Bob Dylan

De Uiquipedia
Saltar a: navegación, buscar

Robert Allen Zimmerman (24 de mayu de 1941), conocíu comu Bob Dylan, ye un músicu de Minnesota, nel mediueste d´Estaos Xuníos. Dylan foi un íconu de la xeneración Beat nelos años 60. En xunu de 2007 anuncióse que yera el ganador del Premiu Príncipe d'Asturies de les Artes.

Discografía[editar | editar la fonte]

Discografía esencial[editar | editar la fonte]

Bob Dylan y Joan Baez
  • Bob Dylan (1962)

Un discu nel que Dylan amuesa'l so procesu formativu: Woody Guthrie, la fondua del folk americanu, el gran bluesman Robert Johnson. Dellos temes son versiones clásiques ("Man of constant sorrow", "House of the rising sun").

  • The Freewheelin' Bob Dylan (1963)

El discu l'entamu. Dellos temes perconocíos ("Blowin' in the wind", "A hard rain's a-gonna fall", "Don't think twice, it's all right") nelos que pue vese ya el xeitu lliterariu de Dylan.

  • The Times They Are A-Changin (1964)

Dylan caltién el xeitu'l discu anterior. Nun s'atopen temes famosos (sacante "The times they are a-changin") y amuésase un fondu camarzu pollíticu y social.

  • Bringing It All Back Home (marzu 1965)

El discu decisoriu na historia musical de Dylan: un cambéu pal formatu llétricu, ensin amurniase poles quexes del so públicu. Hai bonos temes perdayuri: "Subterranean homesick blues", "Love Minus Zero/No limit", "It's all over now, Baby Blue", "It's allright ma (I'm only bleeding)".

  • Highway 61 Revisited (agostu 1965)

Discu nela mesma llínia, anque el conxuntu paez más "firme". Blues llétricu con poques concesiones palo acústico (la perbona y escura "Desolation row", per exemplu) y ún de los sos temes míticos: "Like a rolling stone".

  • Blonde on Blonde (1966)

Dylan pieslla la so triloxía con otra obra mítica, el primer discu doble na hestoria del rock. Nel atópase pela última vegada esi "soníu de mercuriu llíquidu", como él nomaba a la música que naguaba por facer: "Pledging my time", "I want you", "Sad-eyed Lady of the Lowlands".

  • John Wesley Harding (1967)

Espublízase mientres Dylan vive en Woodstock tres el so acidente de moto, llueñe del "circu mediáticu" creyáu al rodiu de so. Una torna al folk de los sos anicios y un cantar que naide nun pué escaecer pola so escuridá y fondura: "All along the watchtower". Jimi Hendrix, que nel so discu Electric Ladyland (1968) fizo una versión d'esti tema, dixo que, tres ascuchalu la primera vegada, quedó tan alloriáu que tuvo que cantala él mesmu.

  • Blood On The Tracks (1975)

Un nuevu pasu allantre. Temes llargos, enllenos d'ironíes y feríes. Neles sos memories (Cróniques I), Dylan fala "d'un discu fechu con dellos cuentiquinos de Chéjov" que naide nun tenía entendío: "Simple twist of fate", "You're a big girl now", "Shelter from the storm".

  • Desire (1976)

Un bon discu, col raigón nela so xira "Rolling Thunder Revue". El violín de Scarlett Rivera ensámase cola vieya armónica de Dylan nun soníu únicu, enllenu xeitos que nun s'atopen nel restu los discos de Dylan: "Isis", "Oh Sister", "One more cup of coffee", "Hurricane" (canciu perllargu onde Dylan amuesa la so solidaridá col boseador prietu Rubim 'Hurricane' Carter, xulgáu inxustamente).

  • Oh Mercy (1989)

Un bon discu nuna dómina que quiciabes seya la menos valatible de Dylan, somerxíu en duldes relixoses.

  • Time Out Of Mind (1997)

Tres años d'escaezu y la muerte la so má, Dylan fai un discu de blues escuru, fondu, enllenu camarzu y llercia. Dellos temes perbonos: "Love Sick", "Not dark yet", "Standing in the doorway", "Cold irons bound".

  • The Bootleg Series 4-Live 1966 'Royal Albert Hall (1998)

El conciertu más conocíu de Dylan, anque nun fora nel Albert Hall, sinón en Manchester. Tres la parte acústica, Dylan amuesa'l so cambéu llétricu y toca dellos temes del futuru Bringing it all back home. Enantes que toque "Like a rolling stone", daquién glayía-y: "¡Xudes!". Dylan respónde-y: "Nun te creyo. Yes un mentirosu..." y pide-y a la banda (la futura The Band): "play fucking loud" ("tocái al alto la lleva").

  • Love & Theft (2001)

Magar que caltenga munchos xeitos de Time out of mind, ye esti un discu muncho más roqueru y enfotáu. Les lletres amesten rexistros del blues clásicu estaunidense cola escura imaxinería surrealista de Dylan.



Discografía completa[editar | editar la fonte]

Dylan nel Lida Festival d'Estocolmu, en 1996
  1. Bob Dylan. 19 de marzu 1962
  2. The Freewheelin' Bob Dylan. 27 de mayu de 1963
  3. The Times They Are A-Changin'. 10 de febreru de 1964
  4. Another Side of Bob Dylan. 1 de mayu de 1964
  5. Bringing it all Back Home. 22 de marzu de 1965
  6. Highway 61. 30 de agostu de 1965
  7. Blonde on Blonde. 16 de mayu de 1966
  8. Bob Dylan's Greatest Hits. 27 de marzu de 1967
  9. John Wesley Harding. 27 d'avientu de 1967
  10. Nashville Skyline. 9 d'abril de 1969
  11. Self Portrait. 8 de xunu de 1970
  12. New Morning. 21 d'ochobre de 1970
  13. Bob Dylan's Greatest Hits Vol.2. 12 de payares de 1971
  14. Pat Garrett & Billy the Kid. 13 de xunetu de 1973
  15. Dylan. 16 de payares de 1973
  16. Planet Waves. 17 de xineru de 1974
  17. Before the Flood (directu). 20 de xunu de 1974
  18. Blood on the Tracks. 20 de xineru de 1975
  19. The Basement Tapes. 1 de xunetu de 1975
  20. Desire. 5 de xineru de 1976
  21. Hard Rain (directu). 1 de setiembre de 1976
  22. Street Legal. 15 de xunu de 1978
  23. Masterpieces. 1978
  24. At Budokan (directu). 23 d'abril de 1979
  25. Slow Train Coming. 20 d'agostu de 1979
  26. Saved. 19 de xunu de 1980
  27. Shot Of Love. 12 d'agostu de 1981
  28. Infidels. 27 d'ochobre de 1983
  29. Real Live (directu). 29 de payares de 1984
  30. Empire Burlesque. 30 de mayu de 1985
  31. Biograph. 7 de payares de 1985
  32. Knocked Out Loaded. 14 de xunetu de 1986
  33. Dylan And The Dead. 18 de xineru de 1988
  34. Down In The Groove. 19 de mayu de 1988
  35. Oh Mercy. 12 de setiembre de 1989
  36. Under The Red Sky. 11 de setiembre de 1990
  37. The Bootleg Series Vol.1-3. 29 de marzu de 1991
  38. Good As I've Been To You. 3 de payares de 1992
  39. World gone wrong. 26 d'ochobre de 1993
  40. Bob Dylan's Greatest Hits Vol.3. 15 de payares de 1994
  41. MTV Unplugged. 2 de mayu de 1995
  42. Time Out Of Mind. 30 de setiembre de 1997
  43. The Best Of Bob Dylan. 1997
  44. The Bootleg Series 4-Live 1966 'Royal Albert Hall'. 13 d'ochobre de 1998
  45. The Essential Bob Dylan. 31 d'ochobre 2000
  46. Love & Theft. 11 de setiembre de 2001
  47. The Bootleg series Vol. 5.Live 1975. The Rolling Thunder Revue. 26 de payares de 2002
  48. The Bootleg series Vol 6. Live 1964. 30 de marzu de 2004
Bob Dylan
Wikimedia Commons tien archivos rellacionaos con:
Bod Dylan
Wikimedia Uiquicites tien cites rellacionaes con: