Butokukai

De Uiquipedia
Saltar a: navegación, buscar
El Butokuden en 1899

Butokukai (大日本武徳会, Sociedá de la Virtú Marcial) o Dai Nippon Butokukai ye una organización xaponesa d’artes marciales establecida en 1895 en Kyoto, Xapón, dependiente del Ministeriu d’Educación y autorizada pol emperador Meiji. Daquella’l so propósitu yera organizar los sistemes y disciplines marciales de Xapón. Foi la primer organización oficial d’artes marciales autorizada pol gobiernu xaponés. Promovía les virtúes marciales de los guerreros samurái y la escelencia histórica de les disciplines marciales.[1]

Hestoria[editar | editar la fonte]

Atópense nicios cuando l’emperador Kanmu (737-806), qu’en visu a promover les artes marciales construyó nel añu 794 el Butokuden| (武道専門学校, Budō Senmon Gakkō), asitiáu na contorna del templu Heian, en Kyoto. Más tarde’l Butokuden convertióse en centru d’espardimientu de les artes marciales xaponeses.

Pa contra’l 1800, baxo’l control del bakufu nel periodu Edo, les distintes artes marciales desendolcábense nel sen de los clanes samurái como medios pa llograr el predominiu d’estos, pero cuando en 1867 el shogun Tokugawa Keiki abdicó’l so poder políticu a favor del emperador na Restauración Meiji, entamó per aciu de la nueva política’l desarrollu y modernización de la sociedá xaponesa. Metanes toa esta movedura, decidióse que les artes marciales teníen que se conservar como un importante instrumentu de caltenimientu de la identidá nacional, entendiéndose al empar qu’había que cambiar los sos raigaños encuallaos nel periodu feudal de Xapón y anovales adautándoles a la ideoloxía de la nueva nación.[2]

En 1895, el mundu de les artes marciales en Xapón taba representáu nel cume pol gobernador Watanabe de la prefeutura de Kyoto, que defendía la idea de fundar el Dai Nippon Butokukai en Kyoto baxo l'autoridá del Ministeriu d’Educación, llogrando l’autorización del emperador al efeutu.

Munchos prauticantes renomaos de sistemes tradicionales como Kenjutsu, Jujutsu, Battojutsu, Iaijutsu, Kenpo, Naginatajutsu, Aiki jujutsu, Bojutsu, Sojutsu y Kárate xuntáronse al Butokukai, que foi asina la primer institución oficial de Xapón que venía regular les artes marciales.

En 1905 inauguróse la Escuela d'Entrenamientu n’Artes Marciales pa Maestros, que llueu había llamase Budo Senmon Gakko, o Butokuden (Colexu d’ Marciales). La Butokukai foi la primer organización n’aplicar el sistema de graduaciones Dan y reglamentos d’arbitraxe. Por exemplu iguó la práutica del kendo contribuyendo d’esta miente a la so modernización, desarrollu y espardimientu progresivos. Sofitó la investigación y el desendolcu de les artes marciales xaponeses modernes o Gendai Budo (現代武道), como’l Yudu, el Kendo, el Kyudo y el Kárate. Pa 1930, el Rexistru Nacional Gubernamental d’Artes Marciales contabilizaba más de trés millones y mediu de cinturones negros y cerca de doscientos cincuenta espertos d’altu rangu nes ocho disciplines principales.

Dempués de la Segunda Guerra Mundial[editar | editar la fonte]

En 1946, al poco d’acabar la Segunda Guerra Mundial, el Comandu Supremu de les Fuercies Aliaes espublizó un decretu que desaniciaba toles organizaciones rellacionaes colo marcial, polo que’l Butokukai foi disueltu.[3] Ensin embargu, dempués del Tratáu de Paz de San Francisco de 1952, los Estaos Xuníos foron buscando adulces l’alianza colos xaponeses énte los desafíos de la Guerra Fría. Nel mesmu añu de 1952 creóse la Kokusai Budoin (actualmente Federación Internacional d’Artes Marciales, IMAF) siguiendo la tradición del Butokukai.[4] En 1953 refundóse la Dai Nippon Butokukai con nuevos estatutos y nueva filosofía,[3] pero non con un calter oficial como’l que tenía enantes de la guerra. L’oxetivu del Butokukai actual ye ameyorar l’entendimientu ente los pueblos y la paz mundial a traviés de la promoción del entrenamientu de les artes marciales, la educación y el serviciu.

Disciplines incluyíes[editar | editar la fonte]

Ente les disciplines reconocíes y oficialmente aprobaes pol Butokukai tán:

Referencies[editar | editar la fonte]

  1. Dai Nippon Butoku Kai: Honbu, Kyoto, Japan
  2. [1] Enciclopedia del Aikido de Stanley Pranin
  3. 3.0 3.1 Dai Nippon Butoku Kai: HIstory and philosophy
  4. The Empire Martial Arts Association: United Kingdom Budo Federation.

Enllaces esternos[editar | editar la fonte]