Cadena Báltica

De Uiquipedia
Saltar a: navegación, buscar

Conozse como Cadena Báltica (n'estoniu, Balti kett, en letón Baltijas ceļš, en lituanu Baltijos kelias) a la cadena humana que formaren más d'un millón de persones a lo llargo de más de 600 kilómetros que a les siete de la tarde hora local del 23 d'agostu de 1989 crució les trés repúbliques báltiques (Estonia, Letonia y Lituania) pasando poles sos capitales (Tallinn, Riga y Vilnius, respectivamente).

La manifestación entamóse pa llamar l'atención de la opinión pública mundial sobre'l destín común que sufrieren les trés repúbliques. Ello ye que celebróse coincidiendo col cincuentenariu de la firma del alcuerdu secretu conocíu como Pactu Molotov-Ribbentrop, pol que la Unión Soviética y la Alemaña nazi estremábense esferes d'influencia na Europa del Este, y que llevó a la ocupación per parte de los soviéticos de los trés países.

Contestu[editar | editar la fonte]

Moneda conmemorativa del décimu aniversariu de la Cadena Báltica.

Al amparu de la glásnost y la perestroika, les manifestaciones caleyeres xorrecíen nes diverses capitales, creciendo en popularidá y asistencia. Les primeres, de 1986, axuntaben namái pequenes cantidaes de xente. Darréu, yá en 1987 masives manifestaciones fueron prohibíes poles autoridaes, saldándose con numberosos arrestos. Un añu más tarde y per primer vegada, les protestes fueron aprobaes poles autoridaes y desenvolviéndose d'una manera pacífica.

Una selmana antes de la Cadena Báltica, la URSS almitiera la esistencia del protocolu secretu Molotov-Ribbentrop, pero siguía aportunando en que los trés estaos xuntárense voluntariamente a la Unión Soviética. Un par de díes antes, 170 miembros del movimientu lituanu Sajūdis (que llograra 36 de los 42 escaños nes recientes elecciones al Conseyu Supremu de Lituania) aprobaron con namás cinco abstenciones una declaración pidiendo "una república lituana, soberana ya independiente, non sometida al sistema lexislativu de la URSS".

La protesta[editar | editar la fonte]

La plaza énte la Catedral de Vilnius, unu de los llugares principales de la manifestación. Más de 40.000 persones axuntáronse nella.

La cadena foi permitida polos Partíos Comunistes de cada unu de los trés estaos, y organizóse con precuru de que nun hubiera güecos nos más de 600 kilómetros que dixebren Vilnius de Tallinn (pasando por Riga). En munchos pueblos y ciudaes designáronse determinaes árees a cubrir; tamién s'entamó'l tresporte n'autobuses gratuitos p'aquellos que nun teníen otru mediu al so alcance. Los manifestantes xunieron les sos manes de mientres 15 minutos a les siete de la tarde hora local (16:00 GMT). Pela radio y al traviés de programes especiales coordinábense los esfuerzos. Más tarde el mesmu día, tuvieron llugar diverses concentraciones y protestes pacífiques. En Vilnius, 40.000 manifestantes concentráronse na plaza de la Catedral, con veles enceses y cantares tradicionales y el mesmu himnu nacional Tautiška giesmė. N'otros llugares los párrocos arengaron a les mases o fixeron sonar les campanes de les ilesies. Nuna de les protestes más espectaculares, los líderes de los Frentes Populares d'Estonia y Letonia axuntáronse na frontera ente dambes repúbliques pa celebrar un funeral simbólicu, nel que se prendió fueu al símbolu utilizáu pa denunciar la dominación soviética apautada colos nazis: una cruz gamada nel centru d'una estrella colorada. Tamién se declaró día festivu n'Estonia.

La piedra "STEBUKLAS" frente a la Catedral de Vilnius, nel sitiu en que, d'alcuerdu cola lleenda, empezaba la Cadena Báltica.

La protesta foi dafechu pacífica. Sicasí, los manifestantes fueron represaliaos, en dellos casos de manera física. Tantu Erich Honecker dende la Alemaña del Este como Nicolae Ceaușescu dende Rumanía ufiertaron sofitu militar a la Unión Soviética si decidía utilizar la fuerza pa torgar la manifestación. Na Plaza Pushkin de Moscú emplegárense unidaes antidisturbios pa refugar a unos cuantos cientos de persones, axuntaes nuna demostración de simpatía pa cola protesta báltica. L'axencia de noticies soviética TASS informó de que 75 persones fueren deteníes por alteración del orde públicu, vandalismu y otros delitos. Unos 13.000 manifestantes axuntáronse coles mesmes en Moldavia, que tamién fuera afectada pol pactu xermanu-soviéticu de non agresión.

Sobre'l númberu de participantes na Cadena Báltica, les estimaciones varien sustancialmente. L'axencia Reuters informó a otru día de que 700.000 estonios, 500.000 letones y 1.000.000 de lituanos tomaren parte na protesta. Eses cifres superaben enforma les estimaciones previes, que calcularen a lo más 1.500.000 de manifestantes. La población total de los trés estaos nesi momentu yera d'unos ocho millones de persones. Les cifres oficiales ufiertaes pola Unión Soviética al traviés de TASS afirmaben que namás 300.000 estonios y cerca de 500.000 lituanos secundaren la protesta, ensin que se realizara una estimación oficial de participantes en Letonia.

Consecuencies[editar | editar la fonte]

La cadena humana simbolizó la solidaridá ente los trés países bálticos na llucha por una mayor autonomía y una eventual independencia de dichos territorios. Ayudó a establecer la idea de les trés "repúbliques hermanes" y promovió la cooperación ente elles dende esi día. Darréu dellos políticos suxurieron la idea de presentar conxuntamente una candidatura pa entamar unos Xuegos Olímpicos de branu ente los trés repúbliques. Per otru llau, la protesta esbozó les llínees maestres de les futures manifestaciones: masives y pacífiques. Finalmente, ayudó a atraer a les protestes a aquéllos qu'entá yeren escépticos o tarrecíen les persecuciones soviétiques.

L'11 de marzu de 1990 Lituania conviértese nel primer estáu soviéticu en declarar la so independencia. Dos años dempués de la protesta, la independencia de los trés Estaos Bálticos yá fuera reconocida per munchos países occidentales.

La Cadena Báltica ta reconocida pol Llibru Guinness de los Récords como la cadena humana más llarga que s'entamó nunca. El llibru de los récord lituanu la recueye tamién como l'atascu de tráficu más llargu: de mientres un par d'hores, 100 kilómetros de l'autopista Vilnius-Kaunas permanecieron encaboxaos. Darréu entamáronse cadenes humanes similares en munchos países d'Europa del Este y rexones de la URSS.

Ver tamién[editar | editar la fonte]

Enllaces esternos[editar | editar la fonte]

Galería virtual de la páxina del Gobiernu de Lituania 
Cadena Báltica 1989-1999 Páxina dedicada al décimu aniversariu de la Cadena Báltica (n'inglés)
Sellos conmemorativos del décimu aniversariu (n'inglés)
Central Europe Review La Cadena báltica: diez años dempués (n'inglés)
Páxina con numberoses semeyes de la Cadena Báltica"