Carbonu-14

De Uiquipedia
Saltar a: navegación, buscar

El carbonu-14 (14C, masa atómica = 14,003241 uma) ye un radioisótopu del carbonu y foi descubiertu el 27 de febreru de 1940 por Martin Kamen y Sam Ruben. So nucleu contien 6 protones y 8 neutrones. Willard Libby determinó un valor pa'l periodu de semidesintegración o semivida d'estin isótopu: 5568 años. Determinaciones posteriores en Cambridge produxeron un valor de 5730 años. Debío a la so presencia en toos los materiales orgánicos, el carbonu-14 emplégase na datación d'especímenes orgánicos.

El métodu de datación por radiocarbonu ye la téunica basada n'isótopos más fiable pa conocer la edá de muestres orgániques de menos de 60.000 años. Está basau na llei de decayimientu esponencial de los isótopos radiactivos. L'isótopu carbonu-14 (14C) ye producíu de forma continua n'atmósfera comu consecuencia del bombardeu d'átomos de nitróxenu por neutrones cósmicos. Esti isótopu creau ye inestable, polo que, pué camudase en nitróxenu-14 (14N). Estos procesos de xeneración-degradación de 14C alcuentrense práuticamente equilibraos, de manera que l'isótopu alcuentrase homoxéneamente mezclau colos átomos non radiactivos nel dióxidu de carbonu de l'atmósfera. El procesu de fotosíntesis incorpora l'átomu radiactivu nes plantes, de mou que la proporción 14C/12C n'éstes ye paecía a l'atmosférica. Los animales incorporen, por inxestión, el carbonu de les plantes. Agora bien, tres la muerte d'un organismu vivu nun s'incorporen nuevos átomos de 14C a los texíos, y la concentración de l'isótopu decrez según va tresformándose en 14N por decayimientu radiactivu.