Berta Piñán
Berta Piñán nació en Cañu, Cangues d'Onís, nel añu 1963 y ye llicenciada en Filoloxía Hispánica pola Universidá d'Uviéu.
Yá dende mui moza collabora en delles revistes, ente elles Lletres Asturianes. Tamién participó na creación de la revista Adréi xunto a Xuan Bello y Antón García.
En 1985 Berta Piñán algama'l Premiu de Poesía de L'Academia de la Llingua Asturiana col poemariu Al abellu les besties, obra caracterizada pola singularidá. Ye un llibru del so tiempu con clares influencies de los novísimos, el surrealismo y la cultura pop.
En 1991 publica un ensayín nel que fala de la realidá sociollingüística d'Asturies: Notes de sociollingüística asturiana. Esi mesu añu, algama la primera edición del Premiu “Teodoro Cuesta” de Poesía de poesía cola obra Vida Privada onde l'autora amuesa los frutos de la so madurez como poeta. Apaez un tipu de poesía qu’entronca cola “poesía de la esperiencia” o “poesía figurativa” y que tien ún de los referentes principales na obra de los poetes españoles de los 50. Piñán tamién foi seleccionada pol críticu José Ángel Cilleruelo pa la so antoloxía Nórdica. Última poesía n’asturiano (1994).
En 1998 apaez Temporada de pesca, poemariu onde gana protagonismu l'ambiente rural que fai de base pal tratu de temes recurrentes na poética de la autora: l' amor, la perda y el dolor.
Otru de los sos poemarios ye Un mes (2003), viaxe simbólicu pelos díes d'un mes, onde s'aprecia'l compromisu de la escritora cola realidá más inmediata.
Como narradora, Berta Piñán ye autora del llibru de rellatos La tierra entero (1996), Premiu de Narraciones Trabe 1995, que se publicó en castellanu dos años dempués. Nél l'autora recueye dieciséis rellatos breves onde la realidá cotidiana faise presente tanto na so vertiente urbana y moderna, como na rural y tradicional El rellatu Lula, lulina (1995) ye la so aportación a la lliteratura infantil.
Tamién tien delles traducciones, fizo una versión de poemes de Giuseppe Ungaretti: Ventidós poemes (1993) y tornó al asturianu la novela xuvenil Les montañes blanques (1990) de John Christopher.
Nos últimos años tamién vien trabayando sobre teoría de la escritura en talleres de creación lliteraria. Na actualidá vive en Madrid.
Collabora col selmanariu Les Noticies, dientro de la seción Paisaxe con figura.
Tabla de conteníos |
[editar] Obraes
[editar] Poesía
- Al abellu les besties (1986)
- Vida privada (1991)
- Temporada de pesca (1998)
- Un mes (2003)
- Noches d'incendiu (Trea. 2006), billingüe.
- La mancadura (Trea. 2010), billingüe.
[editar] Prosa
- La tierra entero (1996)
- La maleta al agua (2005)
- El branu de Mirtya (2005) (Ámbitu)
- Les coses que-y presten a Fran (2007)
- L'estranxeru (2007)
- Agua, arroz y maíz (Pintar pintar. 2010)
[editar] Ensayu
- Notes de Sociollingüistica Asturiana (1991)
- Tres sieglos construyendo la igualdá. ¿Qué ye'l feminismu? (2004)
