los vecinos de 13 pueblos, por turnu, saquen a la Virxe el procesión, cola particularidá de qu'equí son les muyeres les que la visten y la saquen en procesión.

• el palaciu de Ron, en Lagüeiro, del sieglu XVII. Ye una casona pergrande, fecha de mampostería de pizarra y madera, que ta articulada alredor d'un patiu central nel que hai una panera. Entá conserva enriba la puerta principal l'escudu nobiliariu familiar talláu en madera.