Bases Soberanes del Reinu Xuníu

De Wikipedia
Mapa de Xipre, coles Bases Soberanes d'Acrotiri y Dhekelia en fucsia.

Les Bases Soberanes (Sovereign Base Areas - SBAs, n'inglés) son les bases militares britániques allugaes en países enantes gobernaos pol Reinu Xuníu qu'entá caltienen la so antigua metrópolis y que nun fueron vencíos cuando esos países llograron la independencia.

Irlanda[editar | editar la fonte]

Dempués de la independencia del Estáu Llibre Irlandés en 1922, trés puertos marítimos, Castletownbere, Queenstown (renombrada darréu como Cobh) y Lough Swilly, fueron calteníos pol Reinu Xuníu, como una condición del Tratáu Anglo-Irlandés de 1921. Los puertos permanecieron controlaos pol Reinu Xuníu hasta l'Alcuerdu de Llibre Comerciu Anglo-Irlandés en 1938, cuando fueron devueltos a la soberanía irlandesa.

Xipre[editar | editar la fonte]

Base militar de RAF Acrotiri.

Acrotiri y Dhekelia son dos Bases Soberanes Britániques en Xipre (denominaes tamién zones de soberanía del Reinu Xuníu de Gran Bretaña ya Irlanda del Norte en Xipre[1]), antigua colonia de la Corona Británica. Les British Forces Cyprus son responsables de la so seguridá; alluguen una antena de comunicaciones, y ye la única base de la RAF nel Mediterraneu (yá que Gibraltar nun tien nenguna aviación permanentemente nel so territoriu), llamada RAF Acrotiri. Amás d'una guarnición, el Reinu Xuníu ayuda a les Fuercia de Naciones Xuníes en Xipre. En total, cuasi 3.500 militares británicos tán destinaos na islla.

Hai cierta desorientación cuando s'entra nes zones militares d'una base soberana (a diferencia de Guantánamo, onde hai carreteres que traviesen rápido'l territoriu). En particular, los nomes de les víes de circulación nos campos militares son toos bien ingleses, como "Worcester Road", ente otros. Les lleis civiles son promulgaes poles autoridaes civiles britániques, pero modelaes sobre les de la República de Xipre. Munchos ciudadanos xipriotes trabayen nes bases, principalmente pa les autoridaes britániques o como llabradores, y en negocios llocales. Pero namái dexen a los xipriotes que tengan una conexón llocal pa vivir ellí, como los que viven na llocalidá d'Acrotiri o nes contornes de los pueblos que tán cerca de les bases. Tamién les llocalidaes de Xylotymvou y Ormidhia son esclaves de la República de Xipre arrodiaos pola Base Soberana de Dhekelia.

Les Bases Soberanes en Xipre son un Territoriu d'Ultramar, pero en cuenta de tener un Gobernador, como los demás territorios, Acrotiri y Dhekelia tienen un Alministrador quien, anque designáu pola so Maxestá la Reina, ye responsable del Ministeriu de Defensa Nacional, non de la Foreign and Commonwealth Office. Estes bases tienen un prefixu radiofónicu británicu, ZC4, que ye dafechu distintu del xipriota, que davezu usa 5B.

Referencies[editar | editar la fonte]

  1. Artículu IV-440 del Tratáu pol que s'establez una Constitución pa Europa (en castellanu)

Ver tamién[editar | editar la fonte]

Enllaces esternos[editar | editar la fonte]