Carbayón (dulce)

De Wikipedia
Carbayón (dulce)
Nome Carbayón (dulce)
Detalles
Más información
[editar datos en Wikidata]

Los carbayones son un pastel típicu asturianu, más concretamente d'Uviéu. Estos almendraos tomen el so nome d'un vieyu carbayu centenariu que s'alcontraba nel centru d'Uviéu, y fueron inventaos pola famosa pastelería Camilo de Blas en 1924, pa la Feria Internacional de Muestres d'Asturies. Trátense, en cierta midida, d'una versión sofisticada de los vieyos bartolos d'almendra que se faen n'Asturies dende cuantayá. Na confitería Camilo de Blas de Lleón, onde tamién faen estos pasteles, el bañu de yema ye muncho mayor que l'emplegáu n'Asturies.

Carauterístiques[editar | editar la fonte]

Consiste nuna masa de masa foyada en trés pliegos rellena d'una mestura de güevu, almendra molío, coñac o vinu dulce y azucre, básicamente, y cubierta d'un almibre fecho a base d'agua, zusmiu de llimón, azucre y canela.

Preparación[editar | editar la fonte]

Ha molese l'almendra pa mecelo dempués con igual cantidá d'azucre, un poco más o menos, añadiéndo-y dos güevos enteros y trés yemes, asina como un poco de vinu dulce y ralladura de llimón; too ello mezse bien y col preparáu van rellenándose pequeños moldos de madalenes forraos previamente de masa foyada. Métense en fornu hasta doralos.

Mentras se cuecen, prepárase un almibre, con cuatro cullaraes d'azucre y seyes d'agua; si s'oleya, arúmase con una caña de canela. Pónense trés yemes nun cazu, mécense cola ayuda d'una cullara de madera y se-yos va amestando, poco a poco, l'almibre templáu; avérase dempués al llume y cuezse unos momentos hasta qu'espesen llixeramente.

Una vuelta desmoldaos cúbrense con esti bañu de yema cola ayuda d'un pincel o un cuchellu, dexándolos secar.

Prepárase un almibre fuerte con seyes cullaraes d'azucre y seyes d'agua, y daqué de zusmu de llimón; quítase del llume y se bate con un tenedor hasta que se ponga blanco, cubriendo darréu con esti bañu los pasteles; si s'endurez l'almibre, calezse de vuelta con unes gotes d'agua.

Bibliografía[editar | editar la fonte]

V. Alperi y Sofía Fernández: La Cocina Asturiana (2 tomos), edit. La Voz de Asturias S.A. (Llugones, Siero, 1995)

Referencies[editar | editar la fonte]

Enllaces esternos[editar | editar la fonte]